पेरेरित 12 - बोटेपतरुस झ्यालखानामा 1 उ दिनमा हेरोद राजा अग्रिपाइ मन्डलिको केइ बिस्वासिहान्के छोपिकनि सताए लागिक। 2 ओंइ युहन्नाको दाजि याकुबके तरवारइ मारिक। 3 इ धन्दाइ यहुदिहान खुसि होख्लो देखिकनि पतरुसके पनि छोपे तरखर गरिक्। इ घटना अखमिरि रोटिको चाडको बेरामा होख्लो रहिक्। 4 हेरोदइ पतरुसके छोपिकनि झ्यालखानामा थुनिदिहिक, र पतरुसके रुङ्गेके लागि चार चार जना सिपाहिहान्के चार टोलि बनाइकनि जिम्मा दिहिक्। छुटकाराको चाडपाछु पतरुसके जनताको आघु आने बिचार रहिक्। 5 एस्के पतरुसके सिपाहिहान्इ झ्यालखानामा रुङिरलो बेरा ओख्रो लागि मन्डलिइ परमेस्वरके पुरे जोससिन पर्थना गरिधार्लो रहिक्। झ्यालखानाभि पतरुस छुट्लो 6 हेरोदइ पतरुसके जनताको आघु आने खोज्लो रात, पतरुस दुइटा सिकरिइ बान्हेले दुइ जना सिपाहिहान्को माझोमा सुतिधार्लो रहिक्। सिपाहिहान पनि दइल आघु ठेढाइकनि झ्यालखानाके रुङ्गि धार्लो रहाइ। 7 तब एक्कासि पर्भुको एउटा स्वर्गदुत उथि देखा परिक्, र कोठामा ज्योति उज्यालो होखिक अनि स्वर्गदुतइ पतरुसको कोखामा हिर्काइकनि “छिटो उठ” कहिकनि ओख्राइ जगाइक। तब सिकरिहान ओख्रो हातभि खुलिकनि खसिक। 8 स्वर्गदुतइ पतरुसके कहिक्, “घल्याक कसहइ, र जुता लगाहइ।” तब ओंइ ओस्ने गरिक्। स्वर्गदुतइ ओख्राइ कहिक्, “पछेउरा ओडिकनि मोरो पाछु पाछु लाग।” 9 अनि पतरुस स्वर्गदुतको पाछु पाछु झ्यालखानाभि निस्किकनि बाहिर आइक। स्वर्गदुतइ गर्लो कुरा साच्चिके हो कलार कुरा ओख्राइ थाहा नाहोखिक। तर दर्सन देख्तिहिँ बाटिन कहि ओंइ ठानिक। 10 जब पहिलो र दोस्रो रुङ्गलार टोलिको नजिकेभि सहरमा पिस्लाहार फलामको गेटमा उनहान पुग्वाइ, तब उ गेट आफि खुलिक, र उनहान बाहिर निस्किकनि एउटा गल्लिको बाट होख्तिहि गेहाइ, र तुरुन्ते स्वर्गदुतइ पतरुसके छाडिकनि जाइक्। 11 जब पतरुसको होस खुलिक तब ओंइ कहिक्, “आब मर्हाइ साच्चि थाहा होखिक, पर्भुइ आफनो स्वर्गदुत पठाइकनि हेरोद राजाको हातभि, र यहुदिहान्इ ज्या गरे खोज्लो रहाइ उ सभइभि मर्हाइ छुटकारा दिहिक्।” 12 इ कुरा ओख्राइ थाहा होखिसक्लोपाछु उ मर्कुस कलार युहन्नाको आमा मरियमको घरमा जाइक्। उथि धेरे जना मानिसहान बट्हिकनि पर्थना गरिधार्लो रहाइ। 13 पतरुसइ गेट ढक्ढक्याते रोदा नाउँ होख्लो नोकरनि चाहे आइक। 14 जब पतरुसको सोर चिनिसक्लोपाछु तब उ धेरे खुसि होख्तिहि दइल नाखोलि भित्र दुगर्ले जाइक् “पतरुस दइलमा ठेडाइधार्लाटि” कहि खबर गरिक्। 15 तर उनहान्इ ओख्राइ कहाइ, “तइ बउलहि हो।” तर ओंइ कलो बोलि साच्चि हो कहि ओंइ जिद्दि गरिक्। उनहान्इ कहाइ, “उ ओख्रो स्वर्गदुत होख्बि।” 16 तर पतरुसइ चाहिँ लगातार ढक्ढक्याइधारिक। गेट खोल्ते ओख्राइ देखिकनि उनहान छक्क पर्वाइ। 17 पतरुसइ “लाभि रहेउ” कहि हातइ इसारा गरिक्, र पर्भुइ ओख्राइ कस्के झ्यालखानाभि बाहिर निस्कालो कुरा उनहान्के कहिक्। इ कुराको खबर याकुब र अरु बिस्वासि दाजिभाइहान्के देहे कहिकनि उ छुट्टि होखिकनि आर्के ठउँमा जाइघालिक। 18 उज्यालो होखिसक्लोपाछु पतरुसके क्या होखिक कहि सिपाहिहान्को माझोमा बड्को हल्ला खल्ला होखिक। 19 हेरोदइ पतरुसके खोज्ते पनि नाभेटाते रुङलाहार सिपाहिहान्के सोधपुछ गरिक् र जबाफ नापाउते उनहान्के मिर्तुदन्डको हुकुम गरिक्। ओख्रोपाछु हेरोद यहुदिया छाडिकनि कइसरिया सहरमा जाइकनि ओइथि बिसिक। हेरोद राजा मर्लो 20 उ बेरामा हेरोद राजा टुरोस र सिदोनको मानिसहान्सिन जारे ज रिसाइलो रहिक्। उसिगर्ते उ दुइ सहरको मानिसहान एकजुट होखिकनि हेरोद राजाके भेटे गेहाइ, क्यारेकनि खइलार चिजहान सभइ ओख्रो देसभि उनहान्इ लेग्तरहाइ। उनहान्इ राजाको आफ्ने धन्दा गर्लार बलस्तस नाउँ होख्लो मानिसके आफिपट्टि मिलाइकनि राजासिन मिलेके लागि भेट गर्लार कुरा गरिक्। 21 अनि तोक्लो दिनमा राजाइ लगालाहार लुगा लगाइकनि राजा बिस्लार ठउँमा हेरोद राजा बिसिक, र ओंइ मानिसहान्के भासड देहे लागिक। 22 मानिसहानइ, “इ त मानिसको बोलि नाहो, देउताके बोलि हो।” कहि चिच्यावाइ। 23 तर हेरोदइ परमेस्वरके पर्सम्सा नागर्लो कारनइ ओइबेरा पर्भुको एउटा स्वर्गदुतइ ओख्राइ हिर्काइक, र बुसुक बुसुक किरा फरिकनि उ मरिक्। 24 तर परमेस्वरको बचन फइलेले गिहिक र बिस्वासिहानको सङ्ख्या बढ्ले गिहिक। 25 जब बारनाबास र साउलइ येरुसलेममा पइसा साहेता गरिकनि फर्कवाइ तब उनहान्सिन मर्कुस कलार युहन्ना पनि जाइक्। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.