Titu 1 - Panga ea Kya 1895

¹ PÂLU, uhayi mwa Anyambě, n‘ utodu mwa Jisu Kraist, hohonganěngo o ikamidě ja ba Anyambě ba di pânângo, n‘ ihilinganě ja pâkwě‐pâkwě e jadi hohonganěngo na itingidi vya Anyambě.

² N‘ ipite ja eměnâ e ha lenaka, ya Anyambě e ha jowaka, e yohanakidě o vyo vyo, na vyo vyo:

³ ndi a levakiděndi o bepedi byaju mětě, bya hohonganěngo, ndaga jaju n‘ ipakwaniya, i di mba bweyudwěngo hohonganěngo n‘ ivanga j‘ Anyambě Uhungini mwahu.

⁴ O Titu, mwan‘ amě mětě o ikamidě ja hwě běhěpi: Ehekwě, ngěbě, na jonga oviya Anyambě ya Hangwě n‘ Upangiyi Jisu Kraist, Uhungiyi mwahu.

⁵ Tin‘ amě e dikanakid‘ âvě o Kreta nd‘ ekaně, na ovaně nd‘ âvě o ka hohonganě belombo be di dikanango be hawě, o ka kabakidě batodu o mboka yěhěpi, te k‘ umba mbi sombiyakid‘ âvě.

⁶ Pagate moto ka moto a ka duwaniyě a diyě n‘ ebuke, momo mwa mwajo ’mbâkâ, a di na bana ba kamakidě, ba tubwě n‘ ujolongo, na bâ ba panganiye.

⁷ Minisě a lukakand‘ o diya a diye na ebuke, pani ka ukabi mwa belombo bya Anyambě; hanga ipangidi vyaju mětě, hanga na bohadi na malingwa, hanga o nyângi ya maku, hanga na enâ ehadi, hanga majake ma nyeno y‘ ihâni.

⁸ Nd‘ utândi mw‘ ibiya, utândi mwa bato baiyamu, lumbamango, holomiyango, hole, nditi;

⁹ bweyiděngo ndaga ja pâkwě‐pâkwě vyě, pani ka mâ a yokwakudwě, na ovaně nd‘ o mâ a ka yâlě n‘ ihâhâlidě, n‘ iyokwanidi viyamu, n‘ isuliyě ja ba těnidi.

¹⁰ Ikabojâna o na baitě ba panganakiya, bakaliyi ba bekalě‐kalě, na bayabani, wa wa ndi bâ b‘ ihěbwě:

¹¹ medumbu myabu me lukakand‘ o pandwě; ba tâlângânâkě ndabo ihuhu, ba yokwakidě belombo byabu be ha lukaka, o nyanga ya nyeno y‘ ihâni.

¹² Uwabu mětě ’mbâkâ, usâki mwabu mětě, a vâki na, Ba Kriti ba mejojowa egombe yěhěpi, tito ibe, savulaka ya bokěhě.

¹³ Upako těkamu u pâkwě‐pâkwě. Ovaně vâkâna, bemaka bâ bokolo, ovaně nd‘ o bâ ba ka diyě upeha n‘ ikamidě;

¹⁴ hanga iyokolidě ja bekana bya Jiu, na belekanako bya bato be vongwakě oviya pâkwě‐pâkwě.

¹⁵ Belombo byěhěpi be kěngěngě o ba di kěngěngě ba jadi, nd‘ o i bě na elombo ya kěngěngě o ba di bevango, na ba ha kamakidě, ndi na mapikiliya na bebumulema byabu be bevango mětě.

¹⁶ Be měměki na ba yowuděte Anyambě, ndi ba hâhâkiyě mâ o behavu, ba jadi manya, ba diye n‘ iyokiya, ba diye n‘ n ibendwě o ehavu eyamu yěhěpi.