KEJADIN 1 - Pustaka Si Badia

Turi-turin kejadin si nasa lit

¹ Mula-mulana ijadiken Dibata langit ras doni.

² Doni lume denga, la lit tempasna. Lawit si mbelang ergalumbang itutupi gelap mesangat, janah kesah Dibata kelaling-kelaling i babo lau engkuasaisa.

³ Nina Dibata, “Jadi lah terang” – e maka jadi me terang.

⁴ Idah Dibata maka terang ndai tuhu-tuhu mehuli. Jenari isirangken Dibata terang ibas gelap nari.

⁵ Terang igelariNa “Suari”, gelap igelariNa “Berngi”. E maka ben me wari, jenari siang – e me wari si pemena.

^6-7 Jenari nina Dibata, “Jadi lah awang-awang guna nirangken lau ras lau si deban ras njagaisa gelah ola ersada.” Jadi me bagi si iperentahken Dibata e. Bage me ijadiken Dibata awang-awang guna nirangken lau si i das ras lau si i teruh.

⁸ Awang-awang ndai igelari Dibata “Langit”. E maka ben me wari, jenari siang ka – e me wari si peduaken.

⁹ Nina Dibata, “Ersada lah kerina lau si lit i teruh langit i bas sada ingan, gelah lit teridah taneh kerah.” E maka jadi me bage.

¹⁰ Igelari Dibata taneh si kerah ndai “Daraten”, janah lau si enggo ersada ndai “Lawit”. Idah Dibata maka sinijadikenNa e tuhu-tuhu mehuli.

¹¹ Kenca bage nina Dibata, “Turah lah i bas taneh nari kerina sinuan-sinuan, e me dukut-dukut si erbuah, kayu si erbuah si lit sinuanna i bas buahna.” E maka jadi me bage.

¹² Turah me ibas taneh nari kerina erbage sinuan-sinuan; janah idah Dibata maka sinijadikenNa e tuhu-tuhu mehuli.

¹³ E maka ben me wari, jenari siang ka, – e me wari si peteluken.

¹⁴ Nina Dibata, “Lit lah i langit barang si erbanca terang, guna nirangken suari ras berngi, jadi tanda-tanda permulan wari, tahun ras musim.

¹⁵ Janah ersinalsallah i langit barang si terang ndai guna mereken terang man doni.” E maka jadi bage.

¹⁶ Ijadiken Dibata dua barang terang si galangna, e me: matawari guna ngkuasai suari ras bulan guna ngkuasai berngi. Bage pe bintang-bintang ikut ijadiken Dibata.

¹⁷ Itamaken Dibata barang-barang si terang ndai i langit, guna nerangi doni,

¹⁸ ngkuasai suari ras berngi dingen nirangken terang i bas gelap nari. Idah Dibata maka sinijadikenNa e tuhu-tuhu mehuli.

¹⁹ E maka ben me wari, jenari siang ka – e me wari si peempatken.

²⁰ Nina Dibata, “Lit lah erbage-bage macam si nggeluh ndemi lau ras erbage-bage perik ndemi awang-awang.”

²¹ Jenari ijadiken Dibata rubia-rubia si mbelin si nggeluh i bas lawit, bage pe kerina erbage rubia-rubia si deban si nggeluh i bas lau, ras pe kerina erbage perik-perik. Idah Dibata maka sinijadikenNa e tuhu-tuhu mehuli.

²² Ipasu-pasuNa kerina. Nina Dibata man rubia-rubia si nggeluh i bas lau ndai, “Ertambah-tambahlah janah demi lah lawit.” Nina man perik-perik, “Ertambah-tambahlah.”

²³ E maka ben me wari, jenari siang ka – e me wari si pelimaken.

²⁴ Nina Dibata, “Jadi lah i bas taneh nari kerina erbage rubia-rubia si nggeluh: kerina erbage asuh-asuhen ras kerina rubia-rubia si meliar, si galang ras kitik.” E maka jadi bage.

²⁵ Ijadiken Dibata kerina erbage rubi-rubia si meliar, kerina erbage asuh-asuhen, ras kerina rubia-rubia si njoler. Idah Dibata maka sinijadikenNa e tuhu-tuhu mehuli.

²⁶ Nina Dibata, “Genduari Sijadikenlah manusia si sentudu ras tempasTa, si menam seri ras Kita, gelah ikuasaina kerina nurung, perik-perik, bage pe kerina asuh-asuhen ras rubia-rubia si meliar, subuk si galang ras si kitik.”

²⁷ E maka ijadiken Dibata manusia, si sentudu ras tempasNa; dilaki ras diberu ijadikenNa.

²⁸ Ipasu-pasu Dibata manusia ndai, nina, “Ertuahlah kam jadi nterem, demi dingen taluken doni enda, kuasai kerina nurung, perik-perik i awang-awang, bage pe kerina rubia-rubia i daraten.

²⁹ Kubereken man panganndu kasa kai sinuan-sinuan si erbuah i babo doni enda ras kerina batang kayu si erbuah si lit sinuanna i bas buahna.

³⁰ Tapi man kerina rubia-rubia i daraten ras man perik-perik i awang-awang, Kubereken dukut-dukut si meratah ras sinuan-sinuan si erbulung man panganna.” E maka jadi me bage.

³¹ Kenca bage itatap Dibata, janah idahNa maka kerina si enggo ijadikenNa tuhu-tuhu mehuli. E maka ben wari, jenari siang ka – e me kap wari si peenemken.