Bepiris 3 - Bwok-basa Dagwi wuna-na-sira roso tanga pas

Neha e ra nɔrɔ̂ wunâ nesa

^1-2 Ka sede mwat hwak a sé kyè wɔ̀ nára nɔrɔ̂ wunâ nesa vɔk na Dagwi Darwey, ko tik na a jut e ji berɔndɔng mɛ mus kɛ shep o, de wa vɔk rām kɛ pyɛ cak vyes wɛt. A rɔda tɛ̀ vwɔ mɛ e ra tô wɛ, ko ê yɛrɛ wɛ e nuyêl rwi bûk sangâl Dagwi Darwey. Gwining e ji yerê Aharon de a sé piris a rɔda waram nemi mo e mwa bebak gàgbang rangâs yas.

³ Ko a rɔda nára a Dagwi Darwey bagap vemo de ba sé bemɛ: mwa sebwêp pyɛ̂ jim o,

⁴ na pyík o na mwa bwêp yɛ̄, tanga cûng bwêp yey o de a rɔda paa mwa na pyík o.

⁵ Piris o a rɔda rangas pyɛ́ yane mwa tanga nɔrɔ̂ yas burang de ha sé e ra gàgbang rangâs yas o. Nesang nɔrɔ̂ pyɛ̂ re yemo ne pɛngɛ a Dagwi Darwey yey.

⁶ Ka sede nɔrɔ̂ wunâ nesa de ê nára mo ha sé yi e vyēl pyɛng kɛ vyēl shi ayi, ko tik na a jut rwas o kɛ hwā mo ayi, wane de wa vɔk rām kɛ pyɛ cak vyes wɛt.

^7-8 Ka sede a sé vyel pyɛng, ko tik na a vey mɛ, na a tɛ̀ vwɔ mɛ e ratô yɛ. Ko ê yɛrɛ yɛ e nuyêl bûk sangâl Dagwi. Ko piris a rɔda waram nemi mo e mwa bebak gàgbang rangâs yas.

⁹ Ko a rɔda nára a Dagwi Darwey bagap vemo de ba sé bemɛ, vɛ a mwa rum o de ba yɛrɛ yi e kup mā na sebwêp gwɛ, na mwa sebwêp pyɛ̂ jim o, mwa rum o — Rûm vyel pyɛng yerê BeIsrayɛl gwa vɔk sebwep pyak,

¹⁰ na pyík o na mwa bwêp yɛ, tanga cûng bwêp yey o de a rɔda paa mwa na pyík o.

¹¹ Piris o a rɔda rangas pyɛ́ yane mwa e ra gàgbang rangâs yas o, ya sé nɔrɔ̂ pyɛ̂ re vɔk na Dagwi Darwey.

^12-13 Ka sede nɔrɔ mɛ mo de a sé kyè wɔ̀ nára ha sé vyel shi, ko tik na a tɛ̀ vwɔ mɛ e ratô yɛ, na a yɛrɛ yɛ e nuyêl bûk sangâl Dagwi. Ko piris a rɔda waram nemi mo e mwa bebak gàgbang rangâs yas.

¹⁴ Ko a rɔda nára a Dagwi Darwey bagap vemo de ba sé bemɛ: mwa sebwêp pyɛ̂ jim o,

¹⁵ na pyík o na mwa bwêp yɛ̄, tanga cûng bwêp yey o de a rɔda paa mwa na pyík o.

¹⁶ Piris o a rɔda rangas pyɛ́ yane mwa e ra gàgbang rangâs yas o. Ya sé nɔrɔ̂ pyɛ̂ re, ko nesang yɛ ne pɛngɛ a Dagwi Darwey yey.

¹⁷ Mwa sebwep sa sé sê Dagwi Darwey. Yin kwon re sebwep kɛ nemi wɛt! Remo ra sé redu de yin tanga yére min yin ê gyeng rɛ nesheneshey e kahɛ kwɔn de yin ê sangal ɛ.