लुका 17 - बोटेपाप र माफ ( मति १८:६-७ , २१-२२ ; मर्कुस ९:४२ ) 1 येसुइ आफ्नो चेलाहान्के कहिक्, “पापमा फसालार परिछाहान आउताइ नइ। तर धिक्कार ओइ मानिसके जुनइ पापमा फसाए खोज्ताइ। 2 जुन मानिसइ बिर्झिनहान मध्य एउटाके पाप गरे लगाताइ। ओख्रो घेच्रोमा झातोको एउटा पाता झुन्डयाइकनि समुन्द्रमा हुर्याइदेनि ओख्रो लागि नाम्रो होख्ताइ। 3 उसिगर्ते होस गर्हेउ! तोरो भइयारइ पाप गर्लो होख्नि ओख्राइ सम्झाहेउ, र ओइ आफ्नो पाप स्विकार गर्नि ताहान्इ माफ गर्देहेउ। 4 यदि तोरो भइयारइ तोरो बिरुधमा दिनमा सात पल्ट पाप गर्ताइ, र पनि साते पल्ट आफ्नो पाप स्विकार गर्तिन कहि तोरोठुँ आउताइ कनि तइ ओख्राइ माफ गर्हेस।” बिस्वास 5 बार जना पेरेरितहान्इ कहाइ, “पर्भु, हाम्रो बिस्वास बढाइदे।” 6 पर्भुइ कहिक्, “भाजिको बिया जत्रे ताहान्को बिस्वास होख्नि पनि इ तुतिको रुखके, ‘तइ उख्रिकनि समुन्द्रमा रोप्हे जा’ कनिसिन, ओइ मान्लारिहिक। नोकरइ गरे पर्लार धन्दा 7 “ताहान्को आफ्नो नोकर खेत जोतिकनि अथवा भेडा चराइकनि घर आउनि, ओइ नोकरके ‘छिटे आइकनि खाए बिस’ कताओ र? 8 क्या ओइ ओख्राइ एस्के ना कबि र? ‘मोरो लागि भात तयार गरेस्, र घल्याक कसइ र मइ नाखाउनज्यालसम्म मराइ पर्खइ। र तइ खाहेस।’ 9 ताहान्को आग्या मान्लो ओइ नोकरके ताहान्इ धन्येबाद देताओ र? 10 उसिगर्ते ताहान्के अर्हालो सभइ धन्दा गरिसक्लो पाछु यस्के कहेउ, ‘हामि त नालाएक नोकर मात्रे बाट्हुँ, हामि आफिइ गरे परलाहार धन्दा गर्लाटाहुँ।’” दस कुस्टरोगिहान सन्चो होख्लो 11 येसु येरुसलेम जितिहि गर्ते सामरिया र गालिल माझको सिमानाभि जाइक्। 12 उ एउटा गाउँमा पिसे लाग्ते दस जना कुस्टरोगिहान्सिन भेट होखिक्। दुस्सिहि ठेढाइतिहि उनहान्इ 13 बेस्के चिच्याइकनि कहाइ, “हे येसु, गुरु, हाम्राइ दया गरि सन्चो बनाइदे।” 14 येसुइ उनहान्के देखिकनि कहिक्, “जाइकनि आफिके पुजारिहान्ठुँ देखाहेउ।” उनहान बाटमा जितेजिते सन्चो होखिघाल्वाइ। 15 तब उनहान मध्यमा एउटाइ आफिके सन्चो होख्लो देखिक्, र बड्को स्वरमा परमेस्वरके पर्सम्सा गर्तिहि फर्किकनि आइक। 16 अनि ओइ येसुको गोडमा घोप्टो पर्तिहि धन्येबाद दिहिक्। उ एउटा सामरि रहिक्। 17 येसुइ कहिक्, “सन्चो होख्लो दस जना रहाइ। अरु नउ जना कते बाटाइ? 18 क्यारे सामरि बाहेक अरुहान फर्किकनि परमेस्वरके पर्सम्सा गरे नाआवाइ?” 19 येसुइ ओख्राइ कहिक्, “उठ, र जा तोरो बिस्वासइ तोर्हाइ सन्चो बनालाटि।” परमेस्वरको राज्ये ( मति २४:२३-२८ , ३७-४१ ) 20 परमेस्वरको राज्ये कन्हा आउताइ कहि फरिसिहान्इ येसुके सुध्यावाइ। येसुइ उनहान्के कहिक्, “परमेस्वरको राज्ये देखेलारगरि नाआउताइ। 21 न त मानिसहान्इ कबाइ, ‘चाहो, इथि बाटि’ वा ‘उथि बाटि’ क्यारेकनिसिन चाहो, परमेस्वरको राज्ये ताहान्के माझोमा बाटि।” 22 अनि येसुइ चेलाहान्के कहिक्, “ओस्नो दिन पनि आउताइ मानिसको छउनाके एके दिन पनि चाहे खोज्ताओ, तर ताहान्इ देखे नापाउताओ। 23 मानिसहान्इ ताहान्के कबाइ, ‘चाहो, उथि बाटि’ वा ‘चाहो, इथि बाटि।’ तर ताहान उनहान्को पाछु झिन जाहेउ। 24 आकासमा बिजुलि चम्कते उज्यालोइ वार पार सभइ देखेताइ, ओस्ने गरि मानिसको छउना आउते पनि ओस्ने गरि देखापर्ताइ। 25 तर इ कते पहिलि मानिसको छउनाइ धेरे दुख भोगे पर्ताइ। र आन्हाको मानिसहान्इ नास्विकारतात्। 26 नोआको बेरामा जस्नो होख्लो रहिक्, मानिसको छउनाको बेरामा पनि ओस्ने होख्ताइ। 27 नोआ पानि जाहाज भित्र पिस्लार दिन सम्म मानिसहान खइतिहि, पिउतिहि, बिहा गर्तिहि र गर्देतिहि रहाइ। तब धर्ति बुडालार बाढि आइक, र उनहान सभइ नास होख्वाइ। 28 अनि लोतको बेरामा पनि मानिसहान खइतिहि, पिउतिहि, किन्तिहि, बेच्तिहि, रोप्तिहि र घर बनालार धन्दा गर्तिहि रहाइ। 29 जब लोतइ सदोम छाडिकनि निस्किक्, ओइदिन ज स्वर्गभि आगिको जोजा र जरिधार्लो पाथर परिक्, र जरिकनि उनहान सभइ नास होख्वाइ। 30 मानिसको छउना फेरि देखा पर्लार दिनमा एस्ने होख्ताइ। 31 “ओइबेरा घरको छतमा होख्लोहान चिजबिज लेहे भित्र झिन जाओस, ओस्ने खेतमा होख्लोहान घर झिन फर्कुस। 32 लोतको दुल्हिके सम्झेउ। 33 आफ्नो जिबन बचाए खोज्लारइ, जिबन गुमाताइ, तर आफ्नो जिबन गुमालारइ, ओइ आफ्नो जिबन बचाताइ। 34 मइ ताहान्के कतिन, ओइ रातमा एउटे ओछ्यानमा सुत्लो दुइ जना मानिसहानमध्य एउटाके लेघेताइ र आर्कोके छाढेताइ। 35 ओस्ने झातो पिसिधार्लो दुइ जना बेटिहानमध्ये एउटाके लेघेताइ र आर्कोके छाढेताइ। 36 [ओस्ने खेतमा दुइ जना कजाइ धार्लो मानिसहानमध्य एउटाके लेघेताइ र आर्कोके छाढेताइ।”] 37 अनि चेलाहान्इ सुध्याइक्, “इ कन्हा होख्ताइ त पर्भु?” येसुइ कहिक्, “जाहाँ डाङ्रा बाटि, उथि गिद्धहान आउताइ नइ।” |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.