Ɛfɛsus 4 - Bwok-basa Dagwi wuna-na-sira roso tanga pas

Wuna hin mwa e ji rebêk Kristi

¹ Ano kwong, me de me re ngyang, yaga me ra a Darwey fwom, ma sé shonong e ra yin ngan: Tik na gwông sangal min gwo sè tyɛng na gwomo de Dagwi a ha a yin na yin a vɔk gwɛ; a ha ano e jeng de a yila hin na yin a sè bemɛ.

² E kayɛ jeng, dyɛ́ng in bato min, na yin a vɔk nehywɛ, na yin a niri arɔng. Dura hin tɛ̂ yey min na bemin e gwong de yin e sey ɛn sana simo na yin a sege negwɔn mɛn.

³ Gabik Dagwi he tɛ̀ yin a sangal tyang na bemin, ko sángal o he wuna hin na bemin na yin a sè vining. Yē in ngyɛ́k na yin a gyeng wunâ to min o.

⁴ Wot mwa wot a sé rebek rining, ko wot mwa wot a vɔk Gabik hining arɔng. Sede remo de pyɛ ya sé jining de wot a sɛt yey e ra yɛ, ko a sé e pyɛ mo de Dagwi a yila hot na wot a ra.

⁵ Wot a vɔk Darwey gwining zɔng, ko gwong gwa sé gwining de wot a sey tsak o na Dagwi. Mwat o a sé gwining de ba tɛ̀ a wot batisma e ji reza mɛ arɔng.

⁶ Wot a vɔk Dagwi gwining zɔng, yɛ Dâ bemât mwa. Yɛ a sé re negwɔm e ra bemât mwa, yɛ a sé ra fwom yi na bemât mwa, ko yɛ a sé sangal e ji bemât mwa kwong.

⁷ Ko mwa ano, kawɛ e ji mot a ga sey nɔrɔ mɛ de ha sé tyɛng na numo mɛ de Kristi a yong a yɛ yi e nedanerey mɛ.

⁸ Sede remo de bà jɛk e Bwok-basa Dagwi wɔgɔ, “Jeng de a tút wɔ e kwɔn de ha dal e rak o mwa, a vɔk ɛ̀ vemo de a re como e ra vɛ; a to nɔ̂ng bemasi nenɔrɔ.”

⁹ Ko di, cap-hâ neha nemo wɔgɔ, “A tút wɔ e rak o” yɛ à sɛ́ arɛt? Ya sé ngan: A tānga tik kwɔn de á kana sè ɛ̀, a gyirik vɔk e kwɔn de ha dal na neciwil mwa e jey.

¹⁰ Ano kwong, yɛ womo de a gyirik a sé gwining na yɛ womo de a tút vɔk e lagwi, a wɔ̀ wul kwɔn de ha sé e rak o de ha dal kahɛ kwɔn. Hemo ha té, yaga na nerey mɛ ne bin sila kahɛ kwɔn e lagwi tanga jey.

¹¹ E yɛ à womo de “A nɔ̂ng bemasi nenɔrɔ.” A tɛ̀ behak be sè betom mɛ, ko behak be sè bezarap Dagwi, behak be sè bemât sharâ Yɛgɛt Yat, ko behak be sè vemo de be gyeng bemat-raa na be to basa a yɛn.

¹² A ra ano, yaga na a yong bemât Dagwi na be tɔk ra fwôm bemât sɛlɛ. Yi ano, rebêk Kristi, rɛ à bemat-raa, ra rɔda ras na re vɔk gap.

¹³ Yi e gwong gwomo, wot mwa wot ê tɛ́ ot vining o e ji wunâ to mot de he yi na sêy tsak o na Kristi tanga yi na tɔ̂k Hwey Dagwi arɔng. E jeng o, wot ê ba sè bemat de ba ga vey naka gyat, ko wot ê to ba sè tyɛng na Kristi e gwong de yɛ pyɛ mɛ a sila gyat.

¹⁴ Ko wot ê to ba sè sede nèy wɛt. Bása hê bemat de be kwɛlɛng behak, vemo de be tɛ̀sɛ bemat yi na netsitsɛng neves mɛn o na be buru — bása yere hemo mo he to tɔk gangas hot vɔk e kawɛ bak wɛt, sede nshi de nà tɛ̀ rahwol e gworep ne gangas bedwa-nshi kpɛɛ, kɛ sede gul de gwo pɛsɛl vɛ e kawɛ bak.

¹⁵ Ko tik na wot a ha a bemat hâ tsak o de Dagwi a dura a wot na wot a to tɛ̀ yey na yɛn arɔng. Yi na ragas ano, wot a rɔda ras e kagwɛ gwong na wot a sè sede Kristi, yɛ de a sé tô ekilisiya.

¹⁶ Yɛ a sé womo de e tɛ̀ mwa nedem rebek ne wuna hɛn myak. Ko karɛ rehwɔ̂t rɛ re sɛlɛ na rebek o re sè pyɛ jining yi na wunâ nedem o mwa nɛ. Ka sede kahɛ dem he ra pyɛ de ya jam na he ra, ko rebek o mwa re ras, re to gwɛ̌ gap, sede remo de nedem o, nɛ à bemat-raa, ne tɛ̀ yey na bemɛn.

Negwɔn nepas yi na Kristi

¹⁷ Ma sé ha a yin neha nemo, ko ma sé shonong e ra yin e ji rezâ Darwey mot wɔgɔ, yin re nuyel na sangal e gwông bemat de be raa Dagwi wɛt. Pyɛ́ de yɛn e bare ya sé kpɛɛ zɔng,

¹⁸ ko lwīl gwa bang a yɛn tɔ́k mɛn. Yɛn a vɔk numo mɛn wɛt hê neken de na sé mwin, nemo de Dagwi e nɔng bemat, yaga yɛn a tɔk pyɛ cak wɛt, ko neyey mɛn na sé kashalang.

¹⁹ Yɛn a to tɔk pyɛ de be tâng yɛ, à rekyen wɛt; yɛn a ga tɛ̀ bato mɛn e ji vɔ̂k gwōt, yɛn e ra pyɛ́ de ye tɛ̀ ɛn ligis, ko yɛn a vɔk cwey rê nuyel na râ yɛ̄.

²⁰ E pyɛ́ ma yemo de bá basa a yin e ra Kristi wɛt!

²¹ Mwin, bá kana ha a yin há e ra yɛ; ko sede remo de yin a sé bemat-raa mɛ, bá basa a yin e gwong de gwa sé tsak o cap-hâ sangâl nesa na Yɛsu.

²² Yaga ano, paa in negwɔn min ne raane, sede be pat rugu roso; á sè e negwɔn min o de na tɛ̀ in na yin a ra pyɛ́ de yin a kyě ragas. Negwɔn ne raane mo ná kana lashe hin, yaga ná tɛ̀ in na yin a vɔk cwey pyɛ́ de yá kwɛlsɛng hin.

²³ Nɔng in Dagwi gwong na a tɛ̀ neyey min tanga báre min he tɛ́ ɛ pas.

²⁴ Jut in negwɔn nepas, na yin a tɛ̀ nɛ sede be tɛ̀ rugu pwas. Dagwi a yong negwɔn nepas o na ne sè sede yɛ pyɛ mɛ, ko ne dura tô nɛ yi e gwông sangal gwo tsak o de gwa sé cik, ko gwa to sé jɛrɛ arɔng.

²⁵ Yaga ano, yin to vɛ́sɛ bɔs wɛt! Tik na kawɛ mwat a ha a mumwɛ há de ha sé tsak o, yaga wot mwa hot wot a sé nedem rebek rining, rɛ à Kristi.

²⁶ Ka sede yin a vo shom na mwat hwak, yin kwon tik shom min o ye tɛ̀ in yin a ra banɛn. Tík in shom min o gyam gwi gwo gaba.

²⁷ Yin kwon nɔ̂ng gwɔ̀m cēng gwong na a tɛ̀ in yin a ra banɛn.

²⁸ Mwat de á kana shigi, a re nuyel na shigi wɛt. Tik na a hwo ra fwom na vɔ mɛ mo e negya; a ra fwom e gwong rwat, yaga na a vɔk pyɛ, na a bin sɛlɛ mɛ̀ vemo de ba sé bepɛng.

²⁹ E ji râ berem na bemat, yin ha há ves wɛt, ko tik na neha min ne sè nerat, yerê nemo de ne sɛlɛ bemat, nemo de na jam yaga kayɛ jeng. Yi ano, vemo de be wokos hin ba rɔda sɛ̀ nerat.

³⁰ Yin lashe a Gabik Jɛrɛ̂ Dagwi yey wɛt, yaga, ka sede yin a vɔk Gabik o e neyey min, hemo he dura, yin a sé vê Dagwi. E hɛ de he tɛ̀, yin a tɔk tsɛng-tsɛng jeng yê ba vey de Dagwi a rɔda ba viri hin.

³¹ Tík in mwa nekpashak de na sé e ji neyey min; tík in vɔ̂k yey pep tanga wôk shom arɔng. Yin re nuyel na tow nu na bemin wɛt kɛ yin lashe bazâ bemat wɛt. Tík in kayɛ yerê neves.

³² Ko dura hin a bemin nerat, na yin a wok nemwishish mɛn arɔng. Hàla a bemin banɛn mɛn, sede remo de Dagwi a ga hàla a yin yi na Kristi.