Bepiris 11 - Bwok-basa Dagwi wuna-na-sira roso tanga pas

Neha e ra yas na ngyāma de bê re

¹ Dagwi Darwey a ha a Mose na Aharon, a yang ɛn,

² yɛn a ha a BeIsrayɛl badu vemo ngan: E ji yas kɛ ngyāma de ya sé e ji jey,

³ yin ê tɔk re yemo de ya vɔk shashap bekwǒk bol, ko ye tē gbuk a pyɛ́ arɔng.

^4-6 Ko yin re bemaryat, na shonong, tanga befey wɛt. Mwa ano de ye tē gbuk a pyɛ́, ko ya vɔk shashap bekwǒk bol wɛt, ya sé kyiri na yin.

⁷ Yin re bezà arɔng wɛt. Mwa ano de ba vɔk shashap bekwǒk bol, ko be tē gbuk a pyɛ́ wɛt, ba sé kyiri na yin.

⁸ Yin re banamâ ngyāma yemo wɛt, yin ka ra bavîn yɛ̄ wɛt, ya sé kyiri na yin.

⁹ Yin ê tɔk re pyɛ́ cen de ya sé e ji nshi ne gworep kɛ nerɔt, yemo de ya vɔk bafabak na gafosok zɔng.

¹⁰ Ko kayɛ pyɛ cen de ya vɔk bafabak na gafosok wɛt, yin re yɛ wɛt, ya sé byɛm-byɛm na yin.

¹¹ Yin re banamâ yɛ̄ wɛt, bavin yɛ̄ ba sé byɛm-byɛm arɔng.

¹² Ano, gas in na kayɛ pyɛ e ji nshi de ya vɔk bafabak na gafosok wɛt.

^13-19 E ji yére benon, behak ba sé de yin ê re ko tyɔng wɛt, ba sé byɛm-byɛm na yin, vɛ̀ à bekim, na berap, na bekwɛng, na bedúrutsung, na ying-gyi na bwang yerê benon vôs pyɛ́ cen, tanga bejagawey, na behwǎk; na bwang yerê benon de be re bavîn pyɛ́, tanga behántɔ̀k, na bekǔl, na bwang yerê benon vôs betɔk, mwa na bengyuwa na berǎrit.

²⁰ Mwa pyɛ́ de ya vɔk bafabak na bol sede bèkwɔshey, ya sé byɛm-byɛm na yin.

²¹ Ko pyɛ́ de ya vɔk bafabak na bol de be tē cat, yin ê tɔk re.

²² Yɛ à yɔ́rɔ, na yéng tanga rawal e ra yerê yɛ.

²³ Ko mwa bwang shɛl o de ya vɔk bafabak na bol ya sé kyiri na yin.

^24-28 Kawɛ mwat de a ra revîn ngyama de ya vɔk bekwǒk shashap wɛt, kɛ ye tē gbuk a pyɛ́ wɛt, na mwa yemo de ya vɔk bol naas, ya to vɔk bekɛn bol, ê tɛ́ ɛ ligis vɔk e nawiri. Kawɛ de a jut revîn cak e ji yɛ̄, a kus berugu mɛ, ko mwa ano, ê nàra ligis vɔk e nawiri.

^29-30 Pyɛ̂ gabaga yemo ya sé kyiri na yin: à begàl, na cū, na beva, na begutsang, na belɛ̌mɛs, na bebǒm, tanga bèkosom.

³¹ Mwa mwat de a ra yɛ̄ kɛ revîn yɛ̄ ê tɛ́ ɛ ligis vɔk e nawiri.

³² Ko ka sede revin o ra gaba e ra pyɛ cak, pyɛ mo yê tɛ́ ɛ ligis, kɛ a sé e cɔgɔt, kɛ rugu, kɛ rehwo, kɛ dap, kɛ fwôm sɛ́ de be ra mɛ ayi, bē tɛ̀ yɛ̀ e ji nshi, ko yê sǎ ligis vɔk e nawiri.

³³ Ka sede revîn cak ra gaba e ra rwêy bwos, kayɛ pyɛ de ya sé e ji hɛ yê tɛ́ ɛ ligis, ko hwo mɔrɔ rwey o.

³⁴ Kayɛ pyɛ re de nshî rwey o na losho hɛn ɛ, yê tɛ́ ɛ ligis; nshî sɔ̂ nerwey o na sé ligis arɔng.

³⁵ Kayɛ pyɛ de revîn cak e ji pyɛ́ yemo ya gaba e ra rak o yê tɛ́ ɛ ligis, ka sede a sé repik kɛ kwɔ̂n kyê kpam-tuk ayi, ko bē wey na vɛ.

³⁶ Ka sede revîn cak ra gaba e ji lwel kɛ revû nshi, lwel na revú mo bê nàra haalal, ko mwat de a pat revin o, ê tɛ́ ɛ ligis.

³⁷ Ka sede revîn cak ra gaba e ra yére, ko yére mo yê nàra haalal.

³⁸ Ko ka sede yére mo ya sé e sing e ji nshi, ko revîn cak ra gaba ɛ, yére mo yê sè ligis na yin.

³⁹ Ka sede e ji yas de be simo yin re ya ku, ko kawɛ mwat de a ra yɛ, ê tɛ́ ɛ ligis vɔk e nawiri.

⁴⁰ Ko womo de a re banama mo, a kus berugu mɛ, ko yɛ pyɛ mɛ ê nàra ligis vɔk e nawiri; mwat de a jut revin o, a kus berugu mɛ, ko ê nàra ligis vɔk e nawiri.

^41-42 Yin re pyɛ cak e ji pyɛ shɛl yê gabaga wɛt. Kɛ kayɛ mo de yé hwɔlɔ jim e vwel, kɛ yemo de ye kyè e ra bol naas, kɛ yinde ya vɔk bol pyak, ya sé pyɛ̂ byɛm-byɛm na yin.

⁴³ Yin tɛ̀ bato min ligis yi na rê pyɛ́ cak e ji yemo mo wɛt; ka ano wɛt, ko yin ê sè a me byɛm-byɛm.

⁴⁴ Me ma sé Dagwi Darwey, Dagwi min. Tík in bato min jaram, na yin sè jɛrɛ, yaga me ma sé jɛrɛ. Yaga ano, yin tɛ̀ bato min ligis wɛt yi na kayɛ pyɛ gabaga.

⁴⁵ E me wɛ à Dagwi Darwey de ma nusu na yin yi e sevwêl Misra, na me se Dagwi min. Sè in jɛrɛ, yaga me ma sé jɛrɛ.

⁴⁶ Badu ma vemo e ra yas na benon, tanga kayɛ pyɛ de ya sé e ji nshi, na kayɛ pyɛ de ye kyě kyè e vwel.

⁴⁷ Di, badu mo bê sɛlɛ hin, na yin gas e tê pyɛ́ de ya sé haalal na yemo de ya sé ligis, na pyɛ́ cɛn de ya sé ryat yaga re, na yemo de ya sé kyiri arɔng.