Mikunga 3 - BIBILIYA NA KITUBA

Mpulusu ke katukaka na Yave

1 Mukunga yina Davidi yimbilaka na ntangu yina yandi vwandaka kima Abesalome, mwana ya yandi .

¹ Mukunga yina Davidi yimbilaka na ntangu yina yandi vwandaka kima Abesalome, mwana ya yandi.

² Yave, mitantu ya munu kele mingi! Bayina ke na kunwanisa munu, bawu kele mingi!

³ Na yina me tadila munu, mingi ke na kutuba: «Nzambi ke vuukisa ve yandi!» Kupema

⁴ Kasi nge Yave, nge kele kinwanunu ya munu yina ke kebaka nzutu ya munu. Nge kele nkembo ya munu, nge ke pesaka munu lunungu.

⁵ Ntangu mu ke lookaka na sika ya Yave, yandi ke pesaka munu mvutu, katuka kuna na mongo ya yandi ya longo. Kupema

⁶ Ntangu mu ke lalaka, mu ke kuzwaka mpongi, mu ke vumbukaka, samu ti Yave kele kiyekamanu ya munu.

⁷ Mu kele ve na boma ya bantu ya mingi-mingi yayi, yina me zunga munu samu na kunwanisa munu.

⁸ Yave, telama! Nzambi ya munu, vuukisa munu! Ya tsyelika, nge ke bulaka bambeni ya munu nyonso na ditama, nge ke mwangisaka meno ya bantu ya yimbi.

⁹ Yave, mpulusu ke katukaka na sika ya nge. Bika ti lusakumunu ya nge kuvwanda na bantu ya nge! Kupema