AMOS 3 - Pustaka Si Badia

¹ O kalak Israel, begikenlah kata TUHAN si ibelaskenNa kerna kam, kam si sada bangsa si ibabaNa i Mesir nari. Bagenda nina,

² “I bas kerina bangsa-bangsa si lit i doni enda kam ngenca bangsa si Kutandai dingen si Kuarak-arak. Em sabapna maka la banci la Kuukum kam erkiteken dosa-dosandu.”

Dahin nabi

³ Lit kin dua kalak ras erdalan adi la ia leben enggo erpadan?

⁴ Lit kin singa erdengum i bas kerangen adi langa ia jumpa si man jerngemenna? Lit kin anak singa erdengum i bas liangna adi langa lit tangkapenna?

⁵ Lit kin perik kena ragum adi la lit empanna i bas ragum e? Banci kin ragum sayep adi la lit si ngkuitca?

⁶ Adi iembus terompet i bas kuta, banci kin kalak la mbiar megisa? Banci kin reh cilaka ku sada kuta adi la bekas penuruh TUHAN?

⁷ Kai pe la ilakoken TUHAN si Erdolat adi la lebe ipetangkasNa sura-suraNa man suruh-suruhenNa, e me nabi-nabi.

⁸ Megi sora singa erdengum, ise kin la mbiar? Megi TUHAN si Erdolat ngerana, ise kin ngasup la meritaken kataNa?

Ukumen man Samaria

⁹ Momokenlah man kalak si ringan i bas istana raja-raja Mesir ras Asdot, bagenda, “Pulunglah i das uruk-uruk sekelewet Samaria; pernehenlah uga rontangna ras jahatna si ilakoken i bas kuta e.”

¹⁰ Nina TUHAN, “I bas rumahna si mbelin ipepulungna melala barang-barang si idatca arah kejahaten ras kinirawan. La itehna pe nehken si bujur.

¹¹ Erkiteken si e, ikepung musuh me negerina, bentengna iruntuhken, dingen rumahna si mbelin e irampasi.”

¹² Nina TUHAN, “Bagi idat permakan dua nahe tah sitik nari ngenca i bas cuping biri-biri si ipan singa, bage me pe piga-piga kalak nari ngenca pagi tading kalak Samaria si genduari medem-medem alu senang i das bale-bale si mejile.

¹³ Genduari, begikenlah, janah persingetilah man kesusuren Jakup,” nina TUHAN si Erdolat si Mada Kuasa.

¹⁴ “Tupung warina Kuukum bangsa Israel erkiteken dosa-dosana, Kukernepken pagi batar-batar ingan ersembah i Betel. Kerina tanduk batar-batar Kupenggelken dingen Kudabuhken ku taneh.

¹⁵ Rumah-rumah guna paksa mbergeh ras paksa ngisah Kurontasken kerina. Rumah-rumah si iukir alu gading iruntuhken, janah kerina rumah si mbelin Kukernepken.”