मरकुस 15 - बृज भासापिलातुस के सामने ईसू पेस कियौ गयौ ( मत्ती 27:1–2 , 11–14 ; लूका 23:1–5 ; यूहन्ना 18:28–38 ) 1 और सबेरो होतई यहुदी पिरधान पुरोहित ओर बुजुर्ग यहुदी और सास्त्रन कूं सिखाबे बारेन नें और सिगरी यहुदी पंचायत नें मिलके ईसू कूं बंधबायौ, और लै जायकै रोमी राज्यपाल पिलातुस के हातन में सौंप दियो। 2 पिलातुस नें बाते पूछी, “का तू यहुदियन कौ राजा है?” ईसू नें बाय जबाव दियौ, “तू खुदई तौ कह रयौए।” 3 और यहुदी पिरधान पुरोहित बापे भौत बातन कौ दोस लगाय रये हते। 4 पिलातुस नें बाते फिर पूछी, का तोय कछू उत्तर नांय दैनों? जे तोपे कितनीं बातन को दोस लगाय रये है। 5 ईसू नें फिरऊ कछू उत्तर नांय दियो, जापै पिलातुस कूं भौत अचम्भों भयौ। ईसू कूं मारबे काजै सौंपो जानों ( मत्ती 27:15–26 ; लूका 23:13–25 ; यूहन्ना 18:39—19:16 ) 6 और फसह के तोहार के दिन पिलातुस काऊ एक बन्दी कूं जाय लोग चांहते, बिनके काजै छोड़ि दयो करतो। 7 बाई समै बरअब्बा नाम कौ एक आदमी बलबा करवे बारेन के संग पिलातुस की कैद में हतो। जानें बलबा में एक आदमी कूं मार दियौ हतो। 8 भीड़ पिलातुस के जौरें आयकें कहिवे लगी कै, “जैसो तू हमारे काजै हर साल एक कैदी कूं छोड़तो आयौ हे बैसौई कर।” 9 पिलातुस नें बिनते पूंछी, “का तुम चाहतौ कै मैं तुम्हारे काजै यहुदियन के राजा कूं छोड़ दूं?” 10 चौंकि बू जानतो कै यहुदी पिरधान पुरोहित नें जलन ते ईसू कूं पकरबायौ है। 11 पर यहुदी पिरधान पुरोहित नें लोगन कूं उकसायौ, कै बू बरअब्बा कूं अपने काजै छोड़ दैवे की कहें। 12 पिलातुस नें भीड़ ते फिर पूछी, “जा आदमी कौ का करूं, जाय तुम यहुदियन के राजा कहतौ?” 13 भीड़ चिल्लायकै कैहबे लगी, “बाकूं क्रूस पै चढ़ाय दे।” 14 पिलातुस नें बिनते पूछीं, “जाने का अपराध करौ है?” पर बे औरऊ जौर ते चिल्लायकै कहिवे लगे, “जाय क्रूस पै चढाय दै।” 15 तव पिलातुस नें भीड़ कूं खुस करिबे काजै बरअब्बा कूं छोड़ दियौ और ईसू कूं कोड़े लगबायकै क्रूस पै चढ़ाबे काजै सौंप दियौ। सिपाईयों नें ईसू कौ मजाक बनांयौ ( मत्ती 27:27–31 ; यूहन्ना 19:2–3 ) 16 और फिर सिपाही बाय किले के आंगन में लै गये, और बिन्नें सबरी पलटन कूं बुला लियौ। 17 और बिन्नें बाकूं बैंगनी रंग की साही पोसाक उड़ायी और सर पै काँटेन को मुकुट बनांयकें पहनांयौ। 18 और वाकौ मजाक बनांयकें बाते नमस्कार करिवे लगे, “के है यहुदियन के राजा, नमस्कार।” 19 और बे वाकी सर पै सरकन्डे मारते जा रये हते, और बापे थूंक रये हते, और घुटनों के बल झुककै, बे बाय नमस्कार करते जा रये हते। 20 और जब बे वाकौ मजाक उड़ाय चुके, तौ बा पैते साही पोसाक उतारिके फिर ते बायी के कपड़ा पहिनांये, और ईसू कूं क्रूस पै चढायवे काजै बाहर लै गये। ईसू कौ क्रूस पै चढ़ायौ जाबों ( मत्ती 27:32–44 ; लूका 23:26–43 ; यूहन्ना 19:17–27 ) 21 कुरेन को रैहबै बारौ सिमौन नाम को आदमी जो गांम ते आय रहो हतो। बू सिकन्दर और रुफुस को पिता हतो, सिपाइयन नें बाय बेगार में पकरौ कै बू ईसू कौ क्रूस उठकै लै चलै। 22 फिर बे ईसू कूं गुलगत्ता नाम की जगह पै जाकौ मतलब “खोपडी की जगैह हतो” लै लाए। 23 और बे बाकूं मुर नाम की दबाई मिलौ भयौ अंगूर कौ रस पीबे काजै दैवे लगे पर ईसू नें बाय नांय लयौ। 24 और तब बिन्नें ईसू कूं क्रूस पै चढायो और वाके कपड़न कूं परची डारकै बांट लियौ। 25 जब बिन्नें ईसू कूं क्रूस पै चढायो बा समै दिन के नौ बजे हते। 26 और बाको दोस पत्र लिखकै वाके ऊपर लगा दियो गयौ “यहुदीयन का राजा।” 27 और ईसू के संग दो डाँकू क्रूस पै चढाए गये हते एक वाके सीदे हात मांऊ और एक वाके उल्टे हात मांऊ। 28 तब धर्मसास्त्र को बू वचन कै “बु अपराधिन के संग गिनो गयौ पूरौ भयौ।” 29-30 रस्ता में जायवे बारे लोग अपनी सर हिला हिलाय के, “जि कैहकै बाको अपमान कर रये हते के बड़े पिराथना घर के ढायवे बारे और तीन दिन में बनावे बारे क्रूस पैते उतरकै खुद कूं बचा लै।” 31 जाई रीति ते यहुदी पिरधान पुरोहित और सास्त्रन कूं सिखाबे बारेन नें लोगन के संग ईसू की खिल्ली उडाई, और आपस में खिल्ली उडायके के कहते हते के “औरन कूं बचायवे बारौ खुद कूं नांय बचाय सकौ। 32 जि तौ ‘मसीह’ इसरायल कौ राजा है। अब जि क्रूस पैते उतरै तौ हम जि देखकै भरोसौ करें।” और जो डाँकू ईसू के संग क्रूस पै चढ़ाये गये हते बेऊ वाकौ अपमान कर रये हते। ईसू कौ पिरान त्यागबों ( मत्ती 27:45–56 ; लूका 23:44–49 ; यूहन्ना 19:28–30 ) 33 और दुपहर होतई बारह बजे ते तीन बजे तक पूरे देस में अंधेरौ छायौ रयौ। 34 तीन बजे ईसू नें पुकार के कही, “एलोई! एलोई! लामा सबक्तनीं” जाकौ मतलब है, “हे परमेस्वर, हे परमेस्वर, तैने मोय चौं छोड़ दियो?” 35 जि सुनिकै जौरें खड़े लोगन में ते कछुन नें कही, “सुनो! जि एलियाह कूं बुलाय रहो है।” 36 तब एक आदमी भागकें सिरका में डुबोयो भयौ सोख्ता एक सरकन्डे पै रखके लायौ और ईसू कूं चुसायकै कहवे लगे, “रुको, देखें कै जाय नीचे उतारबे एलियाह आवते कै नांय।” 37 तब ईसू नें बड़ी अबाज ते चिल्लायकें अपने पिरान छोड़ दिये। 38 और बड़े पिराथना घर कौ परदा ऊपर ते नीचे तक फटकै दो टुकड़न में है गयौ। 39 जो सूबेदार वाके सामने खड़ो हतो, जब बानें ईसू कूं चिल्लायकें पिरान छोड़ते भये देखौ तौ बानें कही, “सचमुच जि आदमी, परमेस्वर को बेटा हतो।” 40 कछू औरतें दूर ते खड़ी भई जि देख रही हतीं। बिनमें मरियम मगदलीनी और छोटे याकूब की और योसेस की मईया मरियम और सलोमी हती। 41 जब ईसू गलील में हतो तौ जि औरतें वाके संग रैहके वाकी सेबा-टहल करती हतीं औरऊ भौत सी औरतें हतीं जो ईसू के संग येरूसलेम में आई हती। ईसू कौ दफनांयौ जानौ ( मत्ती 27:57–61 ; लूका 23:50–56 ; यूहन्ना 19:38–42 ) 42 जब सन्जा हे गई बू दिनां यहुदिन के आराम दिन ते एक दिन पैहले कौ तैयारी को दिना हतो। 43 अरिमतिया को रैहबै बारो यूसुफ आयौ, बू यहुदी पंचायत कौ सम्मानित सदस्य हतो और परमेस्वर के राज्य के इन्तजार में हतो बू हिम्मत के संग पिलातुस के जौरें गयौ बाते ईसू की ल्हास मांगी। 44 पिलातुसऐ अचम्भौ भयौ, कै बू इतनी जल्दी कैसे मर गयौ और सूबेदार कूं बुलायकै बाते पूछी, “कै का बाकूं मरे भये देर हे गई?” 45 फिर बानें जब सूबेदार ते हाल जान लियो तब यूसुफ कूं ईसू की ल्हास लै जावे की आग्या दै दई। 46 तब बानें एक पतरो मल मल कौ चादर खरीदौ और लास कूं उतार के मलमल के चादर में लपेटौ और एक कब्र में जो चट्टान में खोदी गई हती बामें रख दियौ और कब्र के मौंह पै एक बड़ौ पत्थर लुढकायकै रख दियौ। 47 मरियम मगदलीनी और योसेस की माता मरियम देख रही हती के ईसू कूं कहाँ रखौ गयौ है। |
NonCommercial-NoDerivatives 4.0 International (CC BY-NC-ND 4.0)