Markus 7 - Bwok-basa Dagwi wuna-na-sira roso tanga pas

Pyɛ́ de bedabeda bá basa

¹ Behak e ji BeFarisi na bemât basâ Badu, de bá kana vey yi e Yɛrusalɛm, ba tula hɛn na Yɛsu.

² Ko yɛn a di behak e ji bemât masâ fwom mɛ ba sé re pyɛ́ na vɔ de ba sé ligis, yɛn a kus vɛ wɛt e gwong de BeFarisi ba ha a bemat na be ra.

³ Yaga BeFarisi na bwang BeYuda yɛn e raa basa de yɛn á kana sey yi na bedabeda mɛn: Yɛn e hwo re pyɛ́ wɛt, sɛ̌ yɛn a kus vɔ mɛn e ra gwong de ba ga basa a yɛn.

⁴ Ko jeng de yɛn a toyo yi e bajang, yɛn e hwo re pyɛ cak wɛt, sɛ̌ yɛn a tānga kus ɛn e ngyen. Ko yɛn e raa badu bahak pyak vemo de yɛn á kana sey, sede gwông kûs begance, na neshǐ, na nerwèy dyam.

⁵ Ko BeFarisi na bemât basâ Badu ba rangâl Yɛsu, ba ye, “Yaga sɛ́ de bemât masâ fwom mō be raa basâ bedabeda mot wɛt, ko yɛn e re pyɛ́ na vɔ de ba sé ligis arɛt?”

⁶ Yɛsu a yang ɛn, “A sé tyɛng na pyɛ de Yɛshaya, zarap Dagwi à kana ha e ra yin, à yin bemât nenu-neba, sede remo de à jɛk wɔgɔ, “ ‘Dagwi a ye, bemat vemo be nɔng me nerey na nenu mɛn zɔng, ko neyey mɛn na sé yikyik na me.

⁷ Jeng de yɛn a sé re a me fongol, yɛn a sé ra fwôm mɔrɔ̂ rebek zɔng, yaga yɛn e raa badu de ba yi na bemasi sede ba yi na Dagwi!’

⁸ Yin a ga wuba redu Dagwi, ko yin a sé gyeng basâ bemat.”

⁹ Ko Yɛsu a to yang ɛn, “Kée kàa! Yin vɛ, yin a vɔk netsitsɛ̂ng kyɛ́ in badu Dagwi, yaga na yin a gyeng basa min.

¹⁰ Yaga Mose à kana ye, ‘Nɔ̂ng da mō na neng mō nerey’, ko à to ye, ‘Kawɛ mwat de a dùsa da mɛ kɛ neng mɛ, a sé gbing-gbing be mɔrɔ hɛ.’

¹¹ Ko yin, yin e basa wɔgɔ, mwat ê tɔk yâng da mɛ kɛ neng mɛ, ‘Pyɛ de ma ga ye, mê nɔng in, ya sé Korban’ wɔgɔ, ba ga nɔ̂ng Dagwi yɛ e nɔrɔ.

¹² Ko ka sede mwat o a ye ano, ko yin e to simo na yɛ a sɛlɛ da mɛ kɛ neng mɛ ko tyɔng wɛt.

¹³ Yi ano, yin a sé tɛ̀ hâ Dagwi he sè pyɛ cak wɛt yi na basa min de yin e tikis a behak. Ko pyɛ́ cak ya sé pyak sede yemo de yin e ragas.”

Pyɛ́ de ye tɛ̀ mwat ligis

¹⁴ Yɛsu a to yila regyɛng bemat vey na yɛ, a yang ɛn, “Wet in betong mwa hin, na yin a tɔk há hom!

¹⁵ Vit a pyɛ cak de ye yel e ji jîm mwat yi e nu mɛ de ye tɔk tɛ̀ ɛ a sè ligis. Ko a sé e pyɛ́ de ye nunus yi e ji mwat de ye tɛ̀ ɛ ligis. [

¹⁶ Ka sede mwat a vɔk betong, tik na yɛ a wok!]”

¹⁷ Jeng de Yɛsu a tik bemat o, a yel e ji lɔ. Ko bemât masâ fwom mɛ ba hwo rangal hɛ cap-há mo.

¹⁸ A yang ɛn, “Yin arɔng yin a tɔk di wɛt arɛt? Yin a tɔk wɛt a? Vit a pyɛ cak de ye yel e ji jîm mwat yi e nu mɛ de ye tɔk tɛ̀ mwat o a sè ligis,

¹⁹ yaga pyɛ mo ye yel e ji yey mɛ wɛt, ko ye kyè vɔk e rebu, ye wɔ̀ nu mɛ e beving.” Yɛsu a ha ano, na a dura wɔgɔ, pyɛ̂ mwa ya sé naka na be re.

²⁰ Ko a to gwɛ̌ yang ɛn, “A sé e pyɛ́ de ye nunus yi e nû mwat de ye tɛ̀ mwat o a sè ligis.

²¹ Yaga a sé yi e ji mo e hwomo wɔgɔ, yi e ji yêy mwat de bare ves he yís, hemo de he tɛ̀ mwat a ra nejwang, a shigi, a mɔrɔ mwat,

²² a ra jɛ̀m, a vɔk gananâng pyɛ́, na a ra pyɛ́ detidetu de ya sé vyes; a kwɛlsɛng bemat, a vɔk gwōt, a kyɛ́ ɛ nà simo mwat hwak a sɛ̀ pyɛ cak, a lashe bazâ bemat, a tos rato, ko a kat hâ netɔn.

²³ Mwa pyɛ́ vyes yemo ye nunus yi e hwomo e ji yêy mwat, ko ye tɛ̀ ɛ ligis.”

Hwā de a sé WoYuda wɛt a tɛ̀ gap mɛ e ra Yɛsu

²⁴ Yi e hwomo, Yɛsu a sogo, a kyè vɔk e yɛnɛ̂ sevwel de sa sé bagat na repomô Tur. A yel e ji lɔ hak, ko a simo na mwat hwak a tɔk, yɛ a sé e hwomo wɛt. Ko hane ha tɔk ro bemat sana tɔk kwɔn de a sé ɛ̀ wɛt.

²⁵ Hwā hwak de hwong mɛ a vɔk ceng a wok rehâ Yɛsu. Remo-remo, a vey na yɛ, a pom, a gaba e nuyel mɛ, a re a yɛ fongol.

²⁶ Hwā mo a sé WoYuda wɛt, ko a sé tɔ̂ yɛnɛ̂ sevwêl Finikya wo Sirya. A ra won na Yɛsu na a pat ceng yi e ji hwong mɛ.

²⁷ Ko Yɛsu a yang ɛ, “Tik na wot a tānga nɔ̂ng nèy pyɛ̂ re e ngyen. A sé tyɛng wɛt na mwat a jut pyɛ̂ nèy, na a bomo a bevu yɛ̄.”

²⁸ Hwā mo a ye, “Ey, a sé ano, à Da. Ko mwa ano, bevu be re cɛ̂k pyɛ̂ nèy de ye gabsa e vwel!”

²⁹ Ko Yɛsu a yang ɛ, “Há mo ha sé naka. Kyè vɔk e lɔ; ceng o ya ga nu ɛ yi e ji hwóng mō!”

³⁰ Hwā mo a kyè vɔk e lɔ, a pom, a sɛ̀ hwong mɛ e gwat e dyɛngɛ, ko ceng o mwin ya ga nusu.

Yɛsu a tɛ̀ mwat de a sé kpey, ko a to sé tɔn tyang

³¹ E bama mo, Yɛsu a tik yɛnɛ̂ sevwêl Tur, ko a kyè vɔk e Gworep Galili. A pere kwey e repomô Sidɔn tanga e bapomo kuru de ba tâng vɛ, à Dekapolis.

³² Bemat behak ba vey a yɛ na kpey hwak de e to ha jɔ̀gɔy, ko yɛn a ra won na Yɛsu, na a tɛ̀ vwɔ mɛ e ra yɛ.

³³ Yɛsu a hwo hwɔtɔ hɛ e ji bemat, a vɔk na yɛ e bak gwining. E hwomo, a tɛ̀ bekɛn vɔ mɛ e ji betong mwat o, a tulus netey, ko a ra relem mɛ.

³⁴ Ko a tɛ̀ bayis mɛ vɔk e lagwi, a vo yey na gap, ko a yâng mwat o, “Efata!” Wɔgɔ, “Wunta!”

³⁵ E ji jeng o, betong mɛ ba wunta hɛn, relem mɛ ra viri hɛ arɔng, ko a hwo ha vit a jɔ̀gɔy yane mo.

³⁶ Ano Yɛsu a nɔ̂ng bemat o nu, a yang ɛn, yɛn a ha a mwat wɛt. Ko sede a gwɛ̌ ha a yɛn ano, ko yɛn a gwɛ̌ shara hɛ.

³⁷ Mwa bemat de ba wok ba langat hɛn sizɔng, ba tē, “Hm! Kayɛ pyɛ de e ra, e ra yɛ ryat o! E tɔk tɛ̀ bekpey be wok há, betɔn kwong be tɔk ha arɔng!”