१ तिमोथि 4 - बोटेगलत कुरा सिखालारहान्को बारेमा सिछा 1 पबित्र आत्माइ इस्पस्टसिन कताइ, अन्तिम समयमा कत्का जना सत्य बिस्वासभि पाछु हट्तात्। उनहान भर्म्मा पर्लार आत्माको बोलि सुन्तात् अनि भुतपेरेतको सिछामा मन लगातात्। 2 एस्नो गलत सिछा चाहि मन छल कपट होख्लो फटाहा बोल्लारभि ज आउताइ। उनहान्को नाम्रो र ननाम्रो छुट्यालार मन त तातो फलामइ डाम्लो जस्ने केइ पनि थाहा नापाउलार बोधो रताइ। 3 उन्हान्इ बिहा गरे नाहोख्ताइ र कत्का खइलार चिज खाए नाहोख्ताइ कहिकनि सिखातात्। तर येसुमा बिस्वास गर्लाहारहान र सत्य कुरा चिन्लारहान्इ परमेस्वरके धन्येबाद दिहिकनि उ खइलार चिजहान खाए होख्ताइ क्यारेकनि परमेस्वरइ ज उ सभइ कुरा बनालो हो। 4 परमेस्वरइ बनालो सभइ चिज जारे ज नाम्रो होख्लोइ, परमेस्वरके धन्येबाद दिहिकनि सभइ थोक खाए सक्ताहुँ। 5 क्यारेकनि परमेस्वरको बचन र पर्थनाइ ज इ थोक सुद्द बनाताइ। तिमोथिके नाम्रो सेबक बन्लार सल्लाहा 6 जब तइ इ कुराहान बिस्वासि दाजिभाइ दिदिबहिनिहान्के सिखातेर, तब तइ बिस्वासको सत्यमा हुर्कलो र ठिक सिछा पालन गरिकनि आउलो खिरिस्ट येसुको एउटा नाम्रो सेबक होख्तेर। 7 तइ परमेस्वरभि दुस्हि लेग्लार कुरा र पहिलिभि चल्तिहि आउलो बुडोहानको गलत कहानिभि दुस्हि रहेस्, बरु परमेस्वरके मन पर्लाहार जिबन जिए कसरत गर्हइ। 8 कुनुहिँ कलाटि, “जिउको कसरत केइ दिनको लागि मात्र नाम्रो होख्ताइ तर परमेस्वरमा नजिक होख्लार कुरा सधइको लागि नाम्रो होख्ताइ।” जुन कुराइ आन्हाको र पाछाको जिबनमा फाइदा पुगालार बाचा गर्ताइ। 9 इ बोलि सत्य होख्लोइ बिस्वास गरिकनि सुइकारे पर्ताइ। 10 उसिगर्ते हामि कडा मेहेनत र धन्दा गरिरताहुँ, क्यारेकनि हाम्रो आस जिउते परमेस्वरमा बाटि। परमेस्वर सभइ मानिसको र खासगरि बिस्वास गर्लारहान्को मुक्ति देलार हो। 11 तइ इ कुराहान सिखाइकनि आग्या देहइ। 12 तइ तन्हेयारि होख्लो कारनइ तोर्हाइ हेला गरे कुन्हुँके झिनदिहि। उनहान्को आघु तोरो बोलिमा, बानिबेहोरामा, मायामा, बिस्वासमा र पबित्र जिबनमा जिए पर्ताइ कहि देखा अनि उनहान्इ तोर्हाइ पछ्यातात्। 13 मइ नाआउनज्याल तइ धर्मसास्त्र पढिकनि मानिसहान्के पालन गरेके लागि हउसला देहेमा, प्रचार गरेमा र सिछा देहेमा लागिधारेस्। 14 तोरोसिन होख्लो बरदानके हेला झिन गर्हइ। जुन बरदान मन्डलिको अगुवाहान्इ आफ्नो हात तोरो उप्रो धारिकनि परमेस्वरभि बोल्ते पाउलो रहेर्। 15 इ सभइ कुराहान नाम्रोसिन पालन गर्हइ र पुरे मन लगाइकनि यख्रेमा लागिधार्हइ ताकि तइ गर्लो पर्गति सभइ जनाइ देख्तात्। 16 तोरो बेहोरा र तइ सिखालो सिछाको बारेमा होसियार बिस्हइ। इ कुरामा लागि धार्हइ, एस्नो गर्निसिन तइ आफिके र तोरो कुरा सुन्लाहार सभइके बचातेर्। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.