Ɛfɛsus 3 - Bwok-basa Dagwi wuna-na-sira roso tanga pas

Fwôm Bulus yaga yére dyuk

¹ Pyɛ́ ma yane de ya tɛ̀, me Bulus, me ra a Dagwi won yaga yin. Ma sé re ngyang, yaga me raa Kristi Yɛsu, ko me ra fwom yaga yin de yin a sé BeYuda wɛt.

² Yin a ga wok, Dagwi a ga dura a me nerat mɛ, ko a nɔng me fwom gwomo na me ra, yaga na me sɛlɛ hin.

³ Yɛ a dura a me wɛshɛrɛk pyɛ de yà kana sè e lɛrɛ yimo raane. Ma ga jɛktɛ a yin tyɔng e ra pyɛ mo.

⁴ Ko jeng de yin a rɔda basa neha de ma jɛk o, yin ê di pyɛ de ma tɔk e ra pyɛ yane de yà kana sè e lɛrɛ, de ya sé e ra Kristi.

⁵ A raane, Dagwi à kana dura a bemasi pyɛ neyaang yane mo wɛt; ko a remo, yɛ a ga tɛ̀ Gabik mɛ he wunta a betom Yɛsu tanga bezarap Dagwi pyɛ mo. E yɛn de ba tik ɛn jaram na be ra a Dagwi fwom.

⁶ Pyɛ de yà kana sè e lɛrɛ a yet ngan: Yi na sangâl nesa mɛn na Kristi Yɛsu, bemat de ba sé BeYuda wɛt be wuna hɛn na BeYuda na be sey nerat de Dagwi à nɔ̂ng BeYuda mo. Yɛn mwa tanga BeYuda yɛn a sé nedem rebek rining de ra sé Kristi; ko yɛn e sɛ̀ numo mɛn hê pyɛ́ de Dagwi à kana sira na a nɔ̂ng bemat mɛ. Mwa pyɛ́ mo ye té yaga Yɛgɛt Yat.

⁷ A sé e Dagwi de á tɛ̀ me na me sè mwât sɛlɛ e de sharâ Yɛgɛt Yat o; fwom o gwa sé nɔrɔ de a nɔng me yi na nerat mɛ, ko a to nɔng me hɛ yi na reto mɛ de a sé ra mɛ̀ fwom e yey hom.

⁸ Mwa ano de ma sé mwât bama mwa e ji bemât Dagwi, ko Dagwi o a dura a me nerat mɛ jeng de a nɔng me fwom gwomo ngan o: A tomo me, na me wɔ̀ shara a bemat de ba sé BeYuda wɛt Yɛgɛt Yat. Yɛgɛt Yat o ya sé e ra pyɛ́ ryat de ya sé ryey o tyɔng wɛt vit a yɛ̄ nà yɛnɛ, yēmo de wot a sey yi na Kristi.

⁹ A to tomo me, na me wɔ̀ tɛ̀ bemât mwa be tɔk gwong de pyɛ de yà kana sè e lɛrɛ ya rɔda té. Yɛ Dagwi de à yong pyɛ̂ mwa à kana tik pyɛ neyaang mɛ mo e lɛrɛ yimo nesheneshey.

¹⁰ Ko a remo, yɛ a tɛ̀ vemo de ba vɔk reto tanga vemo de be re negwɔm e yɛnɛ̂ lagwi na yɛn a tɔk pyɛ mo. A sé yi na ekilisiya mɛ de a tɛ̀ betom-lagwi o be tɔk netsitsɛng mɛ e ji kayɛ pyɛ de e ra.

¹¹ Dagwi a ra ano e gwong de gwà kana sè e yey mɛ yimo nesheneshey; ko a ra ano yi na Kristi Yɛsu Darwey mot.

¹² Yaga wot a sé sangal e ji nesa na Kristi, ko yaga wot a sey tsak o na yɛ, wot a tɔk vey tumal e nuyêl Dagwi. Vit a pyɛ de yê tɛ̀ wot a wok bengyip, yaga wot e tó yey na yɛ wɛt.

¹³ Yaga ano, ma sé ra won na yin, na yin a ye waa wɛt, yaga ma sé sɔ reyɔm. Sɔ̂ reyɔm o ha sé, yaga na me sɛlɛ hin, yaga na yin a sɛ̀ numo min hê gbɔng nerey de ba yong yaga yin.

Gwong de Kristi a tɛ̀ yey na wot

¹⁴ Pyɛ ma yane de ya tɛ̀, ma sé ye guduruk e nuyêl Dagwi Da hom.

¹⁵ E yɛ de a tɛ̀ kayɛ yere e hwomo e lagwi tanga e ngamo e jey ye sey reza rê mwin yi na yɛ.

¹⁶ Me ra won vɔk na Dagwi de a vɔk pyɛ̂ gbɔng nerat de ya sé shɛrɛk, na a nɔng in reto yi na Gabik mɛ, yaga na yin a vɔk gap e neyey min.

¹⁷ Ko me to ra won na Kristi a bin sangal e neyey min; hemo hê té, ka sede yin a sey tsak o na yɛ. Me ra won, yaga na kayɛ pyɛ de yin e ra ye dura, yin a tɛ̀ yey na Dagwi tanga bemat arɔng.

¹⁸ Yi ano, yin tanga bwang bemât Dagwi mwa yin ê kyɛm yin a tɔk tsɛng-tsɛng gwong de Kristi a tɛ̀ yey na yin, gwong de bê tɔk masa nelis kɛ netes kɛ neciwîl gwɛ wɛt.

¹⁹ Ko mwa ano de tɛ̂ yey o ha dal gâp tɔ́k mot, tik na yin a bin tɔk hɛ; yi ano, kayɛ pyɛ ryat de ya sila e ji Dagwi ya rɔda sila e neyey min.

²⁰ Dagwi e tɔk ra pyɛ de ya dal kayɛ pyɛ de wot e ra won kɛ wot e bare na yɛ. E tɔk ra ano yi na gbɔng reto de a sé ra mɛ̀ fwom e neyey mot.

²¹ Wot vemo de wot a sé e ji ekilisiya, wot de wot a sé sangal e ji nesa na Kristi Yɛsu, tik na gbɔng nerey ne sè ne Dagwi yi e zamang hemo vɔk e kahɛ mo mwa gbak-gbak! Ano.