पेरेरित 5 - बोटेहननिया र सफिराके दन्ड 1 तर उथि हननिया नाउँको कुन्हुँ एक जना र ओख्रो दुल्हि सफिराइ एक टुक्रा जग्गा बेच्वाइ, 2 र ओइ पइसाभि आफ्नो दुल्हिके थाहा दिहिकनि आलिकता आफिसिन लोकाइकनि धारिक, र अरु पइसा पेरेरितहान्ठुँ आनिक। 3 तर पतरुसइ कहिक्, “ए हननिया, आफ्नो मनमा सइतानके राज गरे दिहिकनि तइ क्यारे पबित्र आत्मासिन फटाहा बोलेर? खेत बेच्लो आलिकता पइसा ताहान्इ क्यारे आफ्ने लागि लोकाइकनि धार्लाटो? 4 क्या जग्गा नाबेचुनज्याल ओइ तोरो आफ्ने नारहिक् र? ओइ बेचिसक्लोपाछु पनि ओइ तोरे अधिकारमा नारहिक् र? एस्नो धन्दा गर्लाहार बिचार तोरो मनमा कस्के आइक? तइ मानिसहान्के मात्रे त नाहो, तर परमेस्वरके ज फटालाटेर।” 5 एस्नो सुन्लार बितिके हननिया भुक्लुक्क उन्डिक र मरिक। इ सुन्लारहान बेस्के डरावाइ। 6 तब तन्हेयारिहान उठिकनि ओख्राइ लुगाइ मेर्वाइ र बोकि बाहिर लेग्वाइ, र गड्कावाइ। 7 ज्या होखिसक्लो रहिक्, ओइथाहा नापाइ लगभग तिन घन्टापाछु ओख्रो दुल्हि पनि भित्र आइक। 8 पतरुसइ ओख्राइ सुध्याइक्, “मर्हाइ कहि, ताहान्इ जग्गा ओत्केमा बेच्लो हो?” अनि ओंइ कहिक्, “अ, ओत्केमा।” 9 तर पतरुसइ ओख्राइ कहिक्, “ताहान्इ पर्भुको आत्माके फटाए कस्के मिलिकनि बिचार गरो? चाहइ, तोरो दुल्हाके गडकालारहान दइलमा ज बाटाइ र उनहान्इ तोर्हाइ पनि गड्काए लेग्तात्।” 10 अनि तुरुन्ते सफिरा पतरुसको गोडपट्टि भुक्लुक्क उन्डिक र मरिक। जब तन्हेयारिहान भित्र आवाइ तब ओख्राइ मोरिसक्लो देखिकनि बाहिर बोकिकनि लेग्वाइ, र ओख्रो दुल्हाको नजिकमा गड्कावाइ। 11 सभइ मन्डलिको मानिसहान र इ कुरा सुन्लार जत्का सभइ बेस्के डरावाइ। पेरेरितहान्भि धेरे जनाको रोग सन्चो होख्लो 12 पेरेरितहान्को हातभि धेरे छक्क पार्लाहार चिन्हहान र अचम्मको धन्दाहान मानिसहान्को माझोमा होखिरलोरहिक, र उनहान सभइ सोलोमनको पेडिमा एके मनको होखिकनि साङ्हे बट्टेतरहाइ। 13 तर बिस्वास नागर्लाहार मानिसहान मध्य कुन्हुँ पनि उनहान्सिन मिले आउलाहार आट नागर्वाइ, तर पनि मानिसहान्इ उनहान्के आदर गर्तरहाइ। 14 र पर्भुमा बिस्वास गर्लाहार बेटा र बेटिहान दोहइ झन धेरे थपेहाइ। 15 पेरेरितको अचम्मको धन्दाइ गर्ते मानिसहान्इ बाट बाटमा मदाइलोहान्के बोकिकनि आन्वाइ, र पतरुस आउते ओख्रो छाया मात्रे होख्नि पनि उनहानमध्ये कुन्हुँ कुन्हुँमा परिकनि सन्चो होखुस कहि ओछ्यान र खाटहानमा उनहान्के सुताइदेतरहाइ। 16 येरुसलेमको चारेउपट्टिको सहरहानभि पनि धेरे मानिसहान्इ मदाइलोहान र दुस्ट आत्माइ सताहेलोहान्के लिहिकनि आउतरहाइ र उनहान सभइ सन्चो होख्तरहाइ। पेरेरितहान्के सतालो 17 तर बड्को पुजारि र उनहान्सिन रलो सभइ (जुन सदुकि दलको रहाइ) जारे ज डाड लागिकनि पेरेरितहान्को बिरुधमा उठ्वाइ, 18 र उनहान्इ पेरेरितहान्के छोपिकनि सार्बजनिक झ्यालखानामा घालिदेहाइ। 19 तर पर्भुको एउटा स्वर्गदुतइ राति झ्यालखानाको दइलहान खोलिदिहिक, र उनहान्के बाहिर आनिकनि कहिक्, 20 “जाओ र मन्दिरमा ठेढाइकनि इ कन्हुँ नासकेलार जिबनको बारेमा सभइ खबर मानिसहान्के सुनाओ।” 21 इ सुन्लोपाछु उनहान एकाबेहानि मन्दिरभित्र पिस्वाइ र सिछा देहे लाग्वाइ। तर बड्को पुजारि र उनहान्सिन रलोहान आवाइ, र माहासभा, मतलब इजराएलिहान्को सभइ सभाको सभइके बोलावाइ र पेरेरितहान्के झ्यालखानाभि आने मानिसहान पठावाइ। 22 तर मन्दिर रुङलाहार मानिसहान्इ उनहान्के झ्यालखानामा नाभेटाते फर्कि आइकनि इ खबर देहाइ, 23 “हामि झ्यालखाना नाम्रोसिन बन्द गर्हेलो र गेटपाल्याहान दइलहानमा ठेढाइधार्लो देख्हुँ, तर हामिइ दइल खोल्ते भित्र कुन्हुँके नाभेटाहुँ।” 24 जब मन्दिरको कप्तान र मुख्य पुजारिहान्इ इ खबर सुन्वाइ, तब एख्रो बारेमा क्या होख्लाहार हो कहि उनहान पेरेरितहान्को बिसयमा अलमल्ल पर्वाइ। 25 ओइबेरा ज कुन्हुँ एक जना आइकनि उनहान्के कहिक्, “चाहो, ताहान्इ जुन मानिसहान्के झ्यालखानामा थुनो उनहान मन्दिरमा ठेढाइकनि मानिसहान्के सिखाइधार्लाटाइ” 26 तब सिपाहिहान्सिन कप्तान जाइकनि उनहान्के जबरजस्ति नागरिकनि आन्वाइ, क्यारेकनिसिन मानिसहान्इ पाथरइ हिर्कातात् कहि उनहान डरावाइ। 27 उनहान्इ पेरेरितहान्के फेरि आनिकनि माहासभाको आघु ठेढावाइ, र बड्को पुजारिइ उनहान्के सुध्याइक्, 28 “हामि ताहान्के इ नाउँमा केइ सिछा नादेहे कडा आग्या देलो रहुँ, तर ताहान्इ आफ्नो सिछाइ सभइ येरुसलेममा फइलाइसको, र ओइ मानिसके मार्लो दोस हाम्राइ लगाए चाहाताओ।” 29 तर पतरुस र पेरेरितहान्इ कहाइ, “हामि मानिसहान्को नाहो तर परमेस्वरको आग्यापालन गरे ज पर्ताइ। 30 हाम्रो बुबा पुर्खाको परमेस्वरइ येसुके मर्लोभि जिउते बनाइक्, जख्राइ ताहान्इ कुरुसमा झुन्डयाइकनि मार्लोरहो। 31 परमेस्वरइ इजराएलिहान्को आफ्नो आफ्नो पाप मानिकनि परमेस्वरपट्टि मन फर्काएके लागि र उनहान्को पापहान्को माफ देहे येसुके अगुवा र मुक्तिदाता बनाइकनि आफ्नो दाहिन्या हातपट्टि आदरको ठउँमा धार्लाटि। 32 इ सभइ कुराको गबाहि देलार हामि बाट्हुँ र परमेस्वरइ आफ्नो आग्यापालन गर्लाहारहान्के देलो पबित्र आत्माइ पनि गवाहि देतिहि बाटि।” 33 जब माहासभाको मानिसहान्इ इ बोलि सुन्वाइ तब उनहान रिसइ भुत होख्वाइ अनि पेरेरितहान्के मारे खोज्वाइ। 34 तर उनहानमध्ये गमलिएल नाउँ होख्लो एक जना फरिसि रहिक्। उ सभइको आदर पाउलो एक जना धर्म गुरु रहिक्। उ माहासभामा उठिकनि पेरेरितहान्के एकछिनको लागि बाहिर जाए आग्या दिहिक्, 35 र ओंइ माहासभाको मानिसहान्के कहिक्, “इजराएलिहान हो, इ मानिसहान्के ताहान्इ क्या गरे आट्लाटो? होसियार होखेउ। 36 क्यारेकनि आजकते पहिलि पनि थुदास कलार मानिसइ मइ पनि बड्को मानिस हो कहि दाबि गर्तिहि आइक, र लगभग चार सय मानिसहान ओख्रो पाछु लाग्लो रहाइ। उ मार्हिक, र ओख्रो पाछु लाग्लाहारहान सभइ छित्रेहाइ र सभइ बेर्थ होखिक्। 37 इ मानिसपाछु गन्तिको समयमा गालिल ठउँको यहुदा कलार आइक, र कत्का मानिसहान्के आफिपट्टि पारिक। उ पनि नस्ट होखिक्, र ओख्राइ मानलाहारहान इतेउते छित्रिहिकनि गेहाइ। 38 उसिगर्ते आन्हासम्मको इ मामलामा मइ ताहान्के कतिन, कि इ मानिसहान्को बिरोधमा केइ पनि झिनगरो, र इनहान्के छाडिदेहो, क्यारेकनि इनहान्को इ योजना अथवा इ धन्दा मानिसहान्भि होछ कनि उ आफि मेट्हेताइ। 39 तर यदि इ परमेस्वरभि हो कनित ताहान्इ एख्राइ रोके नासक्ताओ, बरु ताहान परमेस्वरको बिरुधमा उठ्लो ठहरेताओ।” 40 तब माहासभाको मानिसहान्इ गमलिएलको सल्लाहा मान्वाइ। अनि उनहान्इ पेरेरितहान्के भित्र बोलाइकनि कोर्राइ पिटातिहि “येसुको नाउँमा झिनबोल्हेउ” कलार कडा आग्या दिहि उनहान्के छाडिदेहाइ। 41 तब येसुको नाउँमा कस्ट र बेजत सहे योग्यको परमेस्वरइ ठहराइक कलार कुरामा आनन्द मनातिहि उनहान माहासभाको उपस्थितिभि निस्किकनि गेहाइ। 42 अनि हरेक दिन उनहान मन्दिरमा र घर घरमा जाइकनि येसु ज खिरिस्ट रहिक् कहि सिखाए र प्रचार गरे नाछाड्वाइ। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.