लुका 11 - बोटेयेसुइ पर्थना गरे सिखाइक् ( मति ६:९-१३ ; ७:७-११ ) 1 एक दिन येसु एउटा ठउँमा पर्थना गरिधार्लो रहिक्। ओइ पर्थना गरिसक्लो पाछु, ओख्रो एउटा चेलाइ कहिक्, “पर्भु, युहन्नाइ आफ्नो चेलाहान्के पर्थना गरे सिखालो जस्ने, हाम्राइ पनि सिखाहइ।” 2 येसुइ उनहान्के कहिक्, “ताहान्इ पर्थना गर्ते, यस्के कहेउ: “हे हाम्रो बुबा: तोरो नाउँ पबित्र होखुस; तोरो राज्ये आउस्। 3 दिन दिने खइलाहार चिज हाम्राइ सधइ देहेस् 4 हामि गर्लो पापहान माफ गर्देहेस्, क्यारेकनिसिन हाम्रो बिरुधमा पाप गर्लारहान्के पनि हामि माफ गर्ताहुँ। हाम्राइ परिछामा झिनपारेस।” 5 अनि येसुइ चेलाहान्के कहिक्, “मानिलेहो ताहान मध्यमा कुन्हुँको एक जना साखा बाटि। आद्धा रातमा ओइ साखाठुँ जाइकनि कबो, ‘साखा, मराइ तिनटा रोटि पइचो देन। 6 दुस्सिभि मोरो एक जना साखा आउलाटि, ओख्राइ ख्वाएके मोरोसिन केइ चिज पनि नाटि!’ 7 ओइ साखाइ भित्रभि कबि, ‘मइ दइल लगाइ सकिन, मराइ दुख झिनदे! बच्चाहान्सिन मइ सुतिसक्लाटिन। मइ उठिकनि तोर्हाइ केइ देहे नासकतिन्।’” 8 येसुइ उनहान्के कहिक्, “मइ ताहान्के कतिन, ओइ साखा सम्झि केइ नादेबि तर मागि धार्नेसिन ओइ उठिकनि खाचो पर्लो जत्का देबि। 9 मइ ताहान्के कतिन माघेउ, ताहान्के देहेताइ। खोजेउ, ताहान्इ भेटाताओ र ढकढक्याओ ताहान्को लागि दइल खोलेताइ। 10 क्यारेकनिसिन माघ्लारि पाउताइ, खोज्लारइ भेटाताइ र ढकढक्यालारको लागि दइल खोलेताइ। 11 ताहान मध्य कुन बुबा होख्बि छउनाइ माछो माग्ते साँप देबि? 12 वा फुल माग्ते बिच्छि देबि? 13 ताहान ननारो होखिकनि पनि आफ्नो बच्चाहान्के नाम्रो चिज देताओ कनि स्वर्गमा बिस्लार ताहान्को बुबाइ झन माघ्लारहान्के कत्का पबित्र आत्मा देताइ!” येसु र बालजिबुल ( मति १२:२२-३० ; मर्कुस ३:२०-२७ ) 14 भुतइ एक जना मानिसके लटाहा बनाइदेलो रहिक्। येसुइ ओख्रोभि भुत निस्काइदेले बितिके उ मानिस बोले लागिक्। इ देखिकनि भिडको मानिसहान छक्क पर्वाइ, 15 तर उनहान मध्य कुनुहि कहाइ, “इ त भुतहान्को मालिक बालजिबुलको सक्तिभि भुतहान निस्काइ धार्लोटि।” 16 अरुकहान्इ चाहि येसुके परिछा गरे ओख्रोसिन स्वर्गभि एउटा चिन्ह माग्वाइ। 17 उनहान्को बिचार बुझिकनि येसुइ कहिक्, “जुन राज्येमा लडाइ होख्ताइ, उ राज्ये नास होख्ताइ। जुन परिवारमा झगडा होख्ताइ, उ परिवार नास होख्ताइ। 18 यदि सइतानइ पनि आफ्ने बिरोध गर्ताइ कनि ओख्रो राज्ये कस्के टिक्ताइ र? ताहान्इ मराइ भुतको राजा बालजिबुलको सक्तिभि भुत धपाइधार्लो कहिकताओ। 19 मइ बालजिबुलभि भुतहान निस्कातिन कनि ताहान्को चेलाहान्इ कख्रो सक्तिभि उनहान्के निस्कातात् त? ताहान्को आफ्ने चेलाहान्इ ज ताहान्को गल्ति देखाइदेताइ! 20 मइ परमेस्वरको सक्तिभि भुत निस्कातिन कनि आब परमेस्वरको राज्ये ताहान्को माझमा आइसक्लाटि। 21 “हथियार बोक्लो बलियो मानिसइ घरके रुग्निसिन सभइ समान जोघेताइ। 22 तर उ कते बलियो मानिस आउनि ओख्राइ जितिकनि उ भर पर्लो सभइ हथियार र समानहान लुटिकनि लेग्ताइ र आफ्नाइ सघालारहान्सिन बाड्ताइ। 23 “जुन्को मोरो पट्टिनाटि, ओइ मोरो बिरुधमाबाटि, जुनइ मइसिन नाबट्याताइ, ओइ छित्रेयाताइ। भुत आत्मा फर्कि आइक ( मति १२:४३-४५ ) 24 “भुत आत्माके मानिसभि निस्काइ सक्लो पाछु उ थकाइ मारे सुनसान ठउँरि खोज्ले भउताइ तर कतहुँ ठउँरि नापाउते ओइ सोच्ताइ, ‘जुन घरभि निस्किकनि आइन ओइ घरमा फर्किकनि जितिन्।’ 25 जब फर्कि आउते ओइ घर सफा र सिङगारलो भेटाताइ। 26 तब उ जाइकनि अरु आफुकते ननारो सात ओटा भुतहान्के लिहिआउताइ, र भित्र पिसिकनि बिस्ताइ, उ मानिसको अवस्था पहिलिको कतेझन ननारो बनाइदेताइ।” खुसि 27 येसुइ बोल्तिहि गर्ते, मानिसको भिडभि एउटा बेटिइ कहिक्, “धन्येहोस् तोर्हाइ जर्म देलाहार र स्याहार गर्लार आमाके!” 28 तर येसुइ जबाफ दिहिक्, “बरु, उनहान धन्ये हो जुनइ परमेस्वरको बोलि सुनिकनि पालन गर्ताइ!” योनाको चिन्ह ( मति १२:३८-४२ ) 29 येसुको चारेउपट्टि मानिसहान्को भिड बढ्तिहिगिहिक्, ओइ कहिक्, “आन्हाको मानिसहान ननाम्रो बाटाइ इनहान छक्क पार्लार चिन्ह चाहे खोज्तात्, तर अगमबक्ता योनाको चिन्ह बाहेक अरु चिन्ह चाहे नापाउतात्। 30 योना निनबे सहरको मानिसहान्को चिन्ह होख्लो जस्ने आन्हाको मानिसहान्को लागि मानिसको छउना ज चिन्ह होख्ताइ। 31 फइसलाको दिनमा दछिनको सेबा देसको रानिइ ठेढाइकनि आन्हाको मानिसहान्के दोस देखाइदेताइ, क्यारेकनिसिन सोलोमन राजाको ग्यानको बोलि सुनेके धेरे दुस्सिभि उनहान आउलो रहाइ। तर इथि एक जना सोलोमन कते पनि बड्को बाटि। 32 फइसलाको दिनमा निनबे सहरको मानिसहान्इ ठेढाइले आन्हाको मानिसहान्के दोस लगाइदेताइ, क्यारेकनिसिन योनाइ परमेस्वरको बचन प्रचार गर्ते उनहान्इ आफ्नो पाप मानिकनि परमेस्वरपट्टि मन फर्कालो रहाइ। इथि एक जना योना कते पनि बड्को कुन्हुँ बाटि। जिउको बत्ति ( मति ५:१५ ; ६:२२-२३ ) 33 “कुनुहि पनि ढेभ्रि जराइकनि नालोकाताइ, तर भित्र पिस्लार मानिसहान्के उज्यालो होखोस् कहि अल्गो ठउँरिमा धर्ताइ। 34 ताहान्को जिउको ढेभ्रि आँखि हो। ताहान्को आँखि नाम्रो होख्नि, पुरे जिउके उज्यालो होख्ताइ, तर आँखि ननाम्रो होख्नि जिउ अन्धार होख्ताइ। 35 उसिगर्ते होसियार रहेउ, ताहान्मा होख्लो उज्यालो अन्धार झिनहोखोस्। 36 ताहान्को सभइ जिउ उज्यालोमा होख्नि ढेभ्रिको उज्यालो जस्ने ताहान्को जिउ पनि उज्यालो होख्ताइ।” फरिसिहान्के र धर्म गुरुहान्के धिक्कार ( मति २३:१-३६ ; मर्कुस १२:३८-४० ) 37 येसु बोलि सक्लो पाछु एक जना फरिसिइ ओख्राइ आफ्नो घरमा खाए बोलाइक। उसिगर्ते फरिसिको घरमा उ पिसिकनि खाए बिसिक। 38 येसुइ हात नाधोइकनि खाए बिस्लो देखिकनि फरिसि छक्क परिक्। 39 अनि पर्भुइ ओख्राइ कहिक्, “ताहान फरिसिहान बोट्को र थरियाके बाहिर पट्टिभि माझ्लो जस्ने आफिके देखाताउ तर लोभ र ननाम्रो धन्दा ताहान्को भित्र लोकाइलो रताइ। 40 ए मुर्खहान हो! ताहान नाबुझ्ताओ? बाहिरको भाग बनालार परमेस्वरइ भित्रको पनि बनालो नाहो र? 41 ताहान्को भित्र ज्या बाटि ओइ चिज गरिबहान्के दान देहो, र ताहान्को सभइ कुरा चोखो होख्ताइ। 42 “धिक्कार ताहान फरिसिहान्के! परमेस्वरके पुदिना, आरुद र अरु जडिबुटिको दसाङ्स चढाताओ, तर फइसला र परमेस्वरको मायाको वास्ता नागर्ताओ। अरु कुराको साङ् साङ्हे फइसला र माया पनि गर्लार गर्हेउ। 43 “धिक्कार ताहान फरिसिहान्के! सभाघरको बड्को पदमा बिसे र बजारपट्टि अरुकि सम्मान गर्लो चाहाताओ। 44 धिक्कार ताहान्के! ताहान चिनेनासकेलार चिहान जस्ने बाटो। ओइ चिहान उप्रोभि मानिसहान थाहेनापाइ भउतात्।” 45 धर्म नियमको पन्डितहान मध्य एक जनाइ कहिक्, “गुरु, तइ यस्नो बोलिकनि हाम्राइ बेजत गर्तेर।” 46 येसुइ कहिक्, “धिक्कार ताहान धर्म नियमको पन्डित! ताहान्इ मानिसहान्के बोके नासक्लार भारि बोकाताओ, तर ताहान आफि चाहिँ भारिके अङ्ङुरिइ पनि नाछउताओ। 47 धिक्कार ताहान्के! क्यारेकनिसिन ताहान्को पुर्खाहान्इ मार्लो अगमबक्ताहान्को चिहान ताहान्इ बनाताओ। 48 ताहान्को पुर्खाहान्इ गर्लो धन्दाके ताहान्इ सुइकार गर्ताओ, र उनहान्इ मार्लो अगमबक्ताहान्को चिहान ताहान्इ बनाताओ। 49 ओसिगर्ते परमेस्वरको बुद्धिइ पनि कताइ, ‘मइ उनहान्ठुँ अगमबक्ता र पेरेरितहान्के पठातिन उनहान्इ कुन्हुँके मार्तात् र कुन्हुँके चाहि सताइ धार्तात्।’ 50 धर्तिमा पहिलिभि आन्हा सम्म मारेलो अगमबक्ताहान्को दोस लेखाजोखा आन्हाको मानिसहान्इ ज देहेपर्ताइ, 51 मइ ताहान्के कतिन, हाबिल मारेलोभि थान र मन्दिरको पबित्र ठउँरिमा मारेलो जकरिया सम्मको रकतको लेखाजोखा आन्हाको मानिसहान्सिन लेहेताइ! 52 “धिक्कार ताहान धर्म नियमको पन्डितहान्के! क्यारेकनिसिन ताहान्इ ग्यान र बुद्धिको दइल खोल्लार चाबि त धारो, तर आफि चाहि भित्र नापिसो, र अरुकहान्के पनि पिसे नादेहो!” 53 येसु उथिभि जाइक्, धर्म गुरुहान र फरिसिहान्इ ओख्राइ बेस्केबिरोध गर्वाइ र धेरे पर्स्नहान सुध्याए लाग्वाइ, 54 ओख्रो मुखभि केइ गलत कुरा फुतकबि कहि छोपेके दाउ पर्खि बिस्वाइ। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.