Bepiris 2 - Bwok-basa Dagwi wuna-na-sira roso tanga pas

Neha e ra nɔrɔ̂ nemuk

¹ Ka sede mwat hwak a vey na nɔrɔ̂ nemuk vɔk na Dagwi Darwey, ko tik na nɔrɔ mo he sè hê nemuk nerat. A rɔda shushu něy pwat e ra tɛt o, a tɛ̀ pyɛ̂ nesang hyɔɔlɔl e ra yɛ,

² ko a wɔ̀ nɔ̂ng bepiris vê yerê Aharon. Gwining e ji mɛn a rɔda vɛ nemuk o, de ba ga wuna nɛ na něy tanga mwa pyɛ̂ nesang hyɔɔlɔl pyak e vwɔ, ko a wɔ̀ rangas yɛ e ra gàgbang rangâs yas. Hemo ha sé e tô mwa nɔrɔ de ha sé hê Dagwi Darwey. Nesang nɔrɔ̂ pyɛ̂ re yemo ne pɛngɛ a yɛ yey.

³ Bwang nɔrɔ̂ nemuk o de ha tɛt ɛ hê tɛ́ ɛ hê bepiris; ha sé pyɛ de ya dal mwa na nejɛrɛ, yaga ba ga jut hɛ yi e pyɛ̂ re de ba nára a Dagwi Darwey yɛ.

⁴ Ka sede mwat hwak a vey na nɔrɔ̂ nemuk de ba yong hɛ e kwɔ̂n kyê kpam-tuk, ko tik na nemuk o ne sè nerat, sana géy-sing. Bē yong mɛ kpam-tuk rɔkrɔk de ba suk na něy, kɛ kpam-tuk bagasak de ba mɔmɔ na něy arɔng.

⁵ Ka sede be yong nɔrɔ mo e ra rwêy dyam dɛdɛrɛng, ko bē yong hɛ na nemuk nerat de ba suk na něy, sana géy-sing.

⁶ Gyam na be nára yerê kpam-tuk o, ko bē cɛgɛt wɛ, be shushu ɛ něy e ra wɛ. Hemo ha sé nɔrɔ̂ nemuk.

⁷ Ko ka sede be halang nɔrɔ mo e rwêy dyam, ko bē yong hɛ na nemuk nerat de ba suk na něy.

⁸ Bé tɔk nára a Dagwi pyɛ́ de ba yong e begwong vane. Bē vey mɛ na piris, yɛ kwong ê jut yɛ wɔ e gàgbang rangâs yas.

⁹ A rɔda vɛ nɔrɔ̂ nemuk o, a rangas hɛ e ra gàgbang rangas o e tô mwa nɔrɔ de ha sé hê Dagwi Darwey. Nesang nɔrɔ̂ pyɛ̂ re yemo ne pɛngɛ a Dagwi Darwey yey.

¹⁰ Bwang nɔrɔ̂ nemuk o de na tɛt ɛ nê tɛ́ ɛn ne bepiris. Na sé pyɛ de ya dal na nejɛrɛ, yaga ba ga nára a Dagwi Darwey nɛ.

¹¹ Yin kwon tɛ̀ géy-sing e ji kahɛ nɔrɔ̂ nemuk de yin e vey nára a Dagwi Darwey hɛ, yin kwon tɛ̀ géy-sing kɛ shok e ji pyɛ̂ re de yin ê nára a Dagwi nɔrɔ̂ yɛ wɛt.

¹² Jeng de yin ê vey a Dagwi Darwey na pyɛ́ yê mɛsɛng de yin a yɛt bwal o, yin e tɔk tɛ̀ géy-sing na shok, ko yin rangas yɛ̄ e ra gàgbang rangas yas wɛt.

¹³ Jeng de yin ê vey na nɔrɔ̂ nemuk, gbing-gbing yin tɛ̀ nevwashe e ra hɛ, yaga nevwashe ne dura, wuna-na-sira e tê Dagwi na yin ha sé hê neshey gbak-gbak. Tɛ̀ in nevwashe e ra mwa nenɔrɔ min.

¹⁴ Jeng de yin a sé kyè wɔ̀ nára a Dagwi Darwey nɔrɔ̂ pyɛ̂ mɛsɛng de yin a yɛt bwâl yɛ, ko nára hin yéneng pyɛ́ yane de yin a ga rangas, ko yin a to hwongo yɛ.

¹⁵ Shushu hin něy, ko tɛ̀ in pyɛ̂ nesang hyɔɔlɔl e yɛ arɔng. Hane ha sé nɔrɔ̂ nemuk.

¹⁶ Ko piris a rɔda vɛ pyɛ̂ yeneng yane de ba ga hwongo, de ba ga wuna yɛ na něy, tanga mwa pyɛ̂ nesang hyɔɔlɔl o, ê rangas yɛ e tô mwa nɔrɔ de ha sé hê Dagwi Darwey. Nesang nɔrɔ̂ pyɛ̂ re yemo ne pɛngɛ a Dagwi Darwey yey.