मर्कुस 13 - बोटेयेसुइ मन्दिर नास होख्लार बारेमा कताइ ( मति २४:१-२ ; लुका २१:५-६ ) 1 येसु मन्दिरभि निस्कतिहि गर्ते ओख्रो एउटा चेलाइ ओख्राइ कहिक्, “चाहि त गुरु, कत्रो बड्को बड्को पाथरहान र अचम्मको भवनहान।” 2 येसुइ उनहान्के कहिक्, “ज्या ताहान्इ देखिधार्लाटो इथि एउटा पाथरउप्रो आर्को पाथर नाछाडेलार गरि सभइ भत्काहेताइ।” अन्तिम दिनको चिन्हहान ( मति २४:३-१३ ; लुका २१:८-१९ ) 3 अनि येसु मन्दिरको पारोपट्टि जइतुन डाडामा बिसिधार्लो रहिक्। ओइ बेरा पतरुस, याकुब, युहन्ना र अन्दिरियासइ ओख्राइ खुसुक्क सुध्यावाइ, 4 “हाम्राइ कहि त तइ कलो कुराहान कन्हा होख्ताइ? र इ सभइ होख्ते क्या क्या चिन्ह देखेताइ?” 5 येसुइ उनहान्के कहिक्, “होसियार होख्हेउ, कुनुहि ताहान्के झिन झुक्याउस्। 6 धेरे जना मोरो नाउँमा ‘मइ ज खिरिस्ट हो’ कले आउतात् र उनहान्इ धेरे जनाके झुक्यातात्। 7 जब ताहान्इ लडाइ र लड्लो हल्ला सुन्ताओ, तब झिन डराहेउ। यस्नो घटनाहान होखे ज पर्ताइ, तर सन्सारको अन्तिम दिन आए अझइ बाकि ज बाटि। 8 क्यारेकनि जातको बिरुध जात, राज्येको बिरुध राज्ये उठ्ताइ। ठउँ ठउँमा भुकम्पहान जिताइ र अनिकालहान होख्ताइ। इ चाहि बेटिके सुत्केरि होखे लाग्ते दुख सुरु होख्लो जस्ने सङ्कटको सुरु हो। 9 “ताहान आफि होसियार होख्हेउ, क्यारेकनि उनहान्इ ताहान्के अदालतमा लेग्तात्, ताहान सभाघरमा पिटाइ खइताओ। ताहान मोरो कारनइ बड्को-हाकिम र राजाहान्को सामु समेत लेघेताओ। ताहान्इ उनहान्के मोरो बारेमा गवाहि देहेपर्ताइ। 10 तर सन्सारको अन्तिम दिन आएकते पहिलि सभइ जातहान्के नाम्रो खबर पर्चार गरेपर्ताइ। 11 जब मानिसहान्इ ताहान्के छोपिकनि मुद्दा चलातात्, तब ओइ बेरा क्या बोले कहि आघुभि ज चिन्ता झिन गर्हेउ। तर ओइ बेरा ताहान्के ज्या देहेताइ, ओइ बोल्हेउ, क्यारेकनि बोल्लार ताहान नाहो तर पबित्र आत्मा होख्ताइ। 12 ओइबेरा मानिसहान्इ आफ्नो दाजिभाइके मारेके लागि सुम्पिदेतात् र बुबाइ पनि आफ्नो छउना छउनिके ओस्ने ज गर्तात्। छउना छउनिहान्इ पनि आफ्नो आमा बुबाहान्को बिरुधमा उठतात् र उनहान्के मारे लगातात्। 13 अनि मोरो कारनइ गर्ते ताहान्के सभइ जनाइ घिडा गर्तात्, तर अन्तिम सम्म इस्थिर रलार चाहिँ बचाहेताइ।” बड्को सङ्कटको बारेमा ( मति २४:१५-२५ ; लुका २१:२०-२४ ) 14 “जब ताहान्इ नास गर्लार घिन लाग्दो चिजके जाहाँ होखे नापर्लार ठउँमा देख्ताओ (पढ्लारइ बुझुस्), तब यहुदिया इलाकामा होख्लारहान पाहाडपट्टि भागुस्। 15 घरको छतमा होख्लारहान तर नाओघ्रिकनि केइ निस्काए आफ्नो घरभित्र झिनपिसोस्। 16 खेतमा होख्लारहान आफ्नो लुगा लेहे घरमा झिन फर्कुस्। 17 तर ओइबेरामा भारिजिउको बेटि र दुध ख्वाउलाहार आमाहान्के कठइ, बिचरा। 18 यस्नो घटनाहान हिउदमा झिन होखुस् कहिकनि परमेस्वरसिन पर्थना गरो। 19 क्यारेकनि उ समयमा यस्नो बड्को सङ्कट आइपर्ताइ कि परमेस्वरइ गर्लो सिरिस्टिको सुरुभि आन्हा सम्म न यस्नो होख्लाटि, न कन्हुँ होख्ताइ। 20 यदि परमेस्वरइ उ समय नाघटाइदेलो होख्नि त कुनुहुँ पनि मानिस नाबाच्लारिक, तर ओइ छान्लो मानिसहान्को लागि उ समय घटाइदेलाटि।” 21 “उ बेरा कुनुहि ताहान्के ‘चाहो, खिरिस्ट इते बाटि’ वा ‘उते बाटि’ कताइ कनि, ताहान बिस्वास झिनगर्हेउ। 22 क्यारेकनिसिन फटाहा खिरिस्टहान र फटाहा अगमबक्ताहान आउतात्, सकेसम्म उनहान्इ चिन्हहान र अचम्मको धन्दाहान देखाइकनि परमेस्वरइ छान्लोहान्के झुक्यातात्। 23 उसिगर्ते चनाखो होखि बिस्हेउ। चाहो, मइ इ सभइ कुरा ताहान्के पहिलिहि ज कइदेलाटिन।” मानिसको छउना फेरि आउलाहार ( मति २४:२९-३१ ; लुका २१:२५-२८ ) 24 उ समयमा बड्को सङ्कटपाछु घामइ उज्यालो नादिहिकनि अन्धार होख्ताइ र जोनोइ आफ्नो उज्यालो नादेताइ, 25 आकासभि ताराहान खसे लाग्ताइ र आकासमा होख्लो सक्तिहान हल्लेताइ। 26 अनि ओइ समयमा मानिसहान्इ मइ मानिसको छउनाके सक्ति र महिमामा बद्रिमा आइधार्लो देख्तात्। 27 तब मइ स्वर्गदुतहान्के पठातिन र उनहान्इ धर्तिको इ छेउभि आकासको उ छेउसम्म चारेउपट्टिभि परमेस्वरइ छान्लोहान्के बट्याताइ। नेभाराको रुखभि सिखाइक् ( मति २४:३२-३५ ; लुका २१:२९-३३ ) 28 अनि येसुइ अझि कहिक्, “नेभाराको रुखभि केइ कुरा सिखो” ओख्रो डाठभि नयाँ टुसा पल्हाइतिहि गर्ते गर्मिको समय नजिक आउलाटि कहि ताहान्इ थाहा पाउताओ। 29 एस्के ज मइ कलो इ घटनाहान होखिधार्लो ताहान्इ देख्ताओ, तब मइ आउलार समय नजिके बाटि, दइलमा ज बाटि कहि जान्हेउ। 30 साच्चि मइ ताहान्के कतिन, इ सभइ कुरा पुरा नाहोखुनज्यालसम्म इ पुस्ताको मानिसहान नामर्तात्। 31 आकास र धर्ति हटि जिबि, तर मइ कलो बचनहान सधइ रहिरताइ। अन्तिम दिन र समयको बारेमा जाग्गे रहेउ ( मति २४:३६-४४ ; लुका १२:३८-४० ) 32 “अन्तिम दिन र समयको बारेमा बुबाके बाहेक अरु कुन्हुँके थाहा नाटि, न स्वर्गमा होख्लार स्वर्गदुतहान्के न छउनाके। 33 होसियार रहेउ, जाग्गे बिसो र पर्थना गरो, क्यारेकनि उ समय कन्हा आउलार हो, ताहान नाजान्ताओ। 34 मइ मानिसको छउना आउलार दिन त एक जना मानिस परदेस गेलो जस्ने हो। जाएकते पहिलि ओइ आफ्नो नोकरके घरको सभइ धन्दाको जिम्मा दिहिकनि गेटपाल्याके जाग्गे बिसेस् कहिकनि आग्या दिहिक्। 35 उसिगर्ते ताहान पनि जाग्गे रहेउ, क्यारेकनि घरको मालिक ब्यारो कि, आद्धा रात, कि कुख्रा चिच्याइते, कि बेहानि कन्हा आउताइ ताहान नाजान्ताओ। 36 नत्र उ एक्कासि आउते ओइ ताहान्के निदाइधार्लो भेटाबि। 37 ज्या मइ ताहान्के कतिन उ मइ सभइके कतिन, ‘जाग्गे रहेउ।’” |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.