Roma 1 - Panga ea Kya 1895

¹ Pâlu, uhayi mwa Jisu Kraist, ndudwěngo idiya j‘ utodu, paludwěngo o sango eyamu y‘ Anyambě,

² eyaju e yohanakidě ovyo na basâki baju o malěndwě ma hole,

³ opělě ya Mwan‘ aju, a jakudwě ibângâ ja Devidi hohonganěngo na mehoni;

⁴ na a pakwakudwě na a Mwana wa Anyambě na ngudi, hohonganěngo n‘ ilina ja hole, n‘ ipumbuma oviya iwedo;

⁵ Jisu Kraist Upangiyi mwahu, uwahu a di pahaniyango ehekwě na ebano y‘ utodu, o iyokiya j‘ ikamidě o betomba byěhěpi be jadi, o nyanga ya dina jaju:

⁶ o inyěni o didini tepě, ndudwěngo idiya ja ba Jisu Kraist:

⁷ o běhěpi ba jadi o Roma, tândwěngo na Anyambě, ndudwěngo o idiya ja baiyamu: Ehekwě n‘ inyěni, na jonga oviya Anyambě Hangw‘ ahu n‘ Upangiyi Jisu Kraist.

⁸ Mbi langakand‘ Anyambě amě o boho boho na Jisu Kraist opel‘ anyu ya běhěpi, ’kabojana ikamidě janyu i pakwakudwěndi o he yěhěpi.

⁹ Jambojana Anyambě a ndi tali amě, uwamě a dilakě n‘ ilina jamě o sango ’yamu ya Mwan‘ aju, nyang‘ amě e tubakě inyěni egombe yěhěpi o makaliya mamě, mbi yâje;

¹⁰ iuwa ja na, oningě na njeya ka njeya, nandi o kya okava mbi te mbi hanakwě n‘ upango mwa Anyambě o viya inyěni o jadi.

¹¹ Ikabojana mbi yombwakand‘ o yěně inyěni, mbi věye inyěni ivě jâkâ j‘ ilina, ovaně nd‘ inyěni o ka yâděni;

¹² yeně ndi na, hwě n‘ inyěni ho yâdâkiyeni o inyěni, moto moto n‘ ikamidě ja upâkwě, ijanyu tepě n‘ ijamě.

¹³ Nandi, bana bina, mba vahaka inyěni o diyaka o yowěni, na mbi pangakindi njo itě o viya inyěni o jadi (ndi mbi himbakudwěndi) na pâ kya těkaně, na ovaně nd‘ umba mbi ka pahiyě bebuma byâkâ o inyěni tepě o jadi, pani te ka betomba bepâkwě.

¹⁴ Mbi ndi unwani mwa ba Giriki, na mwa Bapindi, mwa b‘ iyowě, na ba ha bě n‘ iyowě.

¹⁵ Ovaně vâkâna, o nyanga e di n‘ umba, mbi te kokěngo ipakuwa ja sango eyamu o inyěni ba didi o Roma tepě.

¹⁶ Ikabojana mba yěněkě sango eyamu ihâni; ikabojana e ngudi ya Anyambě y‘ iyonga o wěhěpi a kamakidě a jadi; o Jiu o boho boho, nandi o Giriki tepě.

¹⁷ Ikabojana omě nd‘ o mahuwa bwa Anyambě bo di levudwěngo oviya ikamidě na l‘ ikamidě; pani ka yâ e di lěndwěngo na, Ndi wa mahuwa a ka diyi n‘ ikamidě.

¹⁸ Ikabojana ngambi ya Anyambě e levudwěngo oviya hěvěni opělě ya bobe bwěhěpi, na ipuhwana ja mahuwa ma ipuhwana bato ba himbakidě pâkwě pâkwě na ja mahuwa.

¹⁹ Ikabojana e jadi e yâlâkě o yěněngo bwe bwe opělě ya Anyambě e bâ levudwěngo: ikabojana Anyambě a i bâ leviděngo.

²⁰ Ikabojana belombo byaju be ha yěněněkě, be yěněněngo oviya ivela ja he, yowaněngo na belombo be di velwěngo, ngud‘ aju ya egombe yěhěpi na idiya jaju ja Anyambě; ovaně nd‘ o bâ ba ha bě na ponda:

²¹ ikabojana o bâ ba yowakid‘ Anyambě, bu bendakě mâ ka Anyambě na bâ ba langaka mâ: ndi ba diyaki ba bě beboki o mapakiliya mabu, na melema myabu mya betike‐tike na vindaka.

²² Ba měměkě bâ mětě na ba n‘ iyowě, ba diyaki ba bě betike‐tike,

²³ ka bâ ba ludě ivenda ja Anyambě e ha bâkâ opělě ya ehini ya uvela mwa moto a bâkâ, na lonâni, na tito ja beko benai, na belombo be landakě.

²⁴ Ovaně vâkâna Anyambě a věkě bâ o sěkě o bedoko bya melema myabu ihadividě ja nyolo jabu bâ mětě na bâ mětě:

²⁵ na na ba pepenganindi pâkwě‐pâkwě ya Anyambě bojowa, na kalakiya na dilakě ekeha o maihana ma Uveli, u di vambudwěngo ibâtâ egombe yěhěpi. Aměni.

²⁶ Na tina těkaně ndi ya Anyambě a věki bâ o bedoko bya ihâni: na bajo babu ba ’lawkiděndi mala mabu ma hohonganěngo o maihana ma e ha bě hohonganěngo:

²⁷ na nyanga tě tepě ya bamo, e dikakě mala ma hohonganěngo ma mwajo, ba yodakě na edoko bâ mětě na bâ mětě; bamo na bamo ba haka manya, na bâ ba pahakiya bâ mětě mahomano ma idimbiya jabu ma di hohonganěngo;

²⁸ ndi o bâ ba ha tândâkidi o tata Anyambě o iyowě jabu, ka Anyambě a věki bâ o ebumulema y‘ ikiywě, iha ja belombo be ha bě hohonganěngo.

²⁹ Londango ti na ulogo mwěhěpi, ihonde, ibeva, itângina, ekola, ti n‘ ivina, iweyana, momano,

³⁰ iyabana, batubani, bapatani baloni ba Anyambě, ba‐ngongolanidi, na maměmě, ba‐kěti ba‐hâkâli ba belombo bebe, bayokiye ba hangwě na ba nyangwě, ba diye n‘ ibandamidě,

³¹ baludi ba panga, ba diye n‘ itândě ja moto i janakwě, ba dike ekola, ba diye na ngěbě;

³² ba didi yowěngo yěkě ya Anyambě, na na ba hakě belombo ka ’beně ba lukango n‘ iwedo, ba te kabo hanga n‘ iha ja nonaně pa, ndi ba bendakě tepě bâ ba hakě byâ.