पेरेरित 24 - बोटेपावल बड्को हाकिम फेलिक्सको आघु 1 पाँच दिनपाछु बड्को पुजारि हननिया र केइ अगुवाहान र तर्तुल्लस नाउँ होख्लो एक जना वकिलके लिहिकनि कइसरिया सहरमा आवाइ, र उनहान्इ पावलको बिरुधमा हाकिमठुँ मुद्दा पेस गर्वाइ। 2 जब पावल उथि बोलाहिक तब तर्तुल्लसइ पावलके दोस लगातिहि फेलिक्सके कहिक्, “माननिय फेलिक्स, तोरोभि हामिइ बड्को सान्ति अनुभव गरिधार्लाटाहुँ, र तइ इ देसको लागि सुधारहान सुरु गर्लाटेर। 3 हामि इ कुराके सभइ ठउँमा र जन्हा पनि धन्येबादसिन सुइकार गर्ताहुँ।” 4 तोरो समय धेरे लेहे नाचाहातिन हाम्रो केइ कुरा सुनिदे कहिकनि बिन्ति गर्तिन। 5 “क्यारेकनि हामिइ इ मानिसके जतेतते दुख दिइभउलाहार, सन्सारभरिको सभइ यहुदिहान्को माझोमा आन्दोलन मच्चालाहार, र नासरि दलको मुख्य अगुवाको रुपमा भेटालाटाहुँ। 6 इ मानिसइ मन्दिर अपबितर् पारे पनि कोसिस गर्लो रहिक्, तर एख्राइ हामिइ छोप्हुँ। [हाम्रो धर्म नियम अनुसार फइसला गरिकनि सजाए देहे बिचार गर्लो रहुँ, 7 तर सेनापति लुसियसइ हामिठुँ आइकनि जबरजस्तिसिन ओख्राइ हाम्रो हातभि लुटिकनि लेगिक्, 8 र एख्रो बिरुधमा दोस लगालाहारहान्के तोरोठुँ आए आग्या गरिक्] आब तइ आफिइ एख्राइ सुध्यानि हामिइ एख्राइ लगालो दोसको सभइ कुराहान ओख्रोभि थाहा पाउतेर्।” 9 उथि होख्लो अरु यहुदिहान्इ पनि इ कुराहान ठिक हो कहि सहमत होख्वाइ। फेलिक्सको आघु पावलको बचाउको माग 10 तब बड्को हाकिमइ पावलके बोले इसारा गर्लोपाछु पावलइ एस्के कहिक्, “तइ धेरे बर्सभि देसको न्यायधिस होख्लो कुरा थाहा होख्लो कारनइ मइ आफिके बचाए हउसला बढ्लाटि। 11 तइ आफिइ पनि पत्ता लगाए सक्तेर मइ येरुसलेममा पुजा गरे गेलो बार दिनकते धेरे नाहोख्लाटि। 12 इनहान्इ न त मर्हाइ कुन्हुँ मानिससिन भनाभन गरिधार्लो भेटावाइ, न मन्दिरमा वा सभाघरमा अथवा सहरमा जनताहान्के उस्काइ धार्लो भेटावाइ, 13 न त मर्हाइ आन्हा दोस लगाइधार्लो कुराको इनहान्इ सबुत देहे सक्तात्। 14 तर मइ इ कुरा तोरो आघु सुइकार गर्तिन, जुन मुक्ति पाउलार बाटके इनहान्इ गलत कतात्, ओइ अनुसार धर्म नियममा होख्लो कुरा र अगमबक्ताको कितापमा लेखेलो सभइ कुरा बिस्वास गरि बरु हाम्रो पुर्खाहान्को परमेस्वरको पुजा मइ गर्तिन। 15 धर्मि र अधर्मिहान दोहइ मर्लोभि जिउते होख्तात् कलार इनहान्इ आफिइ सुइकार गर्लो जस्ने, मइ पनि परमेस्वरमा आस गर्तिन। 16 उसिगर्ते परमेस्वर र मानिसहानको आघु मइ निर्दोस जिबन जिए कोसिस गर्तिन। 17 “धेरे बर्सपाछु मइ आफ्नो जातको गरिब मानिसहान्को लागि दान देहे र परमेस्वरके भेटि चढाए मइ येरुसलेममा आउलो रहिन। 18 यसियाको केइ यहुदिहान्इ मर्हाइ मन्दिरमा दान देते भेटाते मइ चोक्खेलार बिधि पुरा गरिसक्लो रहिन। र उथि कुन्हुँ भिड नारहिक्, हुल दङ्गा पनि नारहिक्, 19 तर उथि यसियाको यहुदिहान्भि केइ मानिस इथि तोरो सामुन्नेमा आए पर्लाहार। र मोरो बिरुधमा यदि केइ कलार कुरा होख्नि उनहान्इ दोस लगाए सक्लारहाइ। 20 नाहोख्नि इथि रलाहारहान्इ आफि ज कहुस्, मइ माहासभाको आघु ठेढाइते मइमा क्या गल्ति भेटालो रहाइ? 21 एइ एउटा कुरामा मात्रे हो, जुन मइ उनहान्को माझोमा ठेढाइकनि बड्को सोरमा चिच्याइकनि कलो रहिन, ‘मर्लोहान्को जिउते होख्लारको बारेमा आज ताहान्को आघु मोरो मुद्दा चलिधार्लाटि।’” 22 फेलिक्सके इ मुक्तिको बाटको बारेमा नाम्रोसिन थाहा होख्लोइ ओंइ इ कुराहान सुन्लोपाछु उनहान्के यस्नो कहि टारिकनि पठाइदिहिक, “सेनापति लुसियस इथि आउलोपाछु मइ ताहान्को मुद्दा फइसला गर्देतिन।” 23 ओख्रोपाछु ओंइ पावलके रुङ्गे, तर ओख्राइ कडा नागरे र ओख्राइ चाहेलार कुराहान पुगाए साखाहान्के झिन रोक्हेउ कहि कप्तानके आग्या दिहिक्। फेलिक्स र दुर्सिल्लाको आघु पावल 24 केइ दिनपाछु फेलिक्स आफ्नो यहुदि दुल्हि दुर्सिल्लाके साङहे लिहिकनि आइक, र ओंइ पावलके बोलाइकनि येसु खिरिस्टको बिस्वासको बारेमा ओख्रोभि सुनिक। 25 जब पावलइ धर्मि होखिकनि धन्दा गरे पर्ताइ, आफ्नो मनके अधिनमा धारे पर्ताइ र भबिस्यमा आउलार परमेस्वरको फइसलाको बारेमा बोल्ते फेलिक्स आतिकनि कहिक्, “आन्हाको लागि जा, मउका मिल्लार बेरामा मइ तोर्हाइ बोलाबिन।” 26 तर पावलभि केइ पइसा पाउतिन कि कलार ओंइ आस गर्लो रहिक्। उसिगर्ते ओंइ पावलके घरि घरि बोलाइकनि कुरा गर्तरहिक। 27 तर दुइ बर्सपाछु जब फेलिक्सको साटोमा पर्किअस फेस्तस आइक, तब फेलिक्सइ यहुदिहान्के खुसि पारेके लागि पावलके झ्यालखानामा ज छाडिकनि गिहिक। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.