२ तिमोथि 4 - बोटेपावलइ तिमोथिके नाम्रो खबर प्रचार गरे कलो 1 परमेस्वरको आघु र मर्लो अनि जिउतेहान्को फइसला गर्लार खिरिस्ट येसुको आघु, खिरिस्ट येसु फेरि आउलार समय र ओइ राज्ये गर्लार कुराके बिचार गरिकनि मइ तोर्हाइ इ कडा आग्या देतिन, 2 नाम्रो खबर पर्चार गर्हइ, जुन सुके समयमा पनि नाम्रो खबर सुनाएके लागि तयारि रहेस्, इस्थिर होखिकनि अर्ति देहइ, ढोढाहइ, हउसला देहइ र सिछा देलार कुरामा झिनचुक्हेस्। 3 क्यारेकनि एस्नो समय आउताइ कि मानिसहान्इ सत्य कुराके नारुचातात् बरु आफिके सुने मन पर्लो कुरा मात्रे रुचातात् र ओस्ने मास्टरहान बट्यातात्। 4 फेद्रा न टुप्पाको कुरापट्टि लागिकनि सत्य कुरा सुने मन नापरातात्। 5 तर तइ चाहिँ ख्याल गर्हेस्। दुख सहेस् र नाम्रो खबर पर्चारको धन्दा गर्हेस, अनि तइ आफि पाउलो परमेस्वरको सेवाको धन्दा पुरा गर्हेस्। 6 क्यारेकनि मइ त सन्सारभि गेलाहार बेला नजिक आइसकिक्, मइ भोगको रुपमा सुम्पेहे लाग्लाटिन। 7 मइ त बिस्वासमा नाम्रोसिन दुग्रेलाटिन र ओख्राइ पुरा गर्लाटिन। अनि बिस्वासके बचाइधार्लाटिन। 8 आब मइ परमेस्वरइ देलाहार धर्मिको मुकुट लेलार बेला आउलाटि। उ मुकुट ठिकसिन फइसला गर्लार पर्भुइ ठिक समयमा मर्हाइ देताइ। इ मुकुट मर्हाइ मात्र नाहो, तर ओख्रो बाटमा नाम्रोसिन भउले ओख्रो बाट चाहालार सभइ धर्मि मानिसहान्के देताइ। पावलइ तिमोथिके छिटे मोरोठुँ आइ कलो 9 तइ मर्हाइ भेटे छिटे आए कोसिस गर्हेस्। 10 क्यारेकनि डेमासइ इ सन्सारको थोकके माया गर्लोइ मर्हाइ छाडिकनि उ थेसलोनिकि सहरमा गेलाटि। अनि केरेसेन्स पर्भुको धन्दा गरेके लागि गलातिया कलार ठउँमा र तितसचाहिँ दलमातिया कलार ठउँमा गेलाटि। 11 आन्हा मइसिन इथि लुका मात्र बाटि। तइ आउते मर्कुसके खोजिकनि साङ्हे लिहिकनि आहेस् क्यारेकनि ओइ मोरो धन्दामा सघाताइ। 12 मइ तुखिकसके एफिसस सहरमा पठाइदेलाटिन। 13 तइ मइठुँ आउतेखेरि तोर्आसमा कार्पस नाउँ होख्लो मानिसठुँ मइ छाड्लो ढेङो खाल्को कोट र कितापहान, खासगरि छालाको कितापहान आने झिनबिर्साहेस्। 14 तमउटेको धन्दा गर्लार अलेकजेन्डरइ मर्हाइ जारे ज दुख दिहिक्। ओख्रो काम अनुसार पर्भुइ ज ओख्राइ सजाए देताइ। 15 हामि पर्चार गर्लो कुराको जारे ज ओइ बिरोध गरिक्, उसिगर्ते तइ पनि ओख्रोसिन बचिकनि रहेस्। 16 जब पहिलि पल्ट मर्हाइ फइसला गर्लारठुँ लेग्ते मइसिन कुन्हुँ पनि नागेहाइ, तर सभइ जनाइ मर्हाइ छाड्वाइ। इ कुराको दोस उनहान्के झिनलागुस्। 17 तर पर्भुइ मर्हाइ साथ दिहिक् र मर्हाइ सक्ति दिहिक्। अनि मइ अरु जातको मानिसहान्के परमेस्वरको नाम्रो खबर सुनाइन र मर्हाइ सिङ्हको मुखभि बचाइक। 18 पर्भुइ मर्हाइ सभइ खराबभि बचाताइ र नाम्रोसिन स्वर्ग लेग्ताइ, पर्भुको महिमा सधइ होखुस्। आमेन। पावलको अन्तिम बिन्ति 19 पिरिस्किला, अकिलास र ओनेसिफरको घर परिवारके मोरो तर्फभि बिन्ति बाटि कहिदेहेस्। 20 इरातस चाहिँ कोरिन्थिमा ज बिसिक। तोर्फिमस मदाइलो कारनइ मइ ओख्राइ मिलेटस सहरमा ज बिसे कहिकनि छाडिदिहिन। 21 सकभर जाडो महिना लागे कते पहिलि मोरोठुँ आए कोसिस् गर्हेस्। तोर्हाइ युबुलसइ, पुडेसइ, लिनसइ, कलोडियासइ र जम्मइ दाजिभाइ दिदिबहिनिहान्इ पनि तोर्हाइ बिन्ति बाटि कलाटाइ। 22 पर्भु तोरो आत्मासिन रहुस्। परमेस्वरको अनुग्रह ताहान सभइ जनासिन रहुस्। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.