AMOS 1 - Pustaka Si Badia

¹ Enda me kata si ibelasken Nabi Amos; ia sekalak permakan i kuta Tekoa nari. Dua tahun ope denga linur si mbelin e, ipetangkas Dibata man Nabi Amos kerna negeri Israel. Tupung si e si jadi raja i Juda e me Raja Usia, dingen i Israel e me Raja Jerobeam anak Joas.

² Nina Amos, “TUHAN erdengum i Deleng Sion nari; soraNa erlenggur i Jerusalem nari. Mbalmbal jadi kerah dukut Deleng Karmel melus kerina.”

Ukumen Dibata man negeri-negeri sekelewet Israel Siria:

³ Nina TUHAN, “Anak kuta Damaskus la erngadi-ngadi erbahan dosa. Erkiteken si e la banci lang Kuukum ia. Sabap ierikna kalak Gileat desken ngerik gandum alu gereta besi pengeriken.

⁴ Erkiteken si e Kubenterken api ku bas istana si ipajekken Raja Hasael janah Kuciluk benteng-benteng Raja Benhadad.

⁵ Pintu-pintu gerbang Kuta Damaskus Kuperperken, dingen Kupelawes kasa kai kalak si ringan i Baluren Awen bage pe si erkuasa i Bet-Eden. Penduduk negeri Siria ibaba tertaban ku negeri Kir.”

Pilisti:

⁶ Nina TUHAN, “Anak kuta Gasa la erngadi-ngadi erbahan dosa. Erkiteken si e la banci lang Kuukum ia. Sabap keri sada bangsa ibabakenna jadi tabanen, jenari idayakenna jadi budak man bangsa Edom.

⁷ E maka kubenterken api ku tembok-tembok kuta Gasa dingen Kuciluk benteng-bentengna.

⁸ Kusasapken penduduk Asdot bage pe si ngerajai Askelon. Kuukum kuta Ekron, janah kerina kalak Pilisti si tading denga la banci la mate.”

Tirus:

⁹ Nina TUHAN, “Anak kuta Tirus la erngadi-ngadi erbahan dosa. Erkiteken si e la banci lang Kuukum ia. Sabap ibabakenna keri sada bangsa, ku bas pembuangen i negeri Edom, janah la ipatuhina perpadanen perdamen si ibahanna ras senina-seninana.

¹⁰ Erkiteken si e Kubenterken api ku tembok-tembok kuta Tirus dingen kuciluk benteng-bentengna.”

Edom:

¹¹ Nina TUHAN, “Kalak Edom la erngadi-ngadi erbahan dosa. Erkiteken si e la banci lang Kuukum ia. Sabap iayak-ayakna seninana kalak Israel alu pedang, janah la lit sitik pe mekuah atena. Pernembeh atena la ersibar, janah la ipelepasna nimpet-nimpet.

¹² Erkiteken si e Kubenterken api ku tembok-tembok kuta Teman, dingen Kuciluk benteng-benteng Bosra.”

Amon:

¹³ Nina TUHAN, “Kalak Amon la erngadi-ngadi erbahan dosa. Erkiteken si e la banci lang Kuukum ia. I bas perang lako nambahi daerah jajahenna, iburtaskenna beltek pernanden si sangana mehuli kulana i Gileat.

¹⁴ Erkiteken si e Kubenterken api ku tembok-tembok Rabba, janah Kuciluk benteng-bentengna. Kenca bage terbegi sora surak-surak perang i bas wari perang e, janah peperangen gara desken angin kaba-kaba.

¹⁵ Rajana ras kerina kalak si erpangkat ibaba ku pembuangen.”