HOSEA 14 - Pustaka Si Badia

Pemindon Hosea man Israel

¹ Mulihlah ku TUHAN Dibatandu, o Israel. Dosandu mahanca kam tertuktuk dingen jongkang.

² Mulihlah kempak TUHAN, janah bahanlah pertoton enda jadi persembahenndu man baNa, “Alemilah kerina dosa-dosa kami janah alokenlah pertoton kami maka ipuji kami Kam sue ras si enggo ipadanken kami.

³ Asa ndigan pe labo ngasup Assur ngkelini kami, kuda perang pe la banci engkawali kami. Ndigan pe lanai kami nggit ngatakenca man gana-gana kami maka ia me Dibata kami. O TUHAN, icidahkenNdu kap perkuah ateNdu man kalak si la lit si deban penalemenna.”

Padan TUHAN kerna kegeluhen si mbaru man Israel

⁴ Nina TUHAN, “BangsangKu enggo nilah, tapi Kubaba nge ia mulih Kukelengi ia alu ukur meriah, sabap man bana lanai ateKu nembeh.

⁵ Desken udan man taneh kerah, bage me Aku kempak Israel. Erbunga me ia desken bunga encole; uratna mbages desken kayu Libanon.

⁶ Dahan-dahanna ertunas mbaru, perbulungna mejile bagi batang saitun. Bauna seh kal kap rimna, bali ras cemara i Deleng Libanon.

⁷ Mulihken ka ia cilinggem i teruh pengkawalingKu, mejile perturahna bagi batang gandum. Erbuah ia bagi batang anggur; terberita gelarna bagi anggur Libanon.

⁸ Lanai diate bangsa Israel pe berhala-berhala; Aku nge si megiken pertotonna ras si ngarak-ngaraksa; Kulinggemi ia desken kayu si tetap meratah bulungna; Aku me jadi sumbul kerina pasu-pasuna.”

Kata pendungi

⁹ Iertiken kalak pentar min kai si tersurat i jenda, dingen itamakenna ku bas pusuhna. Dalan TUHAN pinter kap, e maka kalak bujur erdalan arah e. Tapi kalak perdosa tertuktuk dingen jongkang.