Markus 9 - Bwok-basa Dagwi wuna-na-sira roso tanga pas

¹ Ko a to yang ɛn, “Mwin me ha a yin: Behak ba sé e tumal e ngamo de be ba kushu wɛt, sɛ̌ yɛn a ba di Dagwi a hwo re negwɔm na reto e ra jey e ngyen.”

Bemât Yɛsu betat ba di gbɔng nerat mɛ

² E bamâ nepɔlɔ netyiimin, Yɛsu a jut Bitrus, na Yakɔp, tanga Yohana, a vɔk na yɛn e gbɔng raku hwak, ko yɛn a sé e hwomo nju mɛn. Ko e bɛrɛng mɛn, ba hwo sege hɛ.

³ Berugu mɛ ba hwo pɛngɛ pes, ba nɛp sizɔng. Vit a mwat e jey de ê tɔk kus vɛ na be pɛngɛ ano.

⁴ Ko bemât masâ fwom mɛ vane betat ba vɛ̌ di Eliya na Mose, ba sé ha na Yɛsu.

⁵ Ko Bitrus a hwo tɛ̀ nu mɛ, a yâng Yɛsu, “À Da, a sé naka de wot a sé e ngamo! Tik na wot a yong buk tat: Gwining yaga hwo, gwining yaga Mose, ko gwining o yaga Eliya arɔng.”

⁶ Yɛ a bidɛ pyɛ de ê ha, yaga yɛ tanga bwang bemât masâ fwom vane beba yɛn a wok bengyip sizɔng.

⁷ Ano arɔng, rele ra yi, ra tɛ̀ necam e ra yɛn. Ko fwɔ gwa hwo yi e ji rele mo, gwa ye, “Hwêy yey hom a hemo! Wok in hâ hɛ!”

⁸ Sede yɛn a bɛrɛng nedem dey-dey, ko yɛn a to di mwat hwak tanga yɛn wɛt sɛ̌ Yɛsu nju mɛ.

⁹ Sede yɛn a sé gyirik yi e raku, ko Yɛsu a nɔng ɛn nu, a yang ɛn, “Yin ha a mwat hwak pyɛ de yin a ga di wɛt sɛ̌ e bama de Me de ma tɛ́ me mwat ma ga tānga sene yi e reku.”

¹⁰ Yɛn a gyeng há mɛ mo, ko yɛn a tik hɛ e ji neyey mɛn sɛ̌ jeng de yɛn a sé nju mɛn, ko yɛn a hwo berem na bemɛn, ba ye, “ ‘Séne yi e reku’ ha sé sɛ́ bet arɛt?”

¹¹ Ko yɛn a rangâl Yɛsu, ba ye, “Yaga sɛ́ de bemât basâ Badu ba ye, a sé gbing-gbing na Eliya a tānga vey e ngyen arɛt?”

¹² A toyo a yɛn, a yang ɛn, “Mwin, Eliya ê tānga vey e ngyen, na a ba yong pyɛ̂ mwa. Ko e rɛ̌ de bà kana jɛk e Bwok-basa Dagwi wɔgɔ, Me de ma tɛ́ me mwat ma rɔda di reyɔm pyak, ko ba rɔda kyɛ́ ɛn me arɛt?

¹³ Ko ma sé ha a yin, Eliya à kana vey, ko bemat bà ra a yɛ pyɛ́ de yɛn à simo, sede remo de bà jɛk e Bwok-basa Dagwi e ra yɛ.”

Yɛsu a tɛ̀ hwey de ha vɔk ceng tyang

¹⁴ Sede yɛn a wɔ̀ sɛ̀ bwang bemât masâ fwôm Yɛsu, yɛn a di gbɔng regyɛng bemat e hwomo tanga yɛn, ko bemât basâ Badu behak ba sé tó cuna na yɛn.

¹⁵ Jeng de bemat o ba di Yɛsu, yɛn a langat hɛn sizɔng; yɛn a tele vɔk na yɛ na be yang ɛ show.

¹⁶ Ko Yɛsu a rangâl bemât masâ fwom mɛ, a ye, “E sɛ́ de yin a sé tó cuna na yɛn e ra tɛt o arɛt?”

¹⁷ Mwat hwak e ji bemat o a hanat, a ye, “À Mwat Basa, ma vey na hwey hom na hwo, yaga ha vɔk ceng de ya tɛ̀ hɛ sana ha.

¹⁸ Kayɛ jeng de ya hwo ɛ kwong, ye bomos hɛ e vwel. Ko he paa fulu yi e nû, he roros yìn, ko nedem hɛ ne tɛ́ ɛn tsɔl. Ma ga ha na bemât masâ fwom mō na be pat ceng o, ko ba tɔk pat yɛ wɛt.”

¹⁹ Yɛsu a hanat, a yang ɛn, “À yin bemât jeng yemo de yin a tɛ̀ gap min e ra Dagwi wɛt! Mê sangal tanga yin vɔk e yɛ̌ jeng arɛt? Mê niri na yin vɔk e yɛ̌ jeng arɛt? Vey in a me na hwey o e ngamo!”

²⁰ Ba vey na hɛ na Yɛsu. Jeng de ceng o ya di Yɛsu, ko remo-remo ya tɛ̀ cushu ye vo hwey o, ko ha gaba e vwel, ha biring, ha paa fulu e nu.

²¹ Yɛsu a rangâl dâ hwey o, a ye, “Há hwo tē ano yimo yi e yɛ̌ jeng ɛ?” A yang ɛ, “Yimo yɛ hwey.

²² Zang pyak ya bomos hɛ e ji kya na e ji nshi, yaga na ye wey na hɛ. Ka sede hwó tɔk ra pyɛ cak, ko wok nemwishish mot, na hwo sɛlɛ hot!”

²³ Yɛsu a yang ɛ, “ ‘Ka sede hwó tɔk’, be tâng sɛ́ ano ɛ? Mwat de a tɛ̀ gap mɛ e ra Dagwi e tɔk ra kayɛ pyɛ.”

²⁴ Remo-remo, dâ hwey o a hwo gbɔ, a ye, “Ma ga tɛ̀ gap hom e ra yɛ, ko ha vey wɛt. Sɛlɛ me, na me gwɛ̌ tɛ̀ gap hom e ra yɛ mo!”

²⁵ Sede Yɛsu a di regyɛng bemat ra sé gwɛ̌ gwɛsɛ hɛ, a gyong ceng o, a yâng yɛ, “À ceng, hwo de hwó tɛ̀ hwey o he tɛ́ ɛ kpey na tɔn, ma nɔng o nu: Nusu yi e ji hɛ! Hwo to yel e ji hɛ wɛt!”

²⁶ Ko ceng o ya dak sekun, ya tɛ̀ cushu ye vo hwey o ding-ding, ko ya nusu hɛ. Hwey o ha sé sede revin o; yaga ano, bwarwêy bemat ba tē, “A ga ku!”

²⁷ Ko Yɛsu a kaba hɛ e vwɔ, a sɛlɛ hɛ na he sogo, ko ha sogo e tumal.

²⁸ Bama de Yɛsu a yel e ji lɔ, bemât masâ fwom mɛ zɔgɔ̂ hɛn ba rangal hɛ, ba ye, “Yaga sɛ́ de wot a tɔk pat ceng o wɛt arɛt?”

²⁹ A yang ɛn, “Sɛ̌ be ra won zɔng, na be de tɔk pat ceng yerê yemo.”

Yɛsu a to ha e ra reku mɛ

³⁰ Yɛn a tik kwɔn hane, ko yɛn a kwey e ji sevwêl Galili. Yɛsu a simo na mwat hwak a tɔk kwɔn de yɛ a sɛ́ wɛt,

³¹ yaga a sé basa a bemât masâ fwom mɛ. A yang ɛn, “Ba rɔda nára Me de ma tɛ́ me mwat e vɔ bemat de bê mɔrɔ me. E bamâ nepɔlɔ netat kwong, ma rɔda sene yi e reku.”

³² Yɛn a tɔk pyɛ de yɛ a ha wɛt, ko yɛn a tɔk rangal hɛ arɔng wɛt, yaga yɛn a wok bengyip.

E wɛ̌ de a dal na nerey arɛt?

³³ Yɛn a pom e Kafarnahum; ko jeng de yɛn a sé e lɔ, Yɛsu a rangâl bemât masâ fwom mɛ, a yang ɛn, “Yin á ga sè ra cuna e ra sɛ́ e gwong arɛt?”

³⁴ Ko yɛn a sǎ yuu, yaga yɛn á ga sè ra cuna e gwong e ji mɛn wɔgɔ, e wɛ̌ e ji mɛn de a dal na nerey arɛt?

³⁵ Yɛsu a sangal, ko a yila vane kuru na vɛ beba, a yang ɛn, “Kawɛ mwat de e simo na a sè wo yel, gbing-gbing na a sè wo bamâ mwa, na a to sè mwât fwôm bemɛn mwa.”

³⁶ A jut hwey hak, a tɛ̀ hɛ he tumal e nuyel mɛn, a kula hɛ, ko a yang ɛn,

³⁷ “Kawɛ mwat de a sey hwey sede hemo e ji reza hom, a sé e me de yɛ a sey. Ko kawɛ mwat de a sey me, a sé e me zɔng de a sey wɛt ko mwa na womo de a tomo me arɔng.”

Womo de e kyɛ́ ɛ hot wɛt a sé mwot

³⁸ Yohana a yang ɛ, “À Mwat Basa, wot a ga di mwat hwak a sé paa cēng e ji reza mō, ko wot a yang ɛ, yɛ a tik, yaga yɛ a sé e ji mot wɛt.”

³⁹ Ko Yɛsu a yang ɛn, “Yin ro ɛ mɛ̀ wɛt; yaga vit a mwat de e ra pyɛ bes e ji reza hom de a rɔda tɔk ha há ves e ra me e bamâ jeng tyɔng.

⁴⁰ Yaga kawɛ mwat de a kyɛ́ ɛ hot wɛt a sé mwot.

⁴¹ Tsak o mwin me ha a yin: Kawɛ mwat de ê nɔng in nshî sɔ, yaga yin a sé vê Kristi a rɔda ba bidɛ pyɔlɔ mɛ ko tyɔng wɛt!”

Pyɛ́ detidetu de ye tɛ̀sɛ mwat a ra banɛn

⁴² “Ka sede mwat hwak a tɛ̀ hining e ji nèy nemo de na tɛ̀ gap mɛn e ra me, na he tik nà tɛ̀ gâp hɛ e ra me, ê dal a yɛ ka ba rɔgɔs gbɔng gwofwa hwongo e fwɔ mɛ, na be bomo hɛ mɛ̀ e ji gworep.

⁴³ Ka sede e vwɔ mō de gwo tɛ̀ o hwo ra banɛn, kpɔktɔ gwɛ! A dal naka hwo yel e kwɔ̂n neken gbak-gbak na vwɔ gwining zɔng, de hwô yel e kwɔ̂n kya na vɔ mō mwa ba, e ji kya de he rimi hɛ ko tyɔng wɛt. [

⁴⁴ E hwomo, ‘bekǔt de be re babek mɛn be ku wɛt, ko kya mo arɔng he rimi hɛ ko tyɔng wɛt.’]

⁴⁵ Ka sede e bwol mō de gwo tɛ̀ o hwo ra banɛn, kpɔktɔ gwɛ! A dal naka hwo yel e kwɔ̂n neken gbak-gbak na bwol gwining zɔng, de hwô vɔk bol mō mwa ba, na be bomo hwo e kwɔ̂n kya. [

⁴⁶ E hwomo, ‘bekǔt de be re babek mɛn be ku wɛt, ko kya mo arɔng he rimi hɛ ko tyɔng wɛt.’]

⁴⁷ Ko ka sede e reyis mō de re tɛ̀ o hwo ra banɛn, pat rɛ! A dal naka hwo yel e ji Segwɔm Dagwi na reyis rining zɔng, de hwô vɔk bayis mō mwa baba, na be bomo hwo e kwɔ̂n kya.

⁴⁸ E hwomo, ‘bekǔt de be re babek mɛn be ku wɛt, ko kya mo arɔng he rimi hɛ ko tyɔng wɛt.’

⁴⁹ “Ba rɔda ba tɛ̀ kawɛ mwat jɛrɛ na kyâ reyɔm, sede remo de be tɛ̀ nenɔrɔ̂ yas de be yɛt vɔk na Dagwi jɛrɛ na nevwashe.

⁵⁰ “Nevwashe na sé naka; ko ka sede na tik tâ nɛ, e rɛ̌ de yin ê to tɛ̀ nɛ ne ta arɛt?” “Tik na tomong min be ta sede netâ nevwashe, ko sangal hin tyang na bemin.”