लुका 4 - बोटेसइतानइ येसुके पापमा फसाए खोजिक ( मति ४:१-११ ; मर्कुस १:१२-१३ ) 1 येसु पबित्र आत्माइ भरिकनि यरदन खोलाभि फर्किक्। पबित्र आत्माइ ओख्राइ सुनसान ठउँमा लेगिक्। 2 उथि सइतानइ चालिस दिन सम्म परिछा गरिकनि येसुके पापमा फसाए खोजिक। चालिस दिन सम्म येसुइ केइपनि नाखइलो रहिक्, उसिगर्ते ओइ बेस्के भुखाइलो रहिक्। 3 तब येसुके सइतानइ कहिक्, “तइ परमेस्वरको छउना हो कनि, इसे पाथरके रोटि बने कहि अनि रोटि होख्ताइ।” 4 येसुइ ओख्राइ कहिक्, “धर्मसास्त्रमा यस्के लेखेलाटि, ‘मानिस खइलाहार चिजइ मात्रे नाबाच्ताइ।’” 5 ओख्रो पाछु येसुके सइतानइ डाडामा लेगिकनि एके छिन सन्सारको सभइ राज्येहान देखातिहि येसुके कहिक्, 6 “मइ इ सभइ राज्येको राजा र धन-सम्पतिको मालिक तोर्हाइ बनाए सक्तिन, क्यारेकनिसिन इ सभइ अधिकार मराइ देहेलाटि, जख्राइ देहे मन लाग्ताइ ओख्राइ देहेसक्तिन। 7 मराइ ढोग गर्निसिन इ सभइ तोरो होख्ताइ।” 8 येसुइ ओख्राइ जबाफ दिहिक्, “धर्मसास्त्रमा लेखेलाटि, ‘तइ आफ्ने परमपर्भु परमेस्वरके मात्रे ढोगेस् र ओख्राइ मात्रे मानेस्!’” 9 तब सइतानइ येसुके येरुसलेमको मन्दिरको टुप्पामा लेगिकनि कहिक्, “तइ परमेस्वरको छउना हो कनिसिन इथिभि उफ्रइ, 10 क्यारेकनिसिन धर्म सास्त्रमा यस्के लेखेलाटि, ‘परमेस्वरइ तोर्हाइ बचाए आफ्ने स्वर्गदुतहान्के खटाताइ। 11 तोरो गोड पाथरइ चोट झिनलागुस कहिकनि हातइ छोपिकनि बचात्यास।’” 12 येसुइ जबाफ दिहिक्, “धर्म सास्त्रमा यस्नो कलाटि, ‘तइ आफ्ने परमपर्भु परमेस्वरके परिछा झिनगरेस।’” 13 सइतानइ येसुके परिछा गरिसक्लो पाछु फेरि आर्को मउका नापाउनज्याल सम्म छाडिकनि जाइक्। गालिल ठउँमा येसुको धन्दा सुरु ( मति ४:१२-१७ ; मर्कुस १:१४-१५ ) 14 येसु गालिल फर्किक्, ओख्रोसिन पबित्र आत्माको सक्ति रहिक्। ओख्रो बारेमा चारेउपट्टि खबर फइलिहिक्। 15 ओइ सभाघरहान्मा सिखाए लागिक् र सभइ ओख्रो पर्सम्सा गर्वाइ। नासरतको मानिसहान्को अबिस्वास ( मति १३:५३-५८ ; मर्कुस ६:१-६ ) 16 येसु आफि बड्को होख्लो सहर नासरत आइपुगिक्। सधइ जस्ने ओइ बार्ना दिनमा सभाघर जाइक्, र धर्मसास्त्र पढे ठेढाइक्। 17 ओख्राइ यसइया अगमबक्ताइ लेख्लो किताप पढे दिहिक्। किताप खोलिकनि ओइ यस्नो लेखेलो ठउँ निस्काइकनि पढिक्: 18 “परमपर्भुको पबित्र आत्मा मोरोसिन बाटि, क्यारेकनिसिन गरिबहान्के नाम्रो खबर देहेके मराइ अभिसेक गर्लाटि। थुनेलोहान्के छुटाए, आँखिइ नादेख्लारहान्के देख्लार बनाए, अप्ठ्यारो पर्लोहान्के स्वतन्त्र गराए, 19 र आफ्ने मानिसहान्के मुक्ति देलाहार बेरा आइक कहिकनि प्रचार गरे परमपर्भुइ मराइ पठालाटि।” 20 ओख्रो पाछु येसुइ किताप बन्द गरिक्, र सभाघरमा धन्दा गर्लार मानिसके दिहिकनि बिसिक। सभाघरमा होख्लो सभइ मक्ख होखिकनि ओख्राइ चाइधार्लो रहाइ, 21 अनि ओइ उनहान्के कहिक्, “धर्मसास्त्रको इ बोलि आज ताहान्इ सुन्ते सुन्ते पुरा होख्लाटि।” 22 सभइ मानिसहान्इ ओख्रो पर्सम्सा गर्वाइ र ओइ कलो मिठो बोलि सुनिकनि छक्क पर्तिहि कहवाइ, “इ त योसेफको छउना नाहो र?” 23 येसुइ कहिक्, “मराइ थाहा बाटि, ताहान्इ मराइ इ उखान कताओ, ‘ए डाक्टर, तइ आफिके सन्चो बनाइ। तइ कफर्नहुममा ज्या जत्का धन्दा गरेर् हामिइ सुन्हुँ, उ सभइ आफ्नो सहरमा पनि गरहइ’ कहिकनि ताहान्इ मराइ कताओ।” 24 अनि ओइ कहिक्, “साच्चि मइ ताहान्के कतिन, कुन्हुँ पनि अगमबक्ताके आफ्ने गाउँ सहरमा मानिसहान्इ ओख्रो बोलि नासुन्तात्। 25 मइ ताहान्के साच्चिको बोलि कतिन, एलिया अगमबक्ताको बेरामा साढे तिन बर्स सम्म पानि नापरिकनि बड्को अनिकाल पर्लोरहिक्। उ बेरामा इजराएलमा धेरे बिधुवाहान रहाइ। 26 तर परमेस्वरइ एलियाके उनहान्ठुँ नापठाइकनि सिदोन ठउँरिको सारपत गाउँमा एउटा बिधुवाठुँ मात्रे पठाइक्। 27 एलिसा अगमबक्ता रते इजराएलमा धेरे कुस्टरोगिहान रहाइ, उनहान मध्य कुन्हुँ पनि सन्चो नाबनाहेवाइ तर सिरिया ठउँरिको नामान कलाहार मानिस मात्रे सन्चो बन्नाहिक्।” 28 इ बोलि सुनिकनि सभाघरमा होख्लो सभइ मानिसहान बेस्के रिसावाइ। 29 उनहान उठिकनि, येसुके धेकल्ले सहरभइ बाहिर लेग्वाइ, उनहान्को सहर पाहाडमा रहिक्। उनहान्इ ओख्राइ ढिकभि तर खसाइदेहे खोज्वाइ, 30 तर ओइ मानिसहान्को माझभि छिरिकनि आफ्ने बाट जाइक्। भुत लाग्लो मानिस सन्चो होखिक् ( मर्कुस १:२१-२८ ) 31 येसु गालिल ठउँरिको कफर्नहुम कलाहार सहरमा जाइक्। बार्नाको दिनमा ओइ मानिसहान्के सिखातिहि रहिक्। 32 ओइ सिखालो सुनिकनि उनहान छक्क पर्वाइ, क्यारेकनिसिन ओइ अधिकारसिन सिखातरिक्। 33 सभाघरमा एक जना भुत लाग्लो मानिस रहिक्। ओइ चिच्यातिहि कहिक्, 34 “ए! नासरतको येसु, तइ हाम्राइ क्या गरे लागेर? क्या तइ हाम्राइ नास गरे आउलो हो? मइ तोर्हाइ चिन्तिन। परमेस्वरइ पठालो तइ पबित्र मानिस हो!” 35 येसुइ भुतके हप्कातिहि कहिक्, “चुप लाग! इ मानिसभि निस्कि भाग!” भुतइ ओइ मानिसके सभइ मानिसहान्को आघु पछारिक् र केइ चोट नागरिकनि ओख्रोभि निस्किजाइक्। 36 सभइ मानिसहान छक्क परिकनि बोले लाग्वाइ, “इ मानिसको बोलिमा कस्नो अधिकार र सक्ति होछ, हप्कातिहि भुतहान भाग्तलाइ!” 37 येसुको खबर सहरको चारेउपट्टिको ठउँरिमा फइलिहिक्। येसुइ धेरे मानिसहान्के सन्चो बनाइक् ( मति ८:१४-१७ ; मर्कुस १:२९-३४ ) 38 येसु सभाघरभइ निस्किकनि सिमोनको घर जाइक्। सिमोनको सासुके जरोइ बेस्के थलाह पर्लोरहिक्। मानिसहान्इ, “एख्राइ सन्चो बनाइदिहि” कहिकनि बिन्ति गरे लाग्वाइ। 39 येसु ओख्रो नजिके जाइकनि जरोके हप्काइक र जरोइ छाडिघालिक। उ उठिकनि उनहान्को स्वागत सत्कार गरिक्। 40 घाम बुड्लो पाछु, मानिसहान्इ धेरे मदाइलोहान्के येसुठुँ आन्वाइ। ओइ हरेकको उप्रो हात धरिकनि सभइके सन्चो बनाइक्। 41 धेरे मानिसहानभि भुतहान एस्के चिच्याइतिहि निस्काइ, “तइ परमेस्वरको छउना हो!” तर येसुइ भुतहान्के केइपनि बोले नादिहिक, क्यारेकनिसिन उनहान्इ उ मुक्ति देलाहार खिरिस्ट हो कहिकनि चिन्तरहाइ। यहुदियामा येसुको प्रचार ( मर्कुस १:३४-३९ ) 42 बेहानपख येसु सुनसान ठउँरिमा जाइक्। मानिसहान ओख्राइ खोज्ले, ओख्रोठुँ आइकनि ओख्राइ छेकले कहे लाग्वाइ, “हाम्राइ छाडिकनि झिनजा।” 43 तर येसुइ उनहान्के कहिक्, “मइ परमेस्वरको राज्येको बारेमा, नाम्रो खबर अरु सहरमा पनि सुनाए पर्ताइ, क्यारेकनिसिन मराइ परमेस्वरइ एइ धन्दा गरे पठालो हो।” 44 उसिगर्ते ओइ यहुदिया ठउँको सभाघरहान्मा जाइकनि प्रचार गरे लागिक्। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.