पेरेरित 28 - बोटेपावल माल्टा ठुठिमा 1 हामि नाम्रोसिन पाखामा आइसक्लोपाछु ओइ ठुठिको नाउँ माल्टा होछ कलार हाम्राइ थाहा होखिक। 2 उ ठुठिमा बिस्लार मानिसहान्इ हाम्राइ जारे ज दया देखावाइ। पानि परिकनि जाडो होख्लो कारनइ उनहान्इ आगि जरावाइ, र हामि सभइके स्वागत गर्वाइ। 3 पावलइ एक भारि दाउरा बट्यालो रहिक् र ओइ दाउरा आनिकनि आगिमा घाले लाग्ते। आगिको राफइ एउटा बिखालु साँप निस्किकनि आइक, र ओख्रो हातमा मेर्हिक र टोकिक। 4 उथि बिस्लार मानिसहान्इ पावलको हातमा साँप मेर्हेलो देखिकनि एक आर्काके कहे लाग्वाइ, “इ मानिस पक्का ज्यानमारा होखेपर्ताइ। इ समुन्द्रभि बाचिकनि त निस्किक् तर फइसला गर्लार देबिको दन्डभि भागे नासकिक।” 5 तर पावलइ चाहिँ ओइ साँपइ टोके नापाउतिहि आगिमा झट्कारिदिहिक, अनि पावलके केइ पनि नाहोखिक। 6 तर पावलको जिउ फुल्ताइ, अथवा उ एक्कासि उन्डिकनि मर्ताइ कहि उनहान्इ रुङ्गे लाग्वाइ। तर धेरे बेरसम्म रुङ्गिधार्ते पनि ओख्राइ केइ नाहोख्लो देखिकनि उनहान्इ आफ्नो बिचार फेरिकनि कहे लाग्वाइ, “इ त देउता पो होछ।” 7 ओइ ठुठिको पब्लियस नाउँ होख्लो मुखियाको जग्गाजमिन ओइ ठउँको छेउछाउमा रहिक्। ओइ हाम्राइ आफ्नो घरमा लेगिकनि स्वागत गरिक्, र तिन दिनसम्म हाम्रो सेवा गरिक्। 8 ओइ बेरामा पब्लियसको बुबा जरो र आउँको रोगइ मदाइलो रहिक्। पावल ओख्राइ चाहे गिहिक, र ओख्रो लागि पर्थना गरिक् र आफ्नो हात ओख्रो उप्रो धारि ओख्राइ सन्चो बनाइक्। 9 एस्के सन्चो होख्लो थाहा पाइकनि ओइ ठुठिको अरु रोगि मानिसहान पनि आवाइ, र सन्चो बनाहेवाइ। 10 उनहान्इ धेरे किसिमइ हाम्रो आदर गर्वाइ। जब हामि पानि जाहाजमा चढ्हुँ, उनहान्इ हाम्राइ चाहेलो चिजहान पानि जाहाजमा घालिदेहाइ। माल्टा ठुठिभि रोम सहर 11 हामि तिन महिनापाछु पानि जाहाजमा चढि माल्टा ठुठिके छाडिकनि गिहुँ। ओइ पानि जाहाजचाहिँ अलेक्जेन्डरिया सहरभि आइकनि जाडो मउसमभरि माल्टा ठुठिमा रहिक्। पानि जाहाजको कपारमा जेयउल्याहा देउताको मुर्ति बनाहेलो रहिक्। 12 हामि सुराकुसाइ कलार सहरमा पुगिकनि उथि तिन दिनसम्म बिस्हुँ। 13 उथिभि भोइसक्लोपाछु हामि रेगियन कलार सहरमा पुग्हुँ। र एक दिनपाछु दछिनभि बतास चलिक र काल्हेकपल्ट हामि पटिओलि कलार सहरमा आइपुग्हुँ। 14 उथि हामिइ केइ बिस्वासि दाजिभाइहान्के भेटाहुँ, र उनहान्इ हाम्राइ एक हप्तासम्म उनहान्सिन साङ्हे रहेके बिन्ति गर्वाइ। उसिगर्ते हामि उथि एक हप्तासम्म बिस्हुँ र पइदले रोम सहरपट्टि लाघ्हुँ। 15 होवाँभि हामि आउतिहि गर्लो खबर रोमको बिस्वासि दाजिभाइहान्इ सुन्वाइ र हाम्राइ भेटे अप्पियसको बजार र तिन पाटि कलार ठउँमा आवाइ। उनहान्के देखिकनि पावलइ परमेस्वरके धन्येबाद चढाइक, र आट पाइक। रोम सहरमा पावलको प्रचार 16 जब हामि रोम सहरमा पिस्हुँ, तब एक जना सिपाहिको हेरचाहामा अस्करे बिसे पावलइ अनुमति पाइक। 17 तिन दिनपाछु पावलइ उथिको यहुदिहान्को अगुवाहान्के बोलाएपठाइक। उनहान बट्टिसक्लोपाछु ओंइ उनहान्के कहिक्, “दाजिभाइ हो, मइ त आफ्नो जातको मानिसहान, अथवा बुबा पुर्खाको रितिरिवाजको बिरुधमा केइ पनि नागर्लो रहिन। र पनि उथिको यहुदिहान्इ बन्दि बनाइ येरुसलेमभि रोमिहान्को हातमा मर्हाइ जिम्मा लगाइ देहाइ। 18 उनहान्इ सोधपुछ गरिसक्लोपाछु मइमा मिर्तुदन्डको केइ कारन नाभेटाते मर्हाइ छाडिदेलाहार मन गर्लो रहाइ। 19 तर यहुदिहान्इ मोरो बिरुधमा दोस लगालो कारनइ मोरो फइसला रोमि बड्को राजाइ गरुस् कहि बिन्ति गरे मर्हाइ करे परिक। र पनि मइ आफ्ने जातको बिरुधमा केइ दोस लगालार कुरे नारहिक्। 20 उसिगर्ते मइ ताहान्सिन भेटिकनि कुराकानि गरे ताहान्के बोलालो हो। क्यारेकनिसिन इजराएलिहान्इ आस गरिकनि बिस्लो मुक्ति देलाहार राजाके मइ बिस्वास गर्लो कारनइ इ सिकरिमा मइ बाधेलाटिन।” 21 उनहान्इ ओख्राइ कहाइ, “हामिइ त तोरो बारेमा यहुदिया इलाकाभि केइ चिट्ठि नापाउलाटाहुँ। कुन्हुँ दाजिभाइहान्इ उथिभि आइकनि तोरो बिरुधमा केइ ननाम्रो कुरा नासुनालाटाइ र नाबोल्लाटाइ। 22 तर तोरो बिचार क्या हो, ओइ तोरोभि सुने चाहाताहुँ। क्यारेकनि तोरो दलको बारेमा हाम्राइ एत्के मात्रे थाहा बाटि, कि जतेतते मानिसहान्इ एख्रो बिरुधमा मात्रे बोल्तात्।” 23 तब उनहान्इ पावलके भेटेके लागि एक दिन तोकिदेहाइ, र धेरे सङ्ख्यामा मानिसहान ओख्रो डेरामा आवाइ। अनि पावलइ उनहान्के बेहानभि ब्यारोसम्म सिखाइक्, र मोसाको धर्म नियम र अगमबक्ताहान्को कितापभि परमेस्वरको राज्यको बारेमा बुझातिहि उनहान्के येसुमा ज बिस्वास गरो कहि उनहान्के कहिक्। 24 ओंइ कलो बोलि कत्काइ बिस्वास गर्वाइ त, कत्काइ नागर्वाइ। 25 उनहान्को एक आर्कामा कुरा नामिलिकनि उथिभि भोए लाग्ते पावलइ अन्तिम कुरा कहिक्, “ताहान्को बुबा पुर्खाके यसइया अगमबक्ताभि पबित्र आत्माइ कलो बचन ठिके रहिक्। 26 इ मानिसहान्ठुँ जाइकनि कहो, “‘सुने त ताहान्इ सुन्ताओ, तर कन्हुँ नाबुझ्ताओ, चाहे त चाहाताओ, तर कन्हुँ नादेख्ताओ, 27 क्यारेकनिसिन इ मानिसहान्को मन बोधो होख्लाटि, र उनहान्को कान बइरो होख्लाटि, र उनहान्इ आफ्नो आँखि बन्द गर्लाटाइ। नत्र उनहान्इ आँखिइ देख्लाराइ, कानइ सुन्लाराइ, र मनइ बुझ्लाराइ, र आफ्नो मन मइ पट्टि फर्कलाराइ, र मइ उनहान्के सन्चो बनालारिन।’” 28 अन्तिम्मा पावलइ कहिक्, “उसिगर्ते ताहान्के थाहा होखुस्, कि परमेस्वरको इ मुक्ति अरु जातहान्को लागि पठाहेलाटि, र उनहान्इ सुन्तात्।” 29 [अनि पावलइ इ बचन कहिसक्लोपाछु, यहुदिहान एक आर्कामा धेरे भनाभन गर्तिहि उथिभि गेहाइ।] 30 पावल पुरा दुइ बर्ससम्म आफ्ने खर्चमा रोम सहरमा बिसिक, र ओख्रोठुँ आउलारहान सभइके ओंइ स्वागत गरिक्। 31 पावल केइ डर नामानि निर्धक्कसिन र बिनारोकटोक परमेस्वरको राज्यको प्रचार गर्तरहिक, र पर्भु येसु खिरिस्टको बारेमा सिखातरहिक्। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.