Bepiris 9 - Bwok-basa Dagwi wuna-na-sira roso tanga pas

Aharon na nèy mɛ ba kaba fwom

¹ E tuk hê rwit jeng de ba tala tɛ̂ Aharon na nèy mɛ, bepiris, Mose a yila hɛn tanga bemakûk BeIsrayɛl.

² A yâng Aharon, “Jut bwôt mus na turuk de vit a rām kɛ pyɛ cak vyes, na hwo nára mɛ nɔrɔ vɔk na Dagwi Darwey, bwôt mus o yaga halâ banɛn, ko turuk o wo nɔrɔ̂ yas burang.

³ Ko ha a BeIsrayɛl arɔng, be vey na gam yaga nɔrɔ̂ fûng banɛn, na bwôt mus tanga turuk vê neshey ninining, de vit a rām kɛ pyɛ cak vyes, yaga nɔrɔ̂ yas burang,

⁴ na mus tanga turuk yaga nɔrɔ̂ wunâ nesa. Bê nára yɛ mwa na nɔrɔ̂ nemuk de ba ga suk na něy. Yaga yunung Dagwi Darwey ê dura to mɛ na yin.”

⁵ Yɛn a vey a Mose na kayɛ pyɛ e kwɔ̂n buk o, sede remo de a nɔng ɛn nu; ko mwa regyɛng BeIsrayɛl o ba gwɛ̌ wɔ bagat, na be re a Dagwi Darwey fongol.

⁶ Ko Mose a yang ɛn, “Di, pyɛ ma yemo de Dagwi Darwey a ga nɔng in nu, na yin a ra, na yin bin di nedyɛt gbɔng nerat mɛ.”

⁷ Ko a yâng Aharon, “Sek bagat wɔ̀ sɛ̀ gàgbang rangas o, na hwo nára yaga to mō nɔrɔ̂ fûng banɛn na nɔrɔ̂ yas burang, yaga talâ-nɛn mō na belɔ mō. Ko hwo to nára nɔrɔ hê BeIsrayɛl, yaga na be hala a yɛn mɛ banɛn mɛn arɔng. Ra pyɛ́ mwa sede remo de Dagwi Darwey a ga kana nɔng nu.”

⁸ Ano de Aharon a sek bagat wɔ̀ sɛ̀ gàgbang rangas o, ko a yɛrɛ mus de wa sé yaga nɔrɔ̂ fûng banɛn mɛ pyɛ mɛ.

⁹ Nèy mɛ na vey a yɛ na nemi de ba sɛt, ko a tɛ̀ kwɛn vwɔ mɛ e ji nɛ, a tɛ̀sɛ nɛ̀ e ra pyɛ́ de ya sé sede badûk gàgbang rangas o, bwang nemi mo a losho nɛ e retîn kwɔn o.

¹⁰ Ko a rangas sebwêp yas o, na pyík o, tanga cûng bwep de ya sé e yey o e ra kwɔn o, sede remo de Dagwi Darwey a ga kana nɔ̂ng Mose nu.

¹¹ Ko banama mo na rehwo mo a rangas e mâ jêy kwɔ̂n yê ngyɔk o.

¹² E bama mo, a yɛrɛ turuk de wa sé yaga nɔrɔ̂ yas burang. Nèy mɛ na vey a yɛ na nemi, ko a waram nɛ̀ e ra bahagat banaas vê gàgbang rangas o.

¹³ Nà to nɔng ɛ bagâp banama mo na to mo, ko yɛ a rangas mwa.

¹⁴ A kus pyɛ̂ jim o, tanga bol bama mo, ko a rangas yɛ̄ mwa e ra bwang pyɛ́ de ya sé e ra gàgbang rangas o.

¹⁵ Ano arɔng, a nára nenɔrɔ̂ BeIsrayɛl. A jut gam de bê nára nɔrɔ mo yaga halâ banɛn mɛn, a yɛrɛ wɛ, ko a nára wɛ, sede remo de a ga kana ra na mwɛ.

¹⁶ A to nára nɔrɔ̂ yas burang tyɛng e ra badu mo.

¹⁷ A vey na nɔrɔ̂ nemuk, a vɛ pyak e vwɔ, ko a rangas e ra gàgbang rangas o. Nɔrɔ hemo ha sé e ra rak nɔrɔ̂ nemuk de be nára tanga nɔrɔ̂ yas burang hê kahɛ gasi.

¹⁸ E bama mo, a yɛrɛ mus o tanga turuk o, de ba sè yaga nɔrɔ̂ wunâ nesa yaga BeIsrayɛl. Nèy mɛ na vey a yɛ na nemi mo, ko a waram nɛ e ra bahagat banaas vê gàgbang rangas o.

¹⁹ Nà paa mwa sebwêp mus o tanga sê turuk o,

²⁰ ko nà tɛ̀ sɛ e ra rak cɔ́ mo. Aharon a rangas sebwep o mwa e ra kwɔn o.

²¹ Ko cɔ̌ mo tanga fwâ yege mo, a ra mɛ, sede a sé nára a Dagwi Darwey mɛ nɔrɔ, sede remo de Mose a ga kana nɔng nu.

²² Jeng de Aharon a ga tala nára nenɔrɔ mo mwa, a nára vɔ mɛ wɔ̀ sɛ̀ BeIsrayɛl, ko a tɛ̀ a yɛn nerat. Ko a gyirik yi e gàgbang rangas o.

²³ Mose na Aharon ba yel e bûk sangâl Dagwi. Jeng de yɛn a nusu e majey, ba tɛ̀ a BeIsrayɛl nerat, ko yɛn mwa ba di nedyɛt gbɔng nerat Dagwi Darwey.

²⁴ Ko kya ha vɛ̌ yi na Dagwi Darwey, ha re nɔrɔ̂ yas burang o tanga sebwep o de ya sé e ra gàgbang rangas o. Sede BeIsrayɛl ba di, ba gbɔ, ko ba gaba gup e vwel, na be nɔ̂ng Dagwi nerey.