Bepiris 8 - Bwok-basa Dagwi wuna-na-sira roso tanga pas

Tɛ́sɛ Aharon na nèy mɛ bepiris

¹ Dagwi Darwey a yâng Mose,

^2-3 “Vey na Aharon na nèy mɛ bewen o e rwi bûk sangal hom, ko vɔk ɛ berugu mo, na něy shushu, na bwôt mus yaga nɔrɔ̂ fûng banɛn, na beturuk beba mo tanga kaw de wa vɔk ɛ kpam-tuk sana géy-sing. Tula mwa regyɛng BeIsrayɛl e hwomo arɔng.”

⁴ Mose a ra sede remo de Dagwi Darwey a nɔng ɛ nu, ko BeIsrayɛl ba tula hɛn e rwi bûk sangâl Dagwi.

⁵ Mose kwong a yang ɛn, “Di, pyɛ ma yet de Dagwi Darwey a ga nɔng nu be ra.”

⁶ A tɛ̀ Aharon na nèy mɛ be vey e nuyel, ko a kus ɛn.

⁷ E bama mo, a tɛ̀ a Aharon gworugû ji mo gwolwis o, ko a tɛ̀ gyindi mo, a tɛ̀ a yɛ gworugû rak o na rugû fwom, ko a rɔgɔs gwɛ na gyindi de ba tɔrɔ wɛ.

⁸ Ano arɔng, a to tɛ̀ radîng gèy, ko a tɛ̀ Urim na Tumim e ji mo.

⁹ A tɛ̀ a yɛ torô kpin e rato, ko a rɔgɔs e ratili mɛ keborô dyam shinang de ka dura, Aharon a sé jaram yaga Dagwi. Mose a ra kayɛ pyɛ, sede remo de Dagwi Darwey a ga kana nɔng ɛ nu.

¹⁰ E bama mo, a jut něy shushu, a zagat mɛ buk na mwa pyɛ́ de ya sé e ji gwɛ; ano de a tik yɛ jaram yaga Dagwi.

¹¹ A to zagat e ra gàgbang rangâs yas zang taama na pyɛ̂ hɛ mwa, na gwopey kus vɔ tanga pyɛ tik gwɛ. Ano de a tik yɛ jaram yaga Dagwi.

¹² Ano arɔng, a shushu a Aharon něy e rato mɛ, na a tik ɛ mɛ jaram.

¹³ A to vey na nèy Aharon arɔng, a tɛ̀ a yɛn berugu belis mɛn, a tɛ̀ begyindi mo, ko a tɛ̀ a yɛn bebong mɛn, tyɛng na pyɛ de Dagwi Darwey a ga kana nɔng ɛ nu.

¹⁴ E bama mo, Mose a jut bwôt mus de bê nára vɔk na Dagwi yaga halâ banɛn, ko Aharon na nèy mɛ, ba tɛ̀ vɔ mɛn e ratô mus o.

¹⁵ Ba yɛrɛ wɛ, ko Mose a vɛ nemi mo, a tɛ̀ nɛ na kwɛn vwɔ mɛ e ra pyɛ́ de ya sé sede badûk gàgbang rangas o, na a fung mɛ hɛ, ko bwâng nemi mo mwa a losho nɛ e retîs kwɔn o. Yi ano de a tik kwɔn o jaram, na be tɔk ragas ɛ fwôm talâ-nɛn.

¹⁶ Mose a paa mwa sebwêp pyɛ̂ jim o, na cûng bwep de ya sé e ra yey o, tanga pyík o na bwêp yɛ̄, a rangas e ra kwɔn o.

¹⁷ Ko banamâ mus o, na rehwo mo tanga balagey na beving vɛ, ba rangas e bamâ jêy kwɔ̂n yê ngyɔk, sede remo de Dagwi Darwey a ga kana nɔng ɛ nu.

¹⁸ Ano arɔng, a jut gwining e ji beturuk o, womo de bê nára wɛ nɔrɔ̂ rangas burang, ko Aharon na nèy mɛ ba tɛ̀ vɔ mɛn e ratô wɛ.

¹⁹ Ba yɛrɛ turuk o, ko Mose a vɛ nemi mo, a waram nɛ e ra bahagat banaas vê gàgbang rangâs yas o.

²⁰ Ba yɛt banama mo bagap o bagap o, ko Mose a rangas bagap o na to mo, tanga sebwep o.

²¹ E bamâ kûs pyɛ̂ jim o tanga bol bama mo, ko Mose a rangas yɛ arɔng e ra gàgbang rangas o, sede remo de Dagwi Darwey a kana nɔng nu. Nɔrɔ̂ yas hemo de be rangas yɛ burang ha sè nɔrɔ̂ pyɛ̂ re, ko nesang hɛ na pɛngɛ a Dagwi Darwey yey.

²² E bama mo, Mose a jut turuk o woro, de wa sè yaga tɛ̂ bepiris, ko Aharon na nèy mɛ ba tɛ̀ vɔ mɛn e ratô wɛ.

²³ Ba yɛrɛ turuk o, ko Mose a vɛ nemi mo, ko a tɛ̀ a Aharon nɛ e kwɔng fwông vwɔ yege mɛ, tanga e ra kwɛn vwɔ rwey gwo yege mɛ, na e ra kwɛn bwol rwey mɛ gwo yege arɔng.

²⁴ Ano arɔng, ba tɛ̀ nèy Aharon ne gwɛ̌ sek bagat, ko Mose a to vɛ nemi mo, ko a tɛ̀sɛ nɛ e ra bakwɔng betong vɔ yege mɛn, na e ra beken vɔ berey mɛn ve yege, tanga e ra beken bol berey mɛn ve yege arɔng. Bwang o kwong, a waram nɛ e ra bakwɔng banaas vê gàgbang rangâs yas o.

²⁵ Ko a jut sebwêp turuk o, hɛ a hê rum o, na mwa sebwêp pyɛ̂ jim o, na cûng bwep de ya sé e ra yey o, tanga pyík o na bwêp yɛ, a to jut fwâ vwɔ yege mo.

²⁶ Yi e ji kaw de wa vɔk ɛ kpam-tuk sana géy-sing de wa sé e nuyêl gàgbang rangas yas, a jut regat kpam-tuk rining, na kegat kpam-tuk rɔkrɔk kining de ba tɛ̀ ɛ něy, tanga kpam-tuk bagasak gwining arɔng, ko a tɛ̀ mwa e ra sebwep o tanga e ra fwâ vwɔ yege mo.

²⁷ A tɛ̀ mwa pyɛ́ yemo e vɔ Aharon na nèy mɛ, ba ra mɛ, sede ba sé nára nɔrɔ.

²⁸ Ano, Mose a sey yɛ̄ yi e vɔ mɛn, ko a rangâs yɛ e ra gàgbang nɔrɔ̂ yas burang. Hemo mwa ha sé nɔrɔ̂ pyɛ̂ re de nesang hɛ na pɛngɛ a Dagwi Darwey yey.

²⁹ Ko Mose a jut cɔ̌ mo, a ra mɛ, sede ba sé nára nɔrɔ vɔk na Dagwi Darwey. Numo hê Mose a hane hê nɔrɔ̂ tɛ́sɛ bepiris, sede remo de Dagwi Darwey a kana nɔng nu.

³⁰ E bama mo, Mose a nɔ̀t ɛ něy shushu, na nemi de na sé e ra gàgbang rangâs yas o, ko a zagat nɛ̀ e ra Aharon na e ra berugu mɛ, tanga e ra nèy mɛ na berugu mɛn arɔng. Ano de a tɛ̀ Aharon tanga nèy mɛ na berugu mɛn be sè jaram yaga Dagwi Darwey.

³¹ Mose a yâng Aharon na nèy mɛ, “Jut in banama mo, wɔ mɛ e rwi bûk sangâl Dagwi, kyé in vɛ, ko yin re vɛ e hwomo mwa na kpam-tuk de wa sé e ji kaw, ye à nɔrɔ̂ tɛ́sɛ bepiris. Ano de Dagwi Darwey a ga kana nɔng nu.

³² Ko bwang banama kɛ kpam-tuk de wa pɔl, rangas hin yɛ.

³³ Yin hàla rwi bûk sangâl Dagwi wɛt pɔlɔ taama, sɛ̌ ba tala jeng tɛ́sɛ hin bepiris e ngyen.

³⁴ Pyɛ́ de wot a ga ra yunung, yɛ a pyɛ́ de Dagwi Darwey a nɔng nu, yaga na a hàla a yin mɛ banɛn min.

³⁵ Nàra hin e rwi buk o nagwi na naturuk pɔlɔ taama, ra in pyɛ́ de Dagwi Darwey a ga kana nɔng nu. Ka yin a ra ano wɛt, ko yin ê kushu. Pyɛ ma yemo de Dagwi Darwey a ga kana nɔng me nu.”

³⁶ Ano de Aharon na nèy mɛ ba ra tyɛng pyɛ́ de Dagwi Darwey a ga kana nɔ̂ng Mose nu.