JOEL 3 - Pustaka Si Badia

Ukumen Dibata nandangi bangsa-bangsa

¹ Nina TUHAN, “Tupung e pagi Kuulihken ka kemakmuren Juda ras Jerusalem.

² Kupepulung kerina bangsa-bangsa jenari Kubaba ia kerina ku Baluren Pengadilen. I jah Kuadili ia erkiteken kai si enggo ibahanna man bangsangKu. Enggo ikerapkenna kalak Israel ku negeri-negeri si deban jenari ibagi-bagikenna negeringKu, Israel.

³ Ibahanna tikam tanduk nentuken ise ndatken tabanen. Idayakenna anak dilaki ras diberu jadi budak, lako nggalari diberu si pencarinna erlua-lua ras nukur lau anggur.

⁴ Kai kin atendu ibahanndu man bangKu o Tirus, Sidon ras daerah-daerah Pilisti? Erbalas kin atendu man bangKu? Adi e kin sura-surandu, minter ka nge Aku erbalas man bandu!

⁵ Enggo ibuatindu pirak ras emasKu, jenari iangkutndu barang-barangKu si meherga bas rumah persembahenndu.

⁶ Enggo iangkutndu kalak Juda ras kalak Jerusalem ndauh i bas negerina nari, dingen idayakenndu ia man kalak Junani.

⁷ Genduari Kubaba ateKu ia ndarat i bas ingan e nari, e me ingan ku ja ia enggo idayakenndu. Kulakoken man bandu bagi enggo ilakokenndu man bana.

⁸ Kupelepas anakndu si dilaki ras si diberu idayaken man kalak Juda. Idayaken kalak Juda ka ia kerina man sada bangsa si ndauh, e me kalak Syeba. Aku TUHAN kap si enggo melasken kata enda.

⁹ Momokenlah enda man bangsa-bangsa kerina: Ersikaplah guna erperang, dilo kerina kalak si mbisandu, suruh berkat kerina tenterandu.

¹⁰ Tepa gigi lukundu jadi pedang, sabi-sabindu jadi lembing. Kalak si la megegeh pe arus ikut erperang.

¹¹ Pedasken mari, o kam bangsa-bangsa jenari pulunglah i bas berneh-berneh.” O TUHAN, suruh tenteraNdu reh nerang ia kerina.

¹² “Bangsa-bangsa la banci la ersikap, dingen reh ku Baluren Pengadilen. I je, Aku TUHAN mereken penghakimen man bangsa-bangsa.

¹³ Jahat kap ia kerina; sabi ia desken gandum isabi tupung peranin; erik ia bagi ngerik buah anggur i bas pengeriken seh maka ndaraten launa.

¹⁴ Meribu-ribu kalak, meribu-ribu kalak i bas berneh-berneh Pengadilen. Ku je me reh wari TUHAN janah pedas-pedas me Ia reh.

¹⁵ Matawari ras bulan jadi gelap bintang-bintang pe lanai ersinalsal.”

TUHAN masu-masu bangsaNa

¹⁶ TUHAN ergeruhguh i Deleng Sion nari, sorana erlenggur i Jerusalem nari; doni ras langit mundu-undu, tapi Ia kap sekawal bangsaNa.

¹⁷ “O Israel jenari itandaindu kap pagi maka Aku kap TUHAN Dibatandu. I datas Deleng Sion, delengKu si badia, i je ringan Aku. Jerusalem jadi kuta si badia lanai ndigan pe kalak si deban naluken ia.

¹⁸ Tupung e tambur me deleng-deleng alu peken anggur, asuh-asuhen dem i bas tiap-tiap uruk, lau si erburak-burak maler; i bas kerina sumbul lau Juda nari, Ulu lau pultak i bas Rumah Pertoton TUHAN nari maler ku Baluren Akasia.

¹⁹ Mesir jadi gurun pasir, Edom jadi mbalmbal si terulang erkiteken enggo iserangna negeri Juda, janah ibunuhina kalak si la ersalah.

^20-21 Erbalas me Aku man kalak si enggo munuhi; la ateKu mekuah man kalak jahat. Tapi Juda ras Jerusalem tetap iingani rasa lalap, dingen Aku TUHAN ringan i datas Deleng Sion.”