Markus 4 - Bwok-basa Dagwi wuna-na-sira roso tanga pas

Gwɔrɔ-hâ mwât berê yére

¹ Yɛsu a to hwo basa a bemat e vwâ Gworep Galili. Regyɛng bemat pyak ra tula hɛ na yɛ, yaga ano, a yel e ji dwa-nshi, a sangal. Dwa mo wa sé e ji nshi, ko regyɛng bemat o ra sé e vwâ gworep e rekwogom.

² Yɛsu a misang a yɛn pyɛ́ pyak na gwɔrɔ-há detidetu, ko e ji basa mɛ a yang ɛn:

³ “Wet in betong! Mwat hwak a nusu na a wɔ̀ bere yére.

⁴ Jeng de a sé bere yére mo, cak ya gaba e tê gwong, ko benon ba vey, ba tɔng yɛ̄.

⁵ Cak ya gaba e kwɔ̂n kusha, kwɔn de ha vɔk nefongol pyak wɛt. Yére mo ya tānga vungu, yaga kwɔn o ha vɔk nefongol yɛt wɛt.

⁶ Ko jeng de gwi gwa vey e tē, gwa ta yɛ̄, ko ya hworok, yaga berinîs yɛ̄ bá kana yel yikyik e ji vwel wɛt.

⁷ Cak ya gaba e kwɔ̂n serɔgɔ. Rɔgɔ mo ha ras, ko ha vo yɛ̄; yaga ano ya mara wɛt.

⁸ Ko cak arɔng ya gaba e ji nefongol nerat. Ya vungu, ya ras, ya tɛ̀ yéneng, ko ba sɛ̀ pyɛ́ de ba bere zang kuru batat (30), cak kuru batyiimin (60), na cak naga (100) kwong.”

⁹ E yɛnɛ mo, Yɛsu a yang ɛn, “Mwat de a vɔk betong, tik na yɛ a wok!”

Retîn gwɔrɔ-há mo

¹⁰ Jeng de Yɛsu, na bemât masâ fwom mɛ kuru na vɛ beba, tanga bemat de ba raa hɛ bá sè nju mɛn, yɛn a hwo rangal hɛ, ba ye, “Misang a wot cap gwɔrɔ-há mo.”

¹¹ Yɛsu a hanat, a yang ɛn, “A sé e yin vɛ de ba nɔng in tɔ̂k pyɛ̂ neyaàng Segwɔm Dagwi. Ko vemo de be raa me wɛt bê wokos pyɛ̂ mwa yi e gwɔrɔ-há,

¹² yaga na, “ ‘Yɛn a sǎ e de bɛrɛng, ko yɛn ê di pyɛ cak wɛt, yɛn ê sǎ e de wokos, ko yɛn ê tɔk há mo wɛt. Ka a sé ano wɛt, ka yɛn a yâng doyo vɔk na Dagwi, na a hàla a yɛn banɛn mɛn!’ ”

Yɛsu a nɔng cap gwɔrɔ-há mo

¹³ Yɛsu a rangal hɛn, a ye, “Yin a tɔk gwɔrɔ-há hemo wɛt arɛt? Ko e rɛ̌ de yin a rɔda tɔk bwang negwɔrɔ-há arɛt?

¹⁴ Yére de mwât bere e bere ya sé rehâ Dagwi.

¹⁵ E jeng cak, reha mo re gaba e tê gwong. A sé sede bemat de be wok rɛ, ko e ji jeng o, Shetan e vey, ko e hashe reha de ba ga bere e ji neyey mɛn.

¹⁶ Bemat behak ba sé sede yére de ya gaba e ra kusha. Jeng de be wok reha mo, remo-remo, yɛn e sey rɛ na yey pyɛng.

¹⁷ Ko re tɛ̀ berinis e ji mɛn wɛt, yɛn e pɔl ɛ̀ ba wɛt. Jeng de reyɔm re vey, kɛ be hwo tak a yɛn reyɔm yaga reha mo, ko remo-remo, yɛn e to ɛn na bama.

¹⁸ Bemat behak arɔng ba sé sede yére de ya gaba e ji serɔgɔ. Yɛn à vemo de be wok reha mo,

¹⁹ ko bɔrɔ̂k pyɛ̂ jey, na netâ yas, tanga marâ yis e ra pyɛ́ detidetu ye vo reha mo, ko re mara wɛt.

²⁰ Ko bemat behak kwong ba sé sede yére de ba bere e ji nefongol nerat. Yɛn e wok reha, yɛn e sey rɛ, be ra mɛ̀ fwom naka sede yére de ya tɛ̀ zang kuru batat, cak kuru batyiimin, ko cak naga arɔng.”

Kywa-kya de ba ye gup na kwɛt

²¹ Yɛsu a to yang ɛn, “Mwat de a ga tɛ̀ kya e kywa-kya mɛ, na a yel mɛ̀ e duk a rɔda ye gup a wɛ na kwɛt, kɛ ê tik wɛ e nɛ̂n gwat arɛt? Kée wey! Ê jāma kwɔn de ha sé garang, na a tik ɛ̀ wɛ.

²² Mwa pyɛ́ de ba ga kana lɛrɛ yɛ̄, ba rɔda ba nusu na yɛ̄ e jey wɛshɛrɛk, ko mwa pyɛ́ de ba ga kana bang yɛ̄, ba rɔda ba wunta yɛ̄ dɛdɛrɛng.

²³ Mwat de a vɔk betong, tik na yɛ a wok!”

²⁴ A yang ɛn kwong, “Tē in naka na pyɛ́ de yin e wokos! Shǐ hemo de yin e masa mɛ̀, e hɛ de Dagwi a rɔda ba masa a yin mɛ̀, ko a gwɛ̌ a yin ɛ̀ kwong.

²⁵ Mwat de a vɔk pyɛ cak, ba rɔda gwɛ̌ a yɛ. Ko womo de a vɔk pyɛ wɛt, ba rɔda sey ɛ̀ yi na yɛ kepyɛ de a vɔk.”

Gwɔrɔ-há e ra yére de ye ras

²⁶ Yɛsu a to yang ɛn, “Segwɔm Dagwi sa sé sede ngan: Mwat hwak e bere yére e cap.

²⁷ Nagwi na nabwalak, e sogo, e to dyɛng, ko yére mo ye vungu, ye ras, kɛ e rɛ̌, yɛ a tɔk wɛt.

²⁸ Vwel pyɛ hɛ he tɛ̀ pyɛ́ ye ras, na ye mara: E mɛsɛng o, ye tɛ̀sɛ mapak, e bama mo, ye tɛ̀sɛ bato, ko e yɛnɛ mo, ye tɛ̀sɛ yéneng.

²⁹ Jeng de ye vel, ko e wɔ̂ yɛt o, yaga bwal gwa ga vey.”

Gwɔrɔ-há e ra keyenêng mastat

³⁰ A to rangal hɛn, “Wot ê ye, Segwɔm Dagwi sa sé sede sɛ́ arɛt? E hɛ̌ gwɔrɔ-há de wot ê sɛ̀ na wot a misang mɛ̀ arɛt?

³¹ Sa sé sede ngan: Mwat hwak a jut keyenêng mastat, ko jeng de a tus kɛ, ka dal bwang yére mwa e jey na nesɛl.

³² Ko e bama mo, ke ras, ko ke tɛ́ ɛ kerey o, ke dal bwang batîn berang de be tus e ji bwi. Ke kak nelang nerey o nemo de benon be tɔk yís, na be lɔkɔs barɛngɛ mɛn e ji necam o.”

³³ Ano kwong, Yɛsu a shara a bemat reha mɛ, a ha a yɛn na gwɔrɔ-há pyak sede hemo; a ha a yɛn tyɛng na tɔ́k mɛn.

³⁴ A ha a yɛn sana gwɔrɔ-há wɛt, ko jeng de a to ɛ e bak gwining na bemât masâ fwom mɛ, a misang a yɛn pyɛ̂ mwa de gwɔrɔ-há mo ha ha.

Yɛsu a tɛ̀ gwogul gwo tumal

³⁵ Tuk hane mo nahywegelek, Yɛsu a yâng bemât masâ fwom mɛ, “Tik na wot ye dɔ vɔk e gurâ gworep gworo.”

³⁶ Yɛn a tik regyɛng bemat, ko bemât masâ fwom mɛ ba wɔ̀ yel e dwa-nshi de Yɛsu á kana yel ɛ̀, ko ba jut ɛ tanga yɛn. Bedwa-nshi behak ba raa hɛn arɔng.

³⁷ Ko gwogul gwa nusu, gwa hwo pɛsɛl na gap, gwa hashe nshi e ji dwa mɛn o, ko bwang o tyɔng na wo sila na nshi.

³⁸ Yɛsu a sé e dyɛngɛ e bamâ dwa-nshi, a tik rato mɛ e ra mâ tikîs rato e de nevwa. Ko bemât masâ fwom mɛ ba shina hɛ, ba yang ɛ, “À Mwat Basa, hwà di, wot a sé ye pyɔp, ko hwó ka sap wɛt a?”

³⁹ Yɛsu a sogo, a gyong gwogul o, a yâng gwɛ, “Tumal!” Ko a yâng nshi, “Sǎ yaang!” Gwogul o gwa ye tiing, ko kwɔn o ha ye yuu tyɔng wɛt.

⁴⁰ E bama mo, Yɛsu a rangâl bemât masâ fwom mɛ, a ye, “Yaga sɛ́ de yin a vɔk bengyip ano arɛt? Ko sɛ̌ vey e jeng yemo yin a ka tɛ̀ gap min e ra me wɛt arɛt?”

⁴¹ Ko yɛn a wok bengyip sizɔng, ba hwo tâng bemɛn, “Kée! E wɛ̌ mwat a womo de gwogul na gworep be gyeng há mɛ arɛt?”