Bepiris 6 - Bwok-basa Dagwi wuna-na-sira roso tanga pas

¹ Dagwi Darwey a to ha a Mose, a ye ngan:

^2-3 Ka sede mwat hwak a tono a mwât vwara mɛ e ra pyɛ de a bang a yɛ, kɛ a ka sey na a tik a yɛ, ka sede a ra bɔs e ra pyɛ de a shigi, kɛ e ra pyɛ de a mɔt, kɛ e ra pyɛ de a sɛ̀ ye mwât vwara mɛ de ya vuru hɛ, ko ka sede a sé shisa hɛ na bɔs e ra kayɛ e ji pyɛ́ yemo, ko a sé renɛn de a ra a Dagwi.

^4-5 Ka sede mwat a ra rining e ji banɛn o, ko gbing-gbing a tala a da mo mwa pyɛ́ de a sɛ̀ yi na yɛ e gwong bɔs gwomo. Jeng de ba tɔk renɛn mɛ mo, ko a rɔda tala pyɛ́ mo, ko ê to gwɛ̌ ɛ bak gwining e ji bebak betungun vê dyâm pyɛ́ yane mo.

⁶ E bama mo, tik na a vey na turuk de wa vɔk rām kɛ pyɛ cak vyes wɛt, kɛ a vey na dyam pyɛng de ya sé tyɛng na dyâm wɛ, ko a wɔ̀ nɔ̂ng piris, yaga nɔrɔ̂ talâ banɛn vɔk na Dagwi Darwey.

⁷ E bama de piris o a ra pyɛ de ya dura halâ banɛn yaga mwat o e nuyêl Dagwi Darwey, ko Dagwi a rɔda hala a yɛ.

Neha nehak e ra nɔrɔ̂ yas burang

⁸ Dagwi Darwey a to ha a Mose a yang ɛ,

⁹ a nɔ̂ng Aharon na nèy mɛ badu vemo ngan: Vemo vɛ a badu e ra begwông nása nɔrɔ̂ yas burang: Tik na pyɛ nɔrɔ̂ rangas o ye nàra e ra gàgbang rangas yas mwa naturuk sɛ̌ nagasi, ko kyâ kwɔn o he sǎ e de re.

¹⁰ Piris ê tɛ̀ berugu mɛ ve linen e ra rak tacuru byit. A rɔda hashe nefongôl kya de na tɛt ɛ e ra gàgbang rangas o, ko a shusha nɛ e hagât hɛ.

¹¹ E bama mo, a rɔda paa berugu vane mo, a tɛ̀ behak, ko a jut fongol o, na a wɔ̀ tik nɛ e kwɔn de ha sé haalal e bamâ jêy kwɔ̂n ye ngyɔk.

¹² Ba rɔda tik kyâ gàgbang rangas o he sè re, he kwon rimi hɛ wɛt. Kahɛ gasi, piris a rɔda gwɛsɛ cɔ́gɔt e kya mo, a to ngyɛrɛ banamâ yas de be rangas burang e ra hɛ, ko a to rangas ɛ sebwêp nenɔrɔ̂ wunâ nesa arɔng.

¹³ Kyâ gàgbang rangas o hê nára he sè re, be sang tik hɛ he rimi hɛ wɛt.

Neha nehak e ra nɔrɔ̂ nemuk

¹⁴ Vemo vɛ a badu e ra begwông nása nɔrɔ̂ nemuk: Tik na gwining e ji yére Aharon de a sé piris a nára pyɛ́ mo vɔk na Dagwi Darwey e nuyêl gàgbang rangâs yas.

¹⁵ A rɔda vɛ nemuk nerat de ba ga wuna nɛ na něy pyak e vwɔ tanga mwa pyɛ̂ nesang hyɔɔlɔl, ko a rangas yɛ e ra gàgbang rangas o. Hemo ha sé e tô mwa nɔrɔ de ha sé hê Dagwi Darwey. Nesang nɔrɔ hemo ne pɛngɛ a yɛ yey.

^16-17 Bepiris ba rɔda re bwang pyɛ́ mo. Ba rɔda yong kpam-tuk sana géy-sing, ko yɛn ê re wɛ e kwɔn de ha sé jɛrɛ e ji lalâ bûk sangâl Dagwi. Ya rɔda sè numo mɛn à hane hê nɔrɔ̂ pyɛ́ de be rangas, pyɛ́ de ya dal mwa na nejɛrɛ tyɛng sede banamâ nenɔrɔ̂ halâ banɛn kɛ talâ banɛn ow.

¹⁸ A sé e beras zɔng e ji yerê Aharon de bê tɔk re hɛ, yaga ha sé numo mɛn nesheneshey hê pyɛ de ba nára a Dagwi. Ko bwang bemat de ba ra pyɛ̂ nɔrɔ mo ba rɔda di gawey.

¹⁹ Dagwi Darwey a to ha a Mose

²⁰ badu vemo e ra tɛ́sɛ gwining e ji yére Aharon, piris. Yi e tuk de ba tɛ̀ ɛ piris o, tik na a vey na shǐ masa hê nemuk nerat yaga nása nɔrɔ̂ nemuk hê kahɛ tuk, ko a rɔda nára rebit o nagasi ko rebit o nawiri.

²¹ Ba rɔda suk nɛ na něy, ko be yong nɛ e ra rwêy dyam dɛdɛrɛng. E bama mo, a rɔda cɛgɛt kpam-tuk o, ko a nára nɔrɔ̂ nemuk o. Nesang nɔrɔ hemo ne pɛngɛ a Dagwi Darwey yey.

²² Kahɛ hwey wen e ji yere Aharon de a rɔda sey fwôm darwêy bepiris a rɔda yong, na a nára nɔrɔ hemo. Redu remo ra sé nesheneshey, ko ba rɔda rangas nɔrɔ mo hywiri vɔk na Dagwi Darwey.

²³ Kahɛ nɔrɔ̂ nemuk de piris a rɔda nára yaga to mɛ, ba rɔda rangas hɛ hywiri, be kwon re pyɛ cak e ji mo wɛt.

Neha nehak e ra nɔrɔ yaga banɛn

²⁴ Dagwi Darwey a to ha a Mose, a yang ɛ,

²⁵ a ha a Aharon na nèy mɛ ngan: Vemo vɛ a badu e ra begwông nása nɔrɔ̂ fûng banɛn: Tik na be yɛrɛ yas o e nuyêl bûk sangâl Dagwi Darwey e vwɔ yege gwô gàgbang rangâs yas, e kwɔn hining de be yɛt ɛ yas yaga nɔrɔ̂ yas burang. Hemo ha sé nɔrɔ de ha dal mwa na nejɛrɛ.

²⁶ Piris de a nára yas o a rɔda re e ji banama mo, a rɔda re vɛ e kwɔ̂n jɛrɛ e lalâ buk o.

²⁷ Ko bwang bemat de ba ra banama mo ba rɔda di gawey, ko ka sede nemi mo na tɔngtɔ e ra gworugu, ko gbing-gbing be wɔ̀ kus dem o e kwɔn de ha sé jɛrɛ.

²⁸ Rwey de ba kyé ɛ banama mo, ba rɔda mɔrɔ hɛ, ko ka sede ba kyé vɛ e ji rwêy dyam pama, ko be hagat hɛ hal, be rɛngtɛ hɛ na nshi.

²⁹ A sé e beras zɔng e ji belɔ̂ bepiris de bê tɔk re banama mo, a sé pyɛ de ya dal mwa na nejɛrɛ.

³⁰ Ko ka sede ba vey na nemî yas nɔrɔ mo e ji bûk sangâl Dagwi, na be ra mɛ fwôm talâ-nɛn e kwɔ̂n jɛrɛ, ko be kwon re banama mo wɛt, be rangas vɛ vit.