ESRA 1 - Pustaka Si Badia

Raja Kores merentahken kalak Jahudi banci mulih

¹ I bas tahun si pemena pemerentahen Kores raja Persia, jadi me bagi kai si enggo ikataken TUHAN arah Nabi Jeremia. Si enda ilakoken TUHAN alu pekeke ukur Raja Kores erbahan surat perentah bagi si tersena arah teruh enda, guna iogeken alu megang i belang-belang kerajanna.

² “Enda me perentah Kores, raja Persia. TUHAN, Dibata enggo mereken kerina kerajan doni enda man bangku. IberekenNa pe man bangku tanggung jabap majekken rumah pertoton man baNa i Jerusalem i daerah Juda.

³ O kam bangsaNa, Dibatalah si nemani kam kerina. Mulihlah kam ku Jerusalem, pajekken mulihi Rumah Pertoton TUHAN, Dibata Israel si isembah i Jerusalem.

⁴ BangsaNa si genduari i bas pembuangen, adi perlu penampat lako mulih, kalak si sada kuta ras ia arus mereken penampat alu mereken pirak, emas, barang-barang si deban, ras rubia-rubia guna ngangkat barang, bage pe persembahen-persembahen lako ipersembahken i Rumah Pertoton Dibata i Jerusalem.”

⁵ Kenca bage pengulu-pengulu terpuk suku Juda ras Benyamin, imam-imam ras kalak Lewi, ras kalak si debanna, si pusuhna enggo ipekeke Dibata, minter ersikap gelah berkat ku Jerusalem lako majekken mulihi Rumah Pertoton TUHAN.

⁶ Kerina kalak si sada kuta ras ia nampati alu mereken peralaten pirak, emas, barang-barang si debanna, asuh-asuhen guna ngangkut barang-barang si debanna si meherga, ras persembahen-persembahen guna Rumah Pertoton.

⁷ Tambah si e iulihken Kores pe mangkuk ras cangkir Rumah Pertoton man kalak ndai. Kerina barang-barang enda mbarenda enggo ibuat Raja Nebukadnesar i bas Rumah Pertoton nari i Jerusalem, jenari itamakenna ku rumah pertoton dibata-dibatana.

⁸ Iendesken Kores barang-barang e man Mitredat, kepala perbendaharan kerajan. Mitredat nuratken kerina gelar barang-barang e gelah iendesken man Sesbasar, gubernur Juda.

^9-10 Enda me gelar barang-barang ndai: Mangkuk emas guna persembahen 30 mangkuk pirak guna persembahen 1.000 mangkuk si deban 29 mangkuk emas kitik 30 mangkuk pirak kitik 410 perkakas-perkakas si deban 1.000

¹¹ Buena kerina lit 5.400 mangkuk emas ras pirak bage pe barang-barang si deban si ibaba Sesbasar asum ia ras kalak buangen si deban lawes i Babil nari ku Jerusalem.