LUKAS 13 - Pustaka Si Badia

Jera ntah mate

¹ Paksa si e, reh piga-piga kalak maba berita man Jesus kerna kalak Galilea si enggo ibunuh Pilatus asum ia mpersembahken persembahenna man Dibata.

² Ngaloi Jesus man kalak ndai nina, “Perbahan kalak Galilea e ibunuh alu cara si bage, akapndu kin maka keleken dosana asangken dosa kalak Galilea si deban?

³ Kukataken man bandu, labo bage! Kam pe adi la kin kam jera, mate nge kam pagi bagi kalak ah ndai.

⁴ Kuga kerna si sepuluwaluh kalak si mate itindihi menara i Siloam? Akapndu kin maka keleken dosana asangken dosa kerina kalak si ringan i Jerusalem?

⁵ Kukataken man bandu, labo bage! Kam pe adi la kin kam jera, mate nge kam pagi bagi kalak ah ndai.”

Perumpaman kerna batang ara si la erbuah

⁶ Jenari ituriken Jesus man kalak e perumpaman enda, “Lit me sekalak empu kebun anggur; i bas kebun anggur e turah sada batang ara. Lawes ia ku je ndarami buahna tapi la lit sada pe idatna.

⁷ E maka nina man si ngiani kebun e, ‘Enggo telu tahun tep-tep aku reh ndarami buah batang ara enda, tapi la pernah lit buahna. Tabah sajalah! Percuma ia turah i bas taneh enda.’

⁸ Tapi nina si ngiani kebun e, ‘O Tuan, pelepas i je setahun nari; kukuruk lebe taneh i kelewetna gelah kutama pupukna.

⁹ Mbera-mbera erbuah ia tahun si reh; tapi adi lang tabah saja.’ ”

Ipepalem Jesus kalak sakit sanga wari Sabat

¹⁰ Sekali sanga wari Sabat kalak Jahudi ngajar Jesus i bas rumah pertoton.

¹¹ Lit me i je sekalak diberu enggo sepuluwaluh tahun dekahna bangger iulahi setan, si erbahanca ia mbengkung dingen lanai ngasup tedis pajek.

¹² Asum idah Jesus diberu e, ilebuhNa nina, “Nande, penakitndu enggo malem!”

¹³ Itamaken Jesus tanNa ku babo diberu e jenari minter ia tedis pajek. Kenca bage ipujina Dibata.

¹⁴ Tapi merawa pengulu rumah pertoton e, sabap ipepalem Jesus ia i bas wari Sabat. E maka ngerana ia man jelma si nterem nina, “Lit kap enem wari guna erdahin; e maka rehlah i bas salah sada wari e gelah ipepalem, labo i bas wari Sabat.”

¹⁵ Ngaloi Jesus man bana nina, “O kam kalak pekulah-kulah! Ma kin kerina nge kam peluar lembuna ntah kaldena i bas karangna nari pemincepsa i bas wari Sabat pe?

¹⁶ Diberu enda kesusuren Abraham; enggo sepuluwaluh tahun dekahna ia itaban Iblis; ma patut nge ia ipulahi i bas wari Sabat gia?”

¹⁷ Asum ikataken Jesus bage, mela kerina imbang-imbangNa, tapi kalak si nterem ermeriah ukur ngidah tanda sengget si ilakoken Jesus.

Perumpaman kerna benih

¹⁸ E maka iterusken Jesus ngerana nina, “Bali ras kai kin Kinirajan Dibata e? Alu kai kin e banci Kuandingken?

¹⁹ E me bagi sengkebuah benih sawi si ibuat kalak dingen isuankenna i jumana; turah me sawi e jadi meganjang bagi batang kayu seh banci perik-perik rasar i bas dahanna.”

Perumpaman kerna ragi

²⁰ Tole nina Jesus, “Alu kai kin banci Kuandingken Kinirajan Dibata e?

²¹ E me bagi ragi si ibuat diberu jenari icampurna ras telu tumba tepung seh serser kerina.”

Pintun si kitik

²² Iterusken Jesus perdalanenNa ku Jerusalem janah i bas perdalanenNa singgah IA arah kuta-kuta si meriah bage pe kuta-kuta si kitik dingen ngajar IA i je.

²³ Lit sekalak si nungkun man baNa nina, “O Tuan, la kin pagi nterem kalak si terkelin?” Erjabap Jesus man bana,

²⁴ “Cubakenlah asa ngasupndu bengket arah pintun si kitik e; Kukataken pe man bandu maka nterem nge kalak si ncubakenca bengket ku bas tapi la banci.

²⁵ Adi kenca keke tuan rumah e dingen kenca ierukna pintun kam tedis i darat nuktuk, janah nindu, ‘O, Tuan, talangi pintun man kami!’, ialoina me kam, ‘La kam kutandai!’

²⁶ Jenari nindu ka, ‘Enggo pernah kami man dingen minem ras kam, bage pe enggo pernah Kam ngajar i pasar-pasar kuta kami.’

²⁷ Ngaloi ka ia man bandu, ‘La kam kutandai! Laweslah i bas Aku nari o kalak jahat!’

²⁸ I je me pagi kam tangis dingen mesui kal atendu asum idahndu Abraham, Isak, Jakup ras kerina nabi-nabi ermeriah-meriah i bas Kinirajan Dibata, tapi kam iambekken ku darat.

²⁹ Janah rehen me kalak i Timur, i Barat, i Utara, ras i Selatan nari ermeriah-meriah i bas Kinirajan Dibata.

³⁰ Kalak si genduari arah pudi jadi arah lebe kap pagi; janah kalak si genduari arah lebe jadi arah pudi kap pagi.”

Kekelengen Jesus nandangi Jerusalem

³¹ I bas paksa e reh piga-piga kalak Parisi ndahi IA, janah nina, “To lawes, tadingken ingan enda sabap ibunuh Herodes atena Kam.”

³² Ngaloi Jesus man kalak ndai nina, “To kataken man serigala e, ‘Kupelawes setan-setan dingen Kupepalem si sakit i bas wari si sendah ras si pepagi, janah i bas wari peteluken dung me dahinKu.’

³³ Amin bage gia, la banci lang kuterusken nge perdalanenKu sendah, pagi ras kedun; sabap labo mungkin sekalak nabi ibunuh pala i Jerusalem.

³⁴ O Jerusalem, Jerusalem! Ibunuhndu nabi-nabi, ibenterindu persuruhen si enggo isuruh Dibata reh ndahi kam! Enggo piga-piga kali ateKu mpepulung bangsandu, bagi indung manuk pepulung anak-anakna i teruh kabengna, tapi la kam nggit!

³⁵ Tuhu-tuhu me pagi rumahndu itadingken seh melungun. Kukataken pe man bandu, lanai pagi Aku idahndu seh waktuna ikatakenndu, ‘Ipasu-pasu gelah IA si reh i bas gelar Tuhan.’ ”