Bepiris 5 - Bwok-basa Dagwi wuna-na-sira roso tanga pas

Banɛn bahak tanga nenɔrɔ̂ fûng vɛ

¹ Be simo na mwat a nára nɔrɔ̂ fûng banɛn, ka sede a ra pyɛ cak e ji pyɛ́ yemo ngan: Ka sede ba yila mwat na a wɔ̀ nɔng nuha e duk shɔt, ko a kyɛ́ ɛ nà wɔ̀ ha pyɛ de a di kɛ a wok e ra yɛ, a ga ra renɛn à rane, ko ba rɔda kaba hɛ na rɛ.

² Kɛ mwat a ra pyɛ́ cak de ya sé ligis — kɛ gyeng a ra revîn ngyama kɛ rê yas kɛ rê pyɛ gabaga, mwa ano de yɛ a tɔk wɛt, a ga tɛ́ ɛ ligis, ko buru hane mo ha sé e ra to mɛ.

³ Kɛ mwat a ra pyɛ cak ye kayɛ yerê pyɛ ye mwasi de ya sé ligis, mwa ano de yɛ a tɔk wɛt, ko bama de a tɔk pyɛ de a ra, buru hane mo ha sé e ra to mɛ.

⁴ Kɛ gyɛng rɔ̌ mwat a pere sira e ra kayiyɛ pyɛ de be tɔk sira e ra yɛ, kɛ pyɛ cak ryat kɛ vyes o ow, sana bare hywɛ, ko bama de a tɔk pyɛ de a ra, buru hane ha sé e ra to mɛ.

⁵ Ka sede mwat hwak a ga di buru mɛ e ra kayɛ pyɛ e ji pyɛ́ yemo, a rɔda kulu renɛn o.

⁶ Ko tik na a vey na shep vyel pyɛng kɛ shi mo yaga talâ renɛn o, na a nára a Dagwi Darwey yɛ. Ko piris a rɔda ra pyɛ de ya dura talâ-nɛn yaga yɛ.

⁷ Ko ka sede mwat o a tɔk vey na vyel wɛt, ê tɔk vey na bewǔtut beba kɛ bebôt wunung beba vɔk na Dagwi Darwey yaga talâ renɛn de a ga ra. Bê nára gwining yaga renɛn o, ko gwining o, yaga nɔrɔ̂ pyɛ rangas burang.

⁸ Mwat o a rɔda wɔ na vɛ na piris de ê tanga nára gwining yaga nɔrɔ̂ fûng banɛn. A rɔda tsipta fwɔ gwɛ, ko de a pat to mo wɛt.

⁹ A rɔda zagat nemi mo nehak e ra hagât gàgbang rangâs yas, ko a piri bwang nemi mo e retîs hɛ. Hemo ha sé nɔrɔ yaga fûng banɛn.

¹⁰ Ko gwonon o gwo neba, a rɔda nára gwɛ nɔrɔ̂ pyɛ rangas burang e ra badu de ba nɔng. Ko piris a rɔda ra pyɛ de ya dura talâ-nɛn yaga renɛn de mwat o a ga ra, ko Dagwi a rɔda hala a yɛ rɛ.

¹¹ Ko ka sede yɛ mwat o a tɔk vey na bewǔtut beba kɛ bebôt wunung beba mo wɛt, ko tik na a vey na shǐ masa hê nemuk alkama nerat yaga nɔrɔ̂ halâ renɛn mɛ mo. A kwon tɛ̀ něy kɛ pyɛ̂ nesang hyɔɔlɔl e ra nɛ wɛt, yaga na sé nɔrɔ̂ fûng banɛn.

¹² A rɔda wɔ na nemuk o na piris, ko yɛ piris o a rɔda vɛ nɛ pyak e vwɔ e tô mwa nɔrɔ de ha sé hê Dagwi Darwey, ko a wɔ̀ rangas nɛ̀ e ra gàgbang rangâs yas tanga bwang nenɔrɔ̂ pyɛ̂ re de be nása vɔk na Dagwi Darwey. Hemo ha sé nɔrɔ yaga fûng banɛn.

¹³ Ko piris a rɔda ra pyɛ de ya dura talâ-nɛn yaga yɛ, ko Dagwi a rɔda hala a yɛ vɛ. Bwang nemuk nɔrɔ mo nê tɛ́ ɛn ne piris o, tyɛng sede remo de be ra e nɔrɔ̂ nemuk.

Nenɔrɔ talâ banɛn

¹⁴ Dagwi Darwey a to ha a Mose badu vemo ngan:

¹⁵ Ka sede mwat hwak a nɔ̂ng Dagwi Darwey dyām kɛ pyɛ́ de ya sé myɛ wɛt, ko a ga ra renɛn, mwa ano de a tɔk, a ra renɛn wɛt, ko tik na a vey a Dagwi Darwey na turuk de wa vɔk rām kɛ pyɛ cak vyes wɛt, na a tala mɛ renɛn rane mo. Ba rɔda sege wɛ na dyam pyɛng tyɛng na masâ dyâm bûk sangal Dagwi. Wa rɔda sè wo nɔrɔ yaga talâ banɛn.

¹⁶ Ko a rɔda gwɛ̌ dyām kɛ pyɛ́ yane de a ra renɛn e ra yɛ mo, ko a to gwɛ̌ zang hining e ji zang tungun hê dyâm pyɛ mo. A rɔda nɔ̂ng piris mwa pyɛ́ mo. E bama de piris o a ra pyɛ de ya dura talâ banɛn yaga mwat o, ko Dagwi a rɔda hala a yɛ renɛn mɛ.

¹⁷ Ka sede mwat hwak a ra renɛn sana tɔk, a ra pyɛ de Dagwi Darwey a yâng yɛ kyiri, mwa ano de a ra rɛ sana tɔk, ko a ga ra renɛn à rane, ko ba rɔda kaba hɛ na rɛ.

¹⁸ Tik na a pat turuk de wa vɔk rām kɛ pyɛ cak vyes wɛt, kɛ a vey na dyam pyɛng de ya sé tyɛng na dyâm wɛ, ko a wɔ̀ nɔ̂ng piris yaga nɔrɔ̂ talâ-nɛn. Ko piris o a rɔda ra pyɛ de ya dura talâ banɛn de mwat o a ra sana tɔk mɛ, ko Dagwi a rɔda hala a yɛ renɛn o.

¹⁹ Hane ha sé nɔrɔ̂ talâ banɛn yaga renɛn de a ra a Dagwi Darwey.