JEREMIA 1 - Pustaka Si Badia

¹ Isi kitap enda e me perkatan Jeremia anak Imam Hilkia si ringan i kuta Anatot i negeri Benyamin.

² Kata TUHAN seh man Jeremia i bas tahun pesepuluh teluken tupung Josia anak Amon jadi raja Juda.

³ Kenca si e pe rusur denga nge reh kata TUHAN man Jeremia tupung Joyakim anak Josia jadi raja seh ngayak pengkeri-kerin tahun pesepuluh sadaken pemerentahen Raja Sedekia anak Josia. I bas bulan pelimaken i bas tahun e kalak Jerusalem ibaba tertaban ku pembuangen.

Pendilo TUHAN man Jeremia

⁴ Kata TUHAN reh man bangku nina,

⁵ “Kupilih kam ope denga Kubereken man bandu kegeluhen. Ope denga kam tubuh enggo Kuserapken kam jadi nabi man bangsa-bangsa.

⁶ Ningku ngaloisa, “O TUHAN si Erdolat, la kueteh uga melasken kata, ngudasa denga aku.”

⁷ Nina TUHAN man bangku, “Ola katakenndu kam ngudasa. Tapi laweslah ku bangsa-bangsa ku ja kam Kusuruh. Kataken man bana kerina si Kuperentahken man bandu.

⁸ Ola kam mbiar sabap Aku kap ras kam guna mulahi kam. Aku kap TUHAN si enggo ngerana!”

⁹ Kenca bage ipepinter TUHAN tanNa lako ngkuit biberku, jenari nina man bangku, “Begiken, Kubereken man bandu perkatan-perkatan si la banci la ibelaskenndu.

¹⁰ Sendah Kubereken man bandu kuasa nandangi bangsa-bangsa ras kerajan-kerajan lako mbungkarken dingen ngeruntuhken, lako ngkernepken dingen ngeradasken, lako manteki dingen nuan.”

Dua pengenehenen

¹¹ Isungkun TUHAN aku nina, “O Jeremia kai si idahndu?” Ningku njabapsa, “Kuidah sada ciken kayu ketapang.”

¹² Nina TUHAN, “Payo si idahndu e, sabap tuhu mejehe Aku ngenehen katangKu idalanken.”

¹³ Ngerana ka tole TUHAN man bangku nina, “Kai denga si idahndu?” Ningku njabapsa, “Kuidah kudin taneh luam isina, rehna i Utara nari.”

¹⁴ Nina TUHAN man bangku, “I Utara nari reh me ukumen si luam lako ngukum kerina negeri enda.”

¹⁵ Sabap Kudilo kerina bangsa-bangsa si arah Utara, gelah kerina raja-rajana namaken kursi kinirajanna i bas pintu gerbang Jerusalem dingen sekelewet benteng-bentengna, bage pe i sekelewet kerina kuta-kuta Juda.

¹⁶ Kuukum ateKu bangsangKu, erkiteken dosa-dosa si enggo ibahanna; itundalkenna Aku. Ipersembahkenna persembahen man dibata-dibata si deban, ibahanna gana-gana jenari nembah man bana.

¹⁷ Ersikapken Jeremia, to kataken kerina si Kuperentahken man bana. Ola mbiar, gelah ola kam pagi Kubahan mbiar tupung kam i tengah-tengahna.

^18-19 Jeremia dengkehkenlah! Kerina kalak si ringan i negeri enda subuk raja-raja Juda, pegawai-pegawaina, imam-imamna, bage pe kerina pendudukna la banci la keke ngelawan Kam. Tapi sendah Kubereken man bandu gegeh lako ngelawan ia kerina. Kubahan kam bali ras kuta si erbenteng, desken binangun besi, dingen bagi tembok tembaga. La kam tertalukenca, sabap Aku kap ras kam, Aku si mulahi kam. Aku TUHAN si ngerana enda.”