ESTER 3 - Pustaka Si Badia

Haman ersura-sura ngkernepken bangsa Jahudi

¹ La asakai dekahna kenca si e, iangkat Raja Ahasweros si Haman jadi perdana menteri. Haman e me kap anak Hamedeta, kesusuren Agag.

² Enggo iperentahken raja man kerina pegawaina maka arus ihamatina Haman alu erjimpuh i lebe-lebena.

³ Nungkun pegawai-pegawai raja si deban man Mordekai ngkai maka la ipatuhina perentah raja e;

⁴ tep-tep wari iendik-endik kalak ndai gelah ia nggit nembah Haman, tapi la ibegikenna cakap kalak e. “Aku kalak Jahudi; aku la banci nembah man manusia,” nina Mordekai. E maka ituriken kalak ndai si enda man Haman, sabap merincuh ia metehsa kuga kari ibahan Haman man Mordekai.

⁵ Lanai tanggung nembehna ate Haman kenca ietehna maka Mordekai la nggit nembah erjimpuh man bana.

⁶ Terlebih-lebih kenca ietehna maka Mordekai e me kalak Jahudi, iputuskenna maka labo Mordekai saja ngenca atena ibunuhna, tapi kerina kalak Jahudi si lit i bas kerajan Persia pe.

⁷ I bas tahun si pesepuluh duaken pemerentahen Raja Ahasweros, bulan si pemena, e me bulan Nisan, iperentahken Haman erbahan tikam tanduk, si igelari “purim” lako meteh wari si apai ras bulan si apai maka payo nehken sura-surana si la mehuli e. E maka idatca me keputusen: wari sepuluh telu, bulan si pesepuluh duaken, e me bulan Adar.

⁸ Dage ituriken Haman man raja nina, “Lit sada suku bangsa nggeluh serap-serap i tengah-tengah rayatndu, janah ia ringan i bas tiap propinsi kerajanndu. Adatna la bali ras bangsa-bangsa si deban. Tambah si e, la ia patuh man undang-undang kerajan. Dage labo lit sitik pe untungna man bandu adi kalak enda ipediat saja.

⁹ E maka adi mehuli iakapndu, bahandulah surat perentah gelah kerina ia ibunuh. Adi e idalanken, pang aku njaminsa maka ngasup aku mereken lebih 340.000 kilo pirak man bendahara kerajan.”

¹⁰ Megi si e ibuat raja cincin setempel i bas jari-jarina nari, jenari iberekenna man Haman anak Hamedata, kesusuren Agag, musuh kalak Jahudi e.

¹¹ Nina raja man Haman, “Bangsa e ras duitna kuendesken bandu; bahanlah bagi atendu.”

¹² E maka i bas wari sepuluh telu bulan si pemena, idilo Haman me sekretaris-sekretaris raja, janah isuruhna erbahan surat perentah jenari iterjemahken ku tep-tep cakap ras tulisen si lit i bas kerajan e, gelah ikiremken man kerina gubernur, bupati ras pembesar-pembesar kerajan. Surat perentah e ibahan i bas gelar Raja Ahasweros,

¹³ jenari pedas ikiremken ku kerina propinsi. I bas surat e iperentahken maka i bas sada wari si enggo itetapken, e me wari sepuluh telu, bulan Adar, kerina kalak Jahudi, subuk nguda tah metua, diberu tah danak-danak, arus ibunuh. Kerina arus ikernepken janah erta-ertana pe irampas.

¹⁴ Isi surat perentah e arus imomoken man jelma si nterem i bas tep-tep propinsi, gelah kerina sikap i bas wari si enggo itetapken e.

¹⁵ Arah perentah raja, peraturen e imomoken i bas ibukota Susan, janah pertenahen pedas-pedas maba berita e ku kerina propinsi.