Nɩ-tʋnɩsɩ tʋmɔ Sɛbɛ 23 - A NAAŊMƖN PƲLƖ̃-TA-PAALAA

¹ A Pol ꞌwuorʼã a *ƴɛr-guor-nɩ-bɛrɛ ɩ̃ yel: “Yɛɛr, Ɩ̃ tɛrɛ na a tɩɛrʋ̃ jom cere nɩ a Naaŋmɩn nii-sɔw wa ta nɩ a dɩnaa bibirʼã.”

² Ɩ̃-cɛ a Ananɩya na ɩ a *baar-lo-nɩ-kpɛ̃ɛ yelʼã a bala na pɩɛl a Pol a ba ɓa ʋ nʋɔr pʋɔ.

³ A Pol yel ʋ: “Fʋna dacin pɩlaa na! A Naaŋmɩn ɩ̃ na ɓa fu. Fu jɛ na ka de a Mowisi ƴɛr-kpɛn guoro nɩ a ɩ̃ ƴɛrɩ̃, ɩ̃ na fu lɛ sãwna a ana ƴɛr-kpɛn na fu yel a ba ɓa ma.”

⁴ A bala na ɩraa a be yelʼã a Pol: “A Naaŋmɩn baar-lo-nɩ-kpɛ̃ɛ fu tʋrɔ?”

⁵ A Pol yel ba: “Yɛɛr! Maa dãa bɔ̃w ka ʋ ɩ na Naaŋmɩn baar-lo-nɩ-kpɛ̃ɛ wa. A-na-ɩ a yelʼã a Naaŋmɩn Sɛbɛ pʋɔ: ‘Taa ƴɛrɛ a ƴɛr-fãa ƴɔnɔ a fu nɩbɛ nɩ-kpɛ̃ɛ wa.’ ”

⁶ A Pol bɔ̃w ka a ƴɛr-guor-nɩ-bɛrɛ ŋmɛɛ ɩ na a *Saduse nɩbɛ ɩ̃ a ŋmɛɛ ɩ a Farɩsɩ. Ala-ɩ̃-sɔ ʋ ƴɛrʼɩ̃ kpɛ̃w a ba nii-sɔw: “Yɛɛr, Farɩsɩ nɩrɛ ɩ̃ ɩ, a *Farɩsɩ nɩbɛ na dɔw. A tɩɛrʋ̃ son ɩ̃ na tɛrɛ áa nɩbɛ na irʼã a kũu pʋɔ, ala ɩnɛ ba guoro ma.”

⁷ A mɩnɛ ʋ na ƴɛr a lɛ, a Farɩsɩ nɩbɛ nɩ a Saduse nɩbɛ faa na taa ɩ̃ ŋma kpee kpee,

⁸ a-na-ɩ a Saduse nɩbɛ ma yelʼã á kũusɩ ma ire a kũu pʋɔ wa, ɩ̃ ma mɩ yel áa Naaŋmɩn sɩ-tʋnɩsɩ nɩ a sɩɩr ma mɩ be be wa, ɩ̃-cɛ a Farɩsɩ nɩbɛ tɩɛrɛ na áa jaa be na be.

⁹ A gɔ̃-pɔɔr nyɩrɩ̃ na duoro, ɩ̃ a *ƴɛr-kpɛn-bɔɔnbɔ ŋmɛɛ na ɓã a Farɩsɩ nɩbɛ irʼã ma sɔw wa, ɩ̃ yel: “Saa nyɛ a daba na sãwfʋ jie wa. A nʋmɔ-wa-sɔw a sɩɛ bom ʋ nyɛ ʋ ƴɛrʼɩ̃ ʋ, mɩɩ a sɩ-tʋnaa ɩ̃ ƴɛrʼɩ̃ ʋ.”

¹⁰ Ɩ̃ a mɩnɛ a faa-taa na nyɩrɩ̃ kpɛmɛ, dãbɩ̃ɛ nyɔw na a sɔdaalsɩ nɩ-kpɛ̃ɛ ʋ tɩɛr beeka ba na taw na a Pol ɓɛl, ala-ɩ̃-sɔ ʋ yel a sɔdaalsɩ a ba suu cen na faa a Pol a nɩ-yaw sɔ̃w wɩ nɩ a sɔdaalsɩ yir.

¹¹ A dɩvɩɛ bio tɩsɔw, a Nɩ-kpɛ̃ɛ nyɩrʼã a Pol ɩ̃ yel ʋ: “Tɛrɛ ꞌlafʋ! A mɩnɛ fʋ na dãa ƴɛr a yel-mɩ̃ɛ ƴɛrɩ̃ a ɩ̃ ɩnɛ a ka a Jerujalɛm, a sɛw na a fʋ na mɩ ƴɛr a lɛ a Orom-tẽw pʋɔ.”

A POL KUFƲ BA NA GORO

¹² A bio vɩɛ na, a Jufisɩ duo goro taa. Ba pɔrɔ na yele nɩ: “Saa dɩrɛ bom wa, saa mɩ nyuure bom wa, wa tara nɩ a lɛ sɩ na kúrɔ a Pol.”

¹³ A bala na goro taa po na nɩbɛ lɩjaayi.

¹⁴ Ba cenʼã a *baar-lo-nɩ-bɛrɛ nɩ a Jufisɩ ni-dierbe jie na yel ba: “Sɩ pɔ na ƴɔ̃w a sɩ mɩ̃ɛ a saa dɩrɛ bom wa, wa tara nɩ a lɛ sɩ na kúrɔ a Pol.

¹⁵ Ala-ɩ̃-sɔ a nyɩmɩ nɩ a *ƴɛr-guor-nɩ-bɛrɛ, nyɩ́ sʋɔr a sɔdaalsɩ nɩ-kpɛ̃ɛ a ʋ taw a Pol wa nɩ a nyɩ jie, maala nɩ wɔ̃ taa nɩ nyɩ bʋɔrɔ na nyɩ ꞌlo bɔ̃w a ʋ ƴɛrɩ̃ par. Ɩ̃ a sɩmɩ, sɩ na gu ʋ na a sɔr pʋɔ na sɩ kú ʋ, ʋ kɔ̃ ta a nyɩ jie wa.”

¹⁶ Ɩ̃-cɛ a Pol arbile wõ na a ʋna gorfʋ, ɩ̃ cen a sɔdaalsɩ yir na kpɛ man kʋ a Pol.

¹⁷ A Pol bʋɔlʼã a sɔdaal-nɩ-kpɛ̃ɛ kãw yel ʋ: “Taw a polbile na cenʼɩ̃ a fʋ nɩ-kpɛ̃ɛ jie, a-na-ɩ ʋ tɛrɛ na ƴɛrɩ̃ na ƴɛr ʋ.”

¹⁸ A sɔdaal-nɩ-kpɛ̃ɛ ʋlɔ taw ʋ a ba lãa cen a sɔdaalsɩ nɩ-kpɛ̃ɛ sɛ̃, ʋ yel ʋ: “A Pol sɩ na tɛrɛ a ka a kasu pʋɔ, ʋlɔ ɩ̃ bʋɔl ma yel á ɩ̃ tɛrɛ a polbile na wa nɩ a fʋ sɛ̃, a ʋ tɛrɛ na ƴɛrɩ̃ na ƴɛr fʋ.”

¹⁹ A nɩ-kpɛ̃ɛ taw a polbile ʋlɔ yi nɩ ji-kpee ɩ̃ soor ʋ: “Bõ ƴɛrɩ̃ fʋ tɛrɛ ƴɛrɛ ma?”

²⁰ Ʋ yel ʋ: “A Jufisɩ guorʼã taa a ba na sʋɔr fʋ na a fʋ taw a Pol wɩ nɩ a bio a ƴɛr-guor-nɩ-bɛrɛ nii-sɔw, bɛlɛ nɩ fʋ a ba bʋɔrɔ na ba lɛ soor ʋ bɔ̃w a ƴɛrɩ̃ par.

²¹ Ɩ̃-cɛ, taa sɔw wa. A-na-ɩ a ba nɩbɛ po na lɩjaayi na sɛw ba var gu ʋ. Ba pɔ na ƴɔ̃w a ba mɩ̃ɛ a baa dɩrɛ bom wa, a baa mɩ nyuure bom wa, wa tara nɩ a lɛ ba na kúrɔ ʋ. Ba gbɛɛrɩ̃ na baar a ƴɛ̃ƴɛrɩ̃ ɩ̃ cɛlɛ a fʋ sɔwfʋ.”

²² A sɔdaalsɩ nɩ-kpɛ̃ɛ kpãkpan a polbile a ʋ taa wa ƴɛrɛ a ʋna ƴɛrɩ̃ ʋ na ƴɛr kʋ ʋ kʋrɔ nɩrɛ wa, ɩ̃ bar ʋ ʋ cen.

A POL BA NA CENʼƖ̃ A TẼ-ꞌWUORO FELISI SƐ̃

²³ A sɔdaalsɩ nɩ-kpɛ̃ɛ bʋɔlʼã a ʋ sɔdaal-nɩ-bɛrɛ ayi ɩ̃ yel ba: “Nyɩ́ gbɛɛrɩ̃ sɔdaalsɩ kɔɔr ayi a Sejare cenfʋ ɩnɛ, nɩ a wibe deme lɩjaata nɩ pie, nɩ a kãpime deme kɔɔr ayi, a nyɩ cen a tɩsɔw.

²⁴ Nyɩ́ mɩ de a wibe a Pol ɩnɛ ʋ na do a nyɩ cenʼɩ̃ ʋ vɩlaa a tẽ-ꞌwuoro Felisi sɛ̃.”

²⁵ Ɩ̃ ʋ sɛbʼã a sɛbɛ na tɩɩr:

²⁶ “A maa Kilodi Lɩsɩyasɩ ɩ̃ tɩɩr a sɛbɛ na kʋ a fʋ̃ʋ Felisi na ɩ a tẽ-ꞌwuoro. Ɩ̃ puor fʋ na vɩlaa.

²⁷ A Jufisɩ dãa na nyɔw a daba na bʋɔrɔ ba kú ʋ. Ɩ̃-cɛ a lɛ ɩ̃ na wõ ʋ ɩ a Orom nɩrɛ, ɩ̃ de na a ɩ̃ sɔdaalsɩ cenʼɩ̃ faa nɩ ʋ.

²⁸ Ɩ̃ a mɩnɛ ɩ̃ na bʋɔrɔ ɩ̃ bɔ̃w a bom na ɩnɛ a Jufisɩ na ƴɔnɔ ʋ a ƴɛrɩ̃sɩ, ɩ̃ taw ʋ na cenʼɩ̃ a ba *ƴɛr-guor-nɩ-bɛrɛ nii-sɔw,

²⁹ na ɩ̃ nyɛ bɔ̃w ka a ba ƴɛr-kpɛn ɩnɛ ba ƴɔnɔ ʋ a ƴɛrɩ̃; ɩ̃-cɛ saa nyɛ sãwfʋ a ʋ jie na ƴɔnɔ ʋ a kũu pʋɔ mɩɩ a kasu pʋɔ wa.

³⁰ Ɩ̃ a lɛ ɩ̃ na wõ a Jufisɩ goro a daba na, ɩ̃ ƴɔ̃w na a ba taw ʋ wɩ nɩ a fʋ sɛ̃ a jie naan. Ɩ̃ mɩ yelʼã a ʋ ƴɛr-ƴɔnbɔ a ba mɩ wɩ na ƴɛr a ba ƴɛrɩ̃ a fʋ mɩ wonaa.”

³¹ A sɔdaalsɩ de na a Pol a tɩsɔw cenʼɩ̃ a Ãtɩpatɩrɩ, a mɩnɛ ba na yel ba.

³² A bio vɩɛ na, a sɔdaalsɩ bala na cere nɩ a gbɛɛ lɩɛb kule ɩ̃ bar a wibe deme a ba cere nɩ a Pol.

³³ A lɛ ba na ta a Sejare, ba de na a sɛbɛ kʋ a tẽ-ꞌwuoro ɩ̃ mɩ de a Pol ƴɔ̃w a ʋ nuumɩ.

³⁴ A lɛ a tẽ-ꞌwuoro na ꞌwuor a sɛbɛ baar, v soorʼã a Pol a tẽ-buor v yi, v yel v a Sɩlɩsɩ wɩɛr v yi.

³⁵ A tẽ-ꞌwuoro yel ʋ: “A fu ƴɛr-ƴɔnbɔ ɩ̃ wa ta, ala ɩ̃ na guor a fu ƴɛrɩ̃,” ɩ̃ na v ƴɔ̃w a ba gu a Pol a yir kpɛ̃ɛ ʋlɔ pʋɔ a jamana *Ɛrɔdɩ na dãa mɛ.