1 पतरस 5 - बृज भासापरमेस्वर के पबित्र लोगन की रखबारी 1 तुमारे बीच में जो कलिसिया के अगुवा हैं, मैं बिनते बिनती करुं। मैं खुद एक अगुवा हूं और मसीह ने जौ ताड़ना झेलीऐं, बिनकौ मैं खुद गबाह हूं और वाकी हैबे बारी महिमा कौ संगी हूं। 2 जिन लोगन कौ झुंड तुमकूं परमेस्वर ने दयौए वाके अच्छे रखबारे बनके देखभाल करौ, जि काऊ के दबाब ते मत करौ पर परमेस्वर की इच्छा जानकें अपनी खुद की इच्छा ते करौ, जि काम काऊ धन के लालच की बजैह ते नांय पर सेबा के भाव ते करते रहौ। 3 जो लोग तुमें सौंपे गये हैं बिनपै अपनों अधिकार मत जताऔ, पर बिनके काजै एक नमूना बनों। 4 जब बू पिरधान चराबे बारौ आबैगौ तब तुमें महिमा कौ मुकुट दैबैगौ वाकी चमक कबऊ नां जाबैगी। 5 हे जबानों जाई तरैह ते, तुमऊं कलिसिया के अगुवन की अधीनता कूं मानौ और नरमाई ते एक दूसरे की सेबा करते रैहौ चौंकि “परमेस्वर घमन्डीन कौ बिरोध करै और नरमाई बारेन पै दया करै।” 6 जामारैं तुम अपने आप कूं सर्ब सक्तीमान परमेस्वर के हातन के नीचें नरम बनों तौ बू तुमें सही समै पै बढ़ाबैगौ। 7 तुम अपनी सबरी चिन्ता बापै डार देओ, चौंकि बाय तुमारौ धियानें। 8 साबधान है जाऔ और जागत रैहौ चौंकि तुमारौ बिरोधी सैतान, गर्जबे बारे सेर की तरैह जा ताक में रैहबै कै कब कौन कूं फार खाबै। 9 तुम भरोसे में मजबूत हैकै सैतान कौ सामनों करौ। चौंकि तुम जि जानें के जा संसार भर में तुमारे भईया-बहन जाई तरैह ते ताड़ना झेल रयेऐं। 10 अब परमेस्वर सबरी किरपा करबे बारौ है, जानें तुमकूं ईसू मसीह में कबऊ नांय खतम हैबे बारी महिमा में सामिल हैबे काजै बुलायोऐ, अब थोड़े समै के दुख उठाबे के बाद बू तुमें मजबूत करैगौ और टिके रैहबे में बलबन्त करैगौ। 11 वाकौ राज युगानुयुग तक बनों रैहबै। ऐसौई होय। चिठ्ठी की आखरी बात 12 मैं सिलबानुस कूं भरोसे में अपनों भईया समझूं। तुमारे भरोसेऐ बढ़ाबे काजै परमेस्वर की सच्ची किरपा जेईऐ, जा बात की गबाही दैबे काजै जि चिठ्ठी लिख रयौऊं के तुम जामें मजबूत बने रैहौ। 13 जो बेबीलोन की कलिसिया तुमारी नाईं चुनी भयी हैं बू और मसीह में मेरौ बेटा मरकुस तुमें नमस्कार करें। 14 पिरेम ते एक दूसरे के गले मिलकें नमस्कार करौ। मसीह के सांचे लोग तुमें सान्ती मिलै। |
NonCommercial-NoDerivatives 4.0 International (CC BY-NC-ND 4.0)