लुका 9 - बोटेयेसुइ बार जना चेलाहान्के प्रचार गरे पठालो ( मति १०:५-१५ ; मर्कुस ६:७-१३ ) 1 येसुइ बार जना चेलाहान्के बोलाइक र उनहान्के सभइ भुतहान निस्कालार र मदाइलोहान्के सन्चो बनालार सक्ति र अधिकार दिहिक्। 2 परमेस्वरको राज्येको बारेमा प्रचार गरे र मदाइलोहान्के सन्चो बनाए पठाइक्। 3 ओइ उनहान्के कहिक्, “ताहान बाटमा जिते भोएके लठ्ठि, झोला, फेर्लार भोटो, पइसा, खइलाहार कुराहान केइपनि आफिसिन झिन लेहेउ। 4 जुन घरमा ताहान्के स्वागत गर्तात्, उ ठउँ नाछाडुनज्याल सम्म ओइ घरमा बिस्हेउ। 5 यदि ताहान्के स्वागत नागर्नि, ओइ सहरभि निस्कते आफ्नो गोडको धुलो ओइथि झारिदेहेउ ओइ परमेस्वरइ गर्लार फइसलाको साछि होख्ताइ।” 6 चेलाहान परमेस्वरको नाम्रो खबर प्रचार गर्तिहि र मदाइलोके सन्चो बनाले गाउँ गाउँ गेहाइ। हेरोद अलमल्ल परिक् ( मति १४:१-१२ ; मर्कुस ६:१४-२९ ) 7 हेरोदइ गालिलमा राज गर्ते, येसुइ गर्लो धन्दाको चर्चा सुनिक, अनि उ अलमल्ल परिक्, क्यारेकनिसिन बप्तिस्मा देलाहार युहन्ना मर्लोभि जिउते होख्लाटि कहिकनि कुन्हुँ कुन्हुँइ कतरहाइ। 8 कुनुहि चाहि एलिया देखापर्लाटि कतरहाइ, अनि अरुकइ पहिलिहिको अगमबक्ताहान मध्य एक जना मर्लोभि जिउते होख्लाटि कतरहाइ। 9 हेरोदइ कहिक्, “युहन्नाको कपार त मइ काटे लगाइन्, तर जख्रो बारेमा मइ धेरे बोलिहान सुन्तिहि बाटिन् उ कुन्को हो?” अनि ओइ येसुके भेट्लार इच्छा गरिक्। येसुइ पाच हजार मानिसके ख्वाउलो ( मति १४:१३-२१ ; मर्कुस ६:३०-४४ ; युहन्ना ६:१-१४ ) 10 येसुइ प्रचार गरे पठालो बार जना पेरेरितहान फर्किसक्लो पाछु उनहान्इ गर्लो सभइ धन्दा येसुके सुनावाइ। ओइ उनहान्के मात्रे लिहिकनि, बेथसेदा सहरको नजिके सुनसान ठउँमा जाइक्। 11 तर इ थाहा पाइकनि धेरे मानिसहान्को भिड ओख्रो पाछु लाग्वाइ। ओइ उनहान्के स्वागत गरिक् र परमेस्वरको राज्येको बारेमा सुनाइक, अनि मदाइलोहान्के सन्चो बनाइक्। 12 घाम बुडे लाग्लो बेरामा बार जना चेलाहान ओख्रोठुँ आइकनि कहाइ, “इ भिडके छुट्टिदिहि। उनहान नजिकेको गाउँमा जाइकनि आफ्नो लागि खइलाहार र सुत्लार चिजहान्को बन्दबस गर्बाइ क्यारेकनिसिन हामि सुनसान ठउँरिमा बाट्हुँ।” 13 तर येसुइ उनहान्के कहिक्, “ताहान्इ ज इनहान्के खाएके लागि देहेउ।” उनहान्इ कहाइ, “हामिसिन जम्मा पाच ओटा रोटि र दुइटा माछो मात्रे बाटि। इ सभइ मानिसहान्के ख्वाएके लागि हामि खइलाहार चिज किनिकनि आने?” 14 उथि बेटा मानिसहान मात्रे पाच हजार जत्का रहाइ। येसुइ चेलाहान्के कहिक्, “इ मानिसहान्के पचास पचास जनाको समुहमा बिसाओ।” 15 अनि चेलाहान्इ ओस्ने गरिकनि मानिसहान्के बिसे लगावाइ। 16 ओख्रो पाछु येसुइ पाच ओटा रोटि र दुइटा माछो लिहिकनि स्वर्गपट्टि चाहातिहि परमेस्वरके धन्येबाद दिहिक्, अनि माछो र रोटि टुक्राइकनि, चेलाहान्के बाडे लगाइक्। 17 सभइ अघाउन्ज्याल खावाइ, र चेलाहान्इ उबर्लो माछो र रोटिको टुक्राहान बट्याते बार ढकिया भरहिक्। येसु कुन्को हो? ( मति १६:१३-२३ ; मर्कुस ८:२७-३३ ) 18 एक दिन येसु अस्करे पर्थना गरिधार्लो रहिक्, चेलाहान ओख्रोसिन रहाइ। अनि येसुइ उनहान्के सुध्याइक, “मानिसहान्इ मराइ कुन्को हो कतात्?” 19 उनहान्इ कहाइ, “कुनुहि बप्तिस्मा देलाहार युहन्ना कतात्, कुनुहि एलिया कतात्, अनि अरुकहान्इ चाहि पहिलि मर्लो कुन्हुँ अगमबक्ताहान मध्यको एक जना जिउते होख्लो हो कतात्।” 20 येसुइ उनहान्के फेरि सुध्याइक, “अनि ताहान्इ चाहि मराइ कुन्को हो कताओ?” पतरुसइ कहिक्, “तइ परमेस्वरइ पठालो खिरिस्ट हो।” येसुइ आफि मर्लार बारेमा कताइ ( मति १६:२०-२८ ; मर्कुस ८:३०-३८ ; ९:१ ) 21 येसुइ उनहान्के आग्या देतिहि कहिक्, “इ बोलि ताहान्इ कुन्हुँके पनि झिनकहेउ।” 22 अनि येसुइ उनहान्के कहिक्, “मानिसको छउनाइ धेरे दुख भोगे पर्ताइ। अगुवाहान, मुख्य पुजारिहान र धर्म गुरुहान्इ ओख्राइ नारुचातात् र मार्तात्, तर तिन दिनमा उ फेरि मर्लोभि जिउते होख्ताइ।” 23 ओइ सभइके कहिक्, “चाहेउ, कुन्हुँ मोरो चेला होखे इच्छा गर्ताइ कनि, ओइ आफिके माया मारुस्, अनि दिन्के आफ्नो कुरुस बोकिकनि, मोरो पाछु लागुस्। 24 क्यारेकनिसिन आफ्नो जिबन बचाए खोज्लारइ जिबन गुमाताइ, तर मोरो लागि आफ्नो जिबन गुमालारइ ओइ आफ्नो जिबन बचाताइ। 25 कुन्हुँ मानिसइ सभइ सन्सारके हत्याइकनि आफ्नो जिबन गुमाताइ कनि ओख्राइ क्या फाइदा होख्ताइ र? 26 यदि कुन्हुँ मानिस मइसिन र मइ सिखालार बोलिसिन लाज मान्ताइकनि, मानिसको छउना पनि परमेस्वर र पबित्र स्वर्गदुतसिन महिमामा आउते ओख्रोसिन लजाइताइ। 27 साच्चि मइ ताहान्के कतिन इथिन ठेढाइलारहान मध्य कुन्हुँ चाहि परमेस्वरको राज्ये नादेखुनज्याल नामर्तात्।” येसुको रुप फेरेलो ( मति १७:१-८ ; मर्कुस ९:२-८ ) 28 इ बोलि कहिसक्लो एक हप्ता पाछु येसुइ पतरुस, युहन्ना र याकुबके आफिसिन लिहिकनि पर्थना गरे पाहाडमा जाइक्। 29 जब ओइ पर्थना गरिधार्लो रहिक्, ओख्रो अनुहारको रुप फेर्हिक् र ओख्रो भोटो हिउ जस्ने उज्रो चम्किलो होखिक्। 30 अनि उथि एक्कासि दुइ जना मानिस देखा पर्वाइ र येसुसिन बोलिधार्लो रहाइ, उनहान मोसा र एलिया रहाइ। 31 उनहान महिमामा देखा पर्लो रहाइ र येसु येरुसलेममा मरे पर्ताइ कहिकनि बोलिधार्लो रहाइ। 32 पतरुस र ओख्रो साखाक्हान मस्त निदाइलो रहाइ, उनहान जाग्ते येसुके महिमामा ओइ दुइ जना मानिसहान्सिन ठेढाइधार्लो देख्वाइ। 33 उ दुइ मानिसहान येसुसिन छुट्टि होखिकनि जाए लाग्ते पतरुसइ येसुके कहिक्, “गुरु, हामि इथि होख्लो पनि नाम्रो होछ! हामि इथि तिनटा छाप्रा बनाहुँ, एउटा तोरो लागि, एउटा मोसाको लागि र एउटा एलियाको लागि।” तर ओइ आफि क्या बोल्लो हो कहि ख्याले नाहोखिक्। 34 पतरुस बोल्तिहि गर्ते बद्रि आइकनि उनहान्के ढाकिक्, र चेलाहान बेस्के डरावाइ। 35 तब बद्रिभि यस्नो बोलि आइक, “इ मोरो छउना हो, एख्राइ मइ चुन्लाटिन एइ कलो मानहेउ!” 36 यस्नो बोलि रोकि सक्लो पाछु उनहान्इ येसुके मात्रे देख्वाइ। अनि चेलाहान लाभि बिस्वाइ र उनहान्इ देख्लो सभइ कुरा उ बेरामा कुन्हुँके पनि नाकहवाइ। येसुइ भुत आत्मा लाग्लो छउडाके सन्चो बनालो ( मति १७:१४-१८ ; मर्कुस ९:१४-२७ ) 37 आर्कना दिन येसु तिन जना चेलाहान्सिन पाहाडभि तर ओघ्रते, एउटा बड्को भिड ओख्राइ भेटे आवाइ। 38 भिडभि एक जनाइ चिच्यातिहि कहिक्, “गुरु! मइ तोरोसिन बिन्ति गर्तिन, मोरो छउनाके चाहिदे क्यारेकनिसिन इ मोरो एउटे छउना हो! 39 ओख्राइ घरि घरि भुत आत्माइ छोप्ताइ अनि एक्कासि चिच्याइले भुइमा उन्डिकनि मुर्छा पर्ताइ, मुखभि गाज झिक्ले लछारपछार गराइकनि बल्लबल्ल छाड्ताइ! 40 मइ तोरो चेलाहान्के भुत आत्मा निस्काए कहि बिन्ति गरिन् तर उनहान्इ नासक्वाइ।” 41 येसुइ कहिक्, “ए बिस्वास नाहोख्लो र भर्म्मा पर्लो मानिसहान हो! मइ ताहान्सिन कत्का दिन सम्म रहुँ? कत्का मइ ताहान्के सहे?” अनि येसुइ छउडाको बुबाके कहिक्, “तोरो छउनाके इथि आन्।” 42 बुबाकइ छउनाके लिहिकनि आउतिहि गर्ते, भुत आत्माइ ओख्राइ उन्डाइकनि अठ्याए लागिक्। तर येसुइ भुत आत्माके हप्काइक, अनि छउडाके सन्चो बनाइकनि बुबाकको जिम्मा लगाइ दिहिक्। 43 सभइ मानिसहान परमेस्वरको सक्ति देखिकनि छक्क पर्वाइ। मानिसहान्इ ओख्रो धन्दा देखिकनि छक्क परिधार्लो बेरा, येसुइ चेलाहान्के कहिक्, येसुइ फेरि आफि मरेलाग्लो बारेमा कहिक् ( मति १७:२२-२३ ; मर्कुस ९:३०-३२ ) 44 “मइ ताहान्के कतिन इ बोलि झिनबिर्साहेउ! मानिसको छउनाके छोपाइकनि मानिसहान्को हातमा देहेताइ।” 45 तर इ बोलि चेलाहान्इ बुझे नासक्वाइ। क्यारेकनिसिन इ बोलि झिन बुझुस् कहिकनि ढाकेलो रहिक्। येसुइ कलो बोलि बिचार गरे नासक्वाइ, क्या कलो हो कहि उनहान सुध्याए डरावाइ। सभइकते बड्को कुनको हो? ( मति १८:१-५ ; मर्कुस ९:३३-४० ) 46 बार जना चेलाहान्को माझोमा सभइकते कुनको बड्को हो कहि भनाभन होखिक्। 47 येसुइ उनहान्को मनको बिचार थाहा पाइकनि, एउटा बच्चाके आनिकनि, आफ्नो छेउमा धरिक, 48 अनि उनहान्के कहिक्, “जुनइ मोरो नाउँमा इ बच्चाके गर्हन गर्ताइ, ओइ मराइ गर्हन गर्ताइ; जुनइ मराइ गर्हन गर्ताइ, ओइ मराइ पठालारके पनि गर्हन गर्ताइ क्यारेकनिसिन ताहान मध्यमा जुन्को सभइकते बिर्झिन बाटि ओइ ज सभइकते बड्को होख्ताइ।” जुन्को ताहान्को बिरोधमा नाटि उ ताहान्को पछमा होख्ताइ ( मर्कुस ९:३८-४० ) 49 तब युहन्नाइ कहिक्, “गुरु, हामि एक जना मानिसके तोरो नाउँमा भुत आत्मा निस्काइ धार्लो देख्हुँ, र हामि ओख्राइ रोक्हुँ, क्यारेकनिसिन उ हाम्रो समुहको नारहिक्।” 50 येसुइ कहिक्, “ओख्राइ झिन रोक्हेउ, क्यारेकनिसिन जुन्को ताहान्को बिरोधमा नाटि उ ताहान्को पछमा होख्ताइ।” सामरिहान्इ येसुको बिरोध गर्वाइ 51 येसु स्वर्ग गेलार बेरा नजिके होख्लोइ, ओइ येरुसलेम जाए ज पर्ताइ कहिकनि बिचार गरिक्। 52 येसुइ खबर लेग्लार मानिसहान्के सभइ चिज तयार गर्तिहि गर्हेउ कहिकनि, उनहान्के सामरिया ठउँको एउटा गाउँमा पठाइक्। 53 तर मानिसहान्इ येसुके स्वागत नागरवाइ, क्यारेकनिसिन येसु येरुसलेमपट्टि जितिहि रहिक्। 54 तब इ देखिकनि ओख्रो चेलाहान याकुब र युहन्नाइ येसुके कहाइ, “पर्भु, स्वर्गभि आगि झारिकनि हामि इनहान्के नास गर्दिहुँ कहि तइ इच्छा गर्तेर?” 55 तब येसु फनक्क फर्किकनि उनहान्के हप्काइक। 56 ओख्रो पाछु येसु चेलाहान्के लिहिकनि आर्के गाउँमा गिहिक। येसुको पाछु भउते तिरे पर्लार मोल ( मति ८:१९-२२ ) 57 उनहान बाटमा भउतिहि गर्ते, एक जना मानिस आइकनि येसुके कहिक्, “तइ जाहाँ जितेर मइ तोरो पाछु पाछु जितिन्।” 58 येसुइ ओख्राइ कहिक्, “स्यालहान्को दुलोहान बाटि, अनि चराहान्को खोताहान बाटि, तर मानिसको छउनाके थकाइ मेटलार ठउँरिसम्म पनि नाटि।” 59 ओइ आर्के मानिसके कहिक्, “मोरो पाछु लाग्हइ।” तर उ मानिसइ कहिक्, “पर्भु, पहिलि मोरो बुबाके गड्काए जाएदे।” 60 येसुइ ओख्राइ कहिक्, “मुर्दारहान्के आफ्ने मुर्दारहान्इ गड्काए देहो। तर तइचाहिँ जाइकनि परमेस्वरको राज्येको प्रचार गर्हइ।” 61 फेरि आर्को मानिसइ येसुके कहिक्, “पर्भु, मइ तोरो पाछु लाग्तिन, तर मराइ आफ्नो घर परिवारसिन छुट्टि लेहे दे।” 62 येसुइ ओख्राइ कहिक्, “हलो जोत्ते पाछु फर्कि चाहालार मानिस परमेस्वरको राज्येको लागि योग्यको नाहोख्ताइ।” |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.