LUKAS 14 - Pustaka Si Badia

Jesus pepalem kalak busungen

¹ Sekali i bas wari Sabat Jesus man i rumah peminpin kalak Parisi. Tuan rumah ras teman-temanna mperdiateken IA.

² Jenari reh me sekalak sakit busungen ku lebe-lebe Jesus nahena ras tanna besar.

³ E maka nungkun Jesus man guru-guru agama Jahudi ras kalak Parisi nina, “Rikutken agama Jahudi, banci ntah lang pepalem kalak sakit i bas wari Sabat?”

⁴ Tapi sada pe kalak ndai la ngaloi. E maka ijemak Jesus tan kalak sakit ndai, ipepalemNa, jenari isuruhNa mulih.

⁵ Kenca bage nina Jesus man kalak si lit i bas rumah e, “Adi ndabuh anakndu ntah lembundu ku bas sumur i bas wari Sabat, ma kin minter irintakndu ndarat i bas wari Sabat e ka?”

⁶ Lanai teraloi kalak ndai ranan Jesus e.

Ingan kundul arah gugung ras arah berneh

⁷ Perbahan idah Jesus piga-piga temue milih ingan kundul arah ingan si mehamat, e maka iturikenNa perumpaman enda man kerina kalak si pulung i bas rumah e.

⁸ “Adi iundang kalak kam ku kerja-kerja erdemu bayu, ola kam kundul arah ingan si mehamat, gelah bicara lit gia kalak si belinen asa kam iundangna,

⁹ la ikatakenna man bandu, ‘Miser kam, temanta enda i je kundul!’ Sabap adi bage mela iakapndu sabap kam arus miser ku ingan si arah suah.

¹⁰ Dage, adi iundang kalak kam, ulin kam kundul arah suah, gelah reh si mada kerja nina man bandu, ‘O, teman, mari kundulken i bas ingan si mehamat enda.’ Alu bage kam ipehaga i lebe-lebe kalak si nterem.

¹¹ Sabap ise si peganjangken bana ia me pagi ipeteruk, janah ise si peteruk bana ia me pagi ipeganjangken.”

¹² Jenari nina Jesus man si ngundang IA, “Adi kam erbahan kerja suari ntah berngi, ola undang teman-temanndu, ntah senina-seninandu, ntah kade-kadendu, ntah pe anak kutandu si bayak-bayak gelah ola ia ersimulih man bandu alu ngundang kam ka.

¹³ Tapi adi atendu erbahan kerja man-man, undanglah kalak musil, kalak cempang-cempang, kalak pangpangen ras kalak pentang,

¹⁴ maka malem tuhu-tuhu atendu sabap la ia ngasup ersimulih man bandu. Dibata nge pagi si ersimulih man bandu i bas wari kekeken kalak si benar.”

Perumpaman kerna kerja man-man mbelin

¹⁵ Megi kai si ikataken Jesus e, ngerana sekalak temue e man Jesus nina, “Malem tuhu-tuhu ate kalak si itenahken Dibata ku kerja i bas Kinirajan Dibata.”

¹⁶ Ngaloi Jesus man bana, “Lit me sekalak si erbahan man-man si mbelin; nterem kalak iundang.

¹⁷ Kenca seh waktuna kerja man-man e, isuruhna juak-juakna ngelegi kalak si enggo iundangna, alu ngataken, ‘Ota, enggo sikap kerina!’

¹⁸ Tapi sekalak-sekalak ia ngataken alangenna. Si pemena nina, ‘Sentabi aku man bandu, sabap mbaru denga kal aku nukur juma; ateku lawes ngenehenca.’

¹⁹ Deba nina, ‘Enggo kutukur lembungku lima nioga, lembu penenggala; kucubaken ateku nenggalakenca, e maka sentabi aku man bandu.’

²⁰ Si deban ka nina, ‘Mbaru denga aku erjabu, perbahan si e aku la banci reh.’

²¹ E maka mulihken me juak-juak ndai, iturikenna kerina si e man tuanna. Megi si e merawa tuan ndai, e maka nina man juak-juakna, ‘To lawes ku pasar-pasar ras ku kesain kuta, baba ku jenda kalak musil-musil, kalak cempang-cempang, kalak pangpangen ras kalak pentang.’

²² La ndekahsa ngelapor juak-juak ndai nina, ‘O tuan, kai si ikatakenndu ndai enggo kudalanken, tapi lit denga ingan langa isin.’

²³ E maka nina tuan e man juak-juakna, ‘To lawes ku simpang-simpang ras ku pasar-pasar, iahken kerina kalak si i je ku bas rumahku enda gelah dem.

²⁴ Kukataken man bandu maka labo sekalak pe si enggo Kuundang ndube ngenanami pangan si enggo Kusikapken.’ ”

Sarat-sarat jadi ajar-ajar Jesus

²⁵ Asum nterem kalak si erdalan ngikutken Jesus, itulihken Jesus kalak si nterem e jenari nina,

²⁶ “Ise pe si reh ndahi Aku labo banci ia jadi ajar-ajarKu, adi la kin kelengen atena man Dibata asangken man bapana ras nandena, ndeharana ras anak-anakna, turangna ras seninana janah bage pe dirina jine.

²⁷ Ise pe labo banci jadi ajar-ajarKu adi la kin ipersanna kayu persilangna dingen ikutkenna Aku.

²⁸ Adi lit sekalak i bas kam atena erbahan menara, tentu ibahanna lebe anggaren biaya guna meteh ntah cukup kin duitna ntah lang i bas ndungi menara e.

²⁹ Sabap adi la bage, banci jadi kenca ipajekkenna palasna, lanai ia ngasup ndungisa. Jenari kerina kalak si ngidah dahinna si lolo e ncakapken ia,

³⁰ nina, ‘Kalak enda icubakenna majekken, tapi la ia ngasup ndungisa!’

³¹ Adi sekalak raja lawes ras sepuluh ribu kalak erperang ngelawan raja si deban si ras dua puluh ribu kalak, tentu iukurkenna lebe ngasup kin ia ntah lang.

³² Adi iakapna kin pe maka labo ia ngasup, tentu ikirimna utusenna mindo perdamen asum ndauh denga raja e.”

³³ Tole nina Jesus, “Alu bage, apai pe kam la metunggung jadi ajar-ajarKu, adi la kin itadingkenndu kerina si lit i bas kam.”

Sira si lanai masin

³⁴ “Sira tuhu mehuli, tapi adi sira e pe lanai masin alu kai nari banci ipemasin?

³⁵ Tuhu lanai erguna man juma ntah man campur pupuk; tapi iambekken nge. Begikenlah adi lit kin cupingndu!”