Nɩ-tʋnɩsɩ tʋmɔ Sɛbɛ 14 - A NAAŊMƖN PƲLƖ̃-TA-PAALAA

A POL NƖ A BANABASƖ A ƖKƆNƖYƆ̃-TẼW

¹ A be a Ɩkɔnɩyɔ̃, a lɛ a Pol nɩ a Banabasɩ mɩ kpɛ a Jufisɩ *puorfʋ yir, ɩ̃ ƴɛr a ƴɛrɩ̃ a maal a nɩ-yaw, a Jufisɩ nɩ a nɩ-bʋlsɩ, a ba sɔw de a *Jeeju.

² Ɩ̃-cɛ a Jufisɩ bala na jaar tɔrɔ na a nɩ-bʋlsɩ ƴɔnɔ a yɛɛr, maalʼɩ̃ ba a ba tɩɛrɛ a tɩɛrɩ̃-faar ƴɔnɔ ba.

³ A Pol nɩ a Banabasɩ jɛ na a be a Ɩkɔnɩyɔ̃ kam, ɩ̃ bar nyãa ƴɛrɛ nɩ a ƴɛrɩ̃sɩ a Nɩ-kpɛ̃ɛ ɩnɛ. A Nɩ-kpɛ̃ɛ miilʼã a ʋ wɩɛfʋ ƴɛrɩ̃ ba na ƴɛrɛ a ɩ sɩrɛ, a mɩnɛ ʋ na kʋ ba a fãw a ba maala nɩ a nɔ-kofʋ tʋmɔ na miile a ʋ kpɛ̃w.

⁴ A tẽw ʋlɔ nɩbɛ ŋma na ayi. A ŋmɛɛ sɔw na a Jufisɩ ƴɛrɩ̃, ɩ̃ a ŋmɛɛ sɔw a *nɩ-tʋnɩsɩ ƴɛrɩ̃.

⁵ A Jufisɩ nɩ a nɩ-bʋlsɩ nɩ a ba nɩ-bɛrɛ jaa bʋɔrɔ na ba maal a Pol nɩ a Banabasɩ fãa a ba lɔbʼɩ̃ ba a kubie kú.

⁶ Ɩ̃-cɛ a Pol nɩ a Banabasɩ bɔ̃wnaa na ɩ̃ jɔ cen a Lɩsɩtɩ nɩ a Dɛrbɩ na be a Lɩkawnɩ wɩɛr, wa cen na ta nɩ a ana ten na tiw kolĩ ba.

⁷ Be ba nyɔw ɩ̃ ƴɛrɛ a Naaŋmɩn ƴɛr-son.

A POL NƖ A BANABASƖ A LƖSƖTƖ-TẼW

⁸ Daba be na be a Lɩsɩtɩ ma jɛ a-na-ɩ ʋ gbɛrʼã. Wa nyɔw nɩ a ʋ bibile daar ʋ maa tʋɔ cen fɩ̃ɩ wa.

⁹ Ʋ cɛlɛ na a ala a Pol na ƴɛrɛ, a Pol ꞌwuor ʋ kir-kir-kir ɩ̃ nyɛ ʋ ʋ tɛrɛ a ƴɔ̃w-nyãa sɛw na kpɛmɛ.

¹⁰ Ala-ɩ̃-sɔ ʋ yel a daba nɩ kpɛ̃w: “Ir ɩraa dẽdẽ!” ʋ ka ir cere.

¹¹ A lɛ a nɩbɛ na nyɛ a ala a Pol na maal, ba wuure na nɩ a Lɩkawnɩ-tẽw ƴɛrɩ̃ yele nɩ: “A naaŋmɩnsɩ lɩɛbʼã wɔ̃ a nɩbɛ kaarɩ̃ suu a sɩ sɛ̃!”

¹² Ba de na a Jesi na ɩ a ba naaŋmɩn kãw yuor bʋɔlɔ nɩ a Banabasɩ, ɩ̃ mɩ de a ba naaŋmɩn Ɛrmɛsɩ yuor bʋɔlɔ nɩ a Pol, a-na-ɩ ʋlɔ ɩ̃ ɩ a ƴɛƴɛrɛ.

¹³ A Jesi ʋlɔ *puorfʋ yir be na a tẽw nʋɔr, ɩ̃ a ʋ baar-loro de na a nadɛɛ ba na yarɩ̃ a tɩ-pube, wɩ nɩ be a dɔ̃dɔr nʋɔr, bʋɔrɔ a ʋlɔ nɩ a tẽw nɩbɛ ba lo a baar kʋ a Banabasɩ nɩ a Pol.

¹⁴ Ɩ̃-cɛ a lɛ a Banabasɩ nɩ a Pol na wonaa, ba ɓerʼã a ba cẽcene ɩ̃ jɔ kpɛ a nɩbɛ sɔ̃w ɩ̃ wuure

¹⁵ yele nɩ: “Sɩ badɛɛ, bõ ɩnɛ nyɩ maala a lɛ? A nɩbɛ sɩ mɩ ɩ a nyɩ kaarɩ̃. Sɩ wa nɩ na a Naaŋmɩn ƴɛr-son kʋrɔ nyɩ yele nɩ nyɩ á nyɩ bar a ana yel-pɔrsɩ ɩ̃ lɩɛb puoro a Naaŋmɩn-mimir ʋlɔ na maal a saꞌlon nɩ a tene nɩ a man kpɛ̃ɛ nɩ a yele a jaa na be a ba pʋɔ.

¹⁶ A korĩ-cɛ ʋ dãa na bar a nɩbɛ ba jaa a ba tuure a ba mɩ̃ɛ sɔɛ,

¹⁷ ɩ̃-cɛ a daar a jaa ʋ ma maala na a ʋ tʋ̃-vɛlɛ miile nɩ a nɩbɛ a mɩnɛ ʋ na wɔ̃. Ʋ ma barʼã a saa ʋ yi a saꞌlon ɩ̃ wa a sɩ ɩnɛ, a tẽw ƴɔ a sɩ pɔw a yele. Ʋ ma kʋ sɩ na a bõ-dɩraa nɩ a nʋ̃ɔ a ƴala sɩ.”

¹⁸ A Pol nɩ a Banabasɩ na saarɩ̃ ƴɛr a lɛ ɩ̃-cɛ a cãa na kpɛmɛ ɩ̃ a ba pãa tʋɔ pɩɛrɩ̃ a nɩbɛ bar a baa lo a baar kʋ ba wa.

¹⁹ A Jufisɩ yi na a Ãtɩyɔsɩ na be a Pisidi wɩɛr nɩ a Ɩkɔnɩyɔ̃ ɩ̃ wa na lɩɛb a nɩbɛ tɩɛrɩ̃sɩ a ba lɔbɔ a Pol nɩ a kʋsɩɛ bʋɔrɔ ba kú ʋ. Ɩ̃ ba vu ʋ na yi nɩ a tẽw cɛ̃cɛ̃w na bar, a-na-ɩ ba tɩɛrʼã beeka ʋ kpi na.

²⁰ Ɩ̃-cɛ a lɛ a popuorbo na tiw kolĩ ʋ, ʋ irʼã lɛ kpɛ a tẽw pʋɔ ɩ̃ a lɛ a bio na vɩɛ, a ʋlɔ nɩ a Banabasɩ yi na cere a Dɛrbɩ-tẽw.

A POL NƖ A BANABASƖ NA LƖƐB CEN A ÃTƖYƆSƖ

²¹ A Pol nɩ a Banabasɩ ƴɛrʼã a Naaŋmɩn ƴɛr-son a Dɛrbɩ-tẽw maalʼɩ̃ a nɩ-yaw a ba lɩɛb ɩ a *Jeeju *par-tuurbe. A ala ɩ̃ baar, ba lɛ lɩɛbʼã cen a Lɩsɩtɩ nɩ a Ɩkɔnɩyɔ̃ nɩ a Ãtɩyɔsɩ.

²² Ba maalʼã a popuorbo a ba nyɩrɛ cere nii-sɔw yele nɩ ba á ba bɔ̃w ɩraa a puorfʋ sɔr pʋɔ. Ba lɛ yel ba na áa sɛw na a sɩ na nyɛ won yaw ɩ̃ pãa kpɛ a Naaŋmɩn fãw pʋɔ.

²³ A jiir a jaa, ba vɛlʼã ir ni-dierbe a *duo-puorbo sɔ̃w biin a ba ɩnɛ, ɩ̃ a lɛ ba na lũ a nʋɔr ɩ̃ sʋɔr a Naaŋmɩn baar, ba de ba na ƴɔ̃w a Nɩ-kpɛ̃ɛ ʋlɔ ba na sɔw de nuumɩ.

²⁴ A Pol nɩ a Banabasɩ lɛ tɔlʼã yi a Pisidi wɩɛr ɩ̃ ta a Pãfɩlɩ.

²⁵ Ba ƴɛrʼã a Naaŋmɩn ƴɛrɩ̃ a Pɛrjɩ-tẽw ɩ̃ cen a Atalɩ.

²⁶ A be, gbor ba kpɛ cen a Ãtɩyɔsɩ na ɩ a tẽw ʋlɔ a duo-puorbo na dãa de ba ƴɔ̃w a Naaŋmɩn nuumɩ ʋ sũo ba a tʋn ʋlɔ pʋɔ ba na maal baar a ƴɛ̃ƴɛrɩ̃.

²⁷ A lɛ ba na ta a Ãtɩyɔsɩ, ba bʋɔlʼã a duo-puorbo tiw ɩ̃ man ba a ala a jaa a Naaŋmɩn na de ba maalʼɩ̃, nɩ a mɩnɛ ʋ na yuo a sɔr kʋ a nɩ-bʋlsɩ a ba na mɩ tʋɔ sɔw de a Jeeju.

²⁸ Ba jɛ na be kam a popuorbo sɛ̃.