Mark 9 - Panga ea Kya 1895

¹ Ka Mâ‐a vâ na bâ, na, Pâkwěpâkwě, Mbi langwakiyandi ’nyěni, na, o na bâka ba těměkě okava ba veke iwedo kabo ba ta yěně ipangiya ja Anyambě pângo na ngudi.

² Hwi ’toba tombango, ka Jisus a nângâ Pitě na Jems na Jân, ka Mâ‐a valana bâ o ukodi mua udomba o pěpěkě bâ dipâ, ka nyolo ’aju ya ’luwa o pwanj‘ ’abu.

³ Ibâtâ jaju i diyakindi ngěningěni botano mětě ka mataya, o diye pě na moto o he a di na ngudi e tanakě jâ wa.

⁴ Ka Ilaias na Mosěs ba pumiya bâ, ba diyaki ba kalaka na Jisus.

⁵ Ka Pitě a yavwana, ka mâ‐a languwa Jisus, na, Uyokwidi, e ndi bwamu na ho diyaka okava, na hwě hwa ha meâkâ melalo, Âvě ’mbâkâ, Mosěs ’mbâkâ, Ilaias tepě ’mbâkâ.

⁶ Ikobojana au yowaka eaju e kalakidi, ’kabojana ba diyaki ba bangaka.

⁷ Omě o diyaki na evindi e yambakiyi bâ, ka joyi ja viya o ’vindi, na, Ekaně a Mwan‘ ’amě a tândâkwě, yokakiyi Mâ ni.

⁸ O bâ‐ba tamuwedi kěběngě kěběngě, elěngiaha tepě, ba yěne pě moto, kabo Jisus, na bâ mětě, pa.

⁹ A pakwakiyi bâ na, ba langwake moto belombo beabu be ma yěně, o bâ‐ba diyakidi ba hubaka ukodi, kabo o Mwana moto a ka pumbuwa oviya bawewe.

¹⁰ Ka bâ‐ba tata ndaga tědině bâ mětě, ba ka uwanaka bâ metě na bâ mětě, na, ipumbuwa oviya bawewe i lě na.

¹¹ Ka bâ‐ba uwa Mâ, na, E lě nde ya Balěndi e vâkě, na, Ilaias nd‘ a ka t‘ o pâ?

¹² Ka Mâ‐a yavwana, ka Mâ‐a vâ na bâ, na, Ilaias pâkwěpâkwě nd‘ a takě na viya, na Mâ‐a timbě belombo beěhěpi; na nyanga e di lěndwěngo o pělě ya Mwana moto nana a ka yěni majili maitě, na Mâ‐a pějwě.

¹³ Mbi vâki n‘ inyěni, na, Ilaias pâkwěpâkwě a pândi, ndi ba hakite mâ kabo nyanga ’abu e vahakidi bwěsě e di lěndwěngo mâ.

¹⁴ O Mâ‐a pâkidi o beyokwedi beaju be jadi a yěněkindi ebumbu eněně bâ ulwaniděngo, Balěndi ba uwanaka na bâ.

¹⁵ Elěngiaha o ebimba yěhěpi e yěni Mâ, ba mamakindi imama iněně, ka bâ‐ba vala o Mâ‐a jadi umbila, ba ka homaka Mâ.

¹⁶ Ka Mâ‐a uwa Balěndi, na, O uwaka li bâ i nande?

¹⁷ Ka ’mbâkâ ua ebumbu a yavwana ka mâ‐a vâ na Ju, na, Uyokwidi, mbi ma vanandi mwan‘ ’amě ua momo o Âvě‐o jadi, a di na ilina j‘ imbuke.

¹⁸ Iboko viaju vi valanakě mâ viěhěpi, vâkâna i hunjaki mâ, a ka pumakě mavudi, a ka kalakidě mahonga, na mâ‐a ka kângâkâ; ndi mbi ma kali na beyokwedi beâvě, na ba pumakě jâ, ndi bu yâlâkě.

¹⁹ Ka Mâ‐a yavwana mâ, na, A! igona i ha ’bě na ikamidě, Mbi ka diya lě n‘ inyěni nj‘ ulingo ě? Mbi ka hindina lě ’nyěni nj‘ ulingo ě? Vanaki mâ ni o ’Mbambi jadi.

²⁰ Ka bâ‐ba pâdě mâ o Mâ‐a jadi: o mâ‐a yěni Mâ, k‘ ilina ja hunja mâ: ka mâ‐a kwa o he, a ka yangalaka, a pumakě mavudi.

²¹ Ka Mâ‐a uwa hangwě, U le nja, Ulingo mua ekae u di diyango o mâ‐a jadi?

²² Ka mâ‐a vâ, na, Oviya ukěkě. Njo jâkâ e ’hwaka mâ o veya na o miba nana e weye mâ: ndi ipě O ka hate, yěněkě hwě ngěbě, na nâvě wa hana hwě.

²³ Ka Jisus a vâ na mâ, na, Oningě o yâliděngě o kamidě, belombo beěhěpi be te be hamaka na ba kamakidě.

²⁴ Ka hangwě mwana a yama na manyângâdiba, na, Upangiyi, mbi kamakiděndi; hanaka ’mba n‘ ipuhwa jamě j‘ ikamidě.

²⁵ O Jisus a yěnidi na bato ba vakidi membila, ka Mâ‐a kandidě ilina tě ibe, na, Avě ilina j‘ imbuke na poke, Mbi langwakiyand‘ âvě, věngěměkě o mâ‐a jadi, o ngakiye pě o mâ‐a jadi njo ’pâkwě.

²⁶ K‘ ilina ja yama, ka jâ‐ja hunja pě mâ, ka jâ‐ja věngěmě; a bě ona ekengo: baitě ba ka vâka na, A wendi.

²⁷ Ka Jisus a bweya mâ o ’nâ, ka Mâ‐a hěhě mâ; ka mâ‐a těmě.

²⁸ O Mâ‐a vakid‘ o ndabo, ka beyokwedi beaju bea uwa Mâ o pěpěkě, na, E lě nd‘ eahu e ha yâlâkidě o věngidě jâ.

²⁹ Ka Mâ‐a vâ na bâ, na, Jângâ těkadi ja yâlě o puma na vilolombo kabo na ikaliya na ihindina.

³⁰ Ka bâ‐ba věngěmě omě, ka bâ‐ba pudungana Galili; A vahaka na moto a yowakě.

³¹ Ikabojana A yokwakidi beyokwedi beaju, ka Mâ‐a vâ na bâ na, Mwana moto a bweyudwěndi o benâ bea bato, ba ka weyi Mâ; o Mâ‐a ka bě weyuwěngo, A ka pumbuwandi o buhwa bo‘ ilalo.

³² Ndi bu yowakě ndaga tědině, ba ka bangaka o uwa Mâ.

³³ Ka Mâ‐a pâ o Kapěrnaum; o ndabo ka Mâ‐a uwa bâ, na, E lě nd‘ eanyu e ma sâjaka o njeya, inyěni mětě na inyěni mětě?

³⁴ Ndi bâ dâ; ’kabojana o njeya ba ma sâjakandi bâ mětě na bâ mětě, na, ja di wa.

³⁵ Ka Mâ‐a diya, ka Mâ‐a ndiya jomu na babale, ka Mâ‐a vâ na bâ, na, Oningě moto te moto a vahaka o diya o bohoboho mâ nd‘ a ka diyě ua mbuhwa ya běhěpi, na uhayi mua běhěpi.

³⁶ Ka Mâ‐a nângâ etumbě, ka Mâ‐a tědě yâ o hangan‘ ’abu; o Mâ‐a nângi mâ na benâ beaju, ka Mâ‐a vâ na bâ, na,

³⁷ Uěhěpi a ka věhělidě umbâkâ ua betumbě ka ekabe na dina jamě vâkâna a věhělidi ’Mba; a vehělěkidě ’Mba uěhěpi a věhělěkidě ’Mba dipâ, ndi na a lomaki ’Mba.

³⁸ Ka Jân a yavwana Mâ, na, Uyokwidi, ho yěněkindi ’mbâkâ a věngěkidě děvil na dina jâvě, ndi a vitaně hwě, ka hwa kandidě mâ, ’kabojana a vitakě hwě.

³⁹ Ndi ka Jisus a vâ, na, O kandakidi mâ ni, ’kabojana o ’bě na moto a ka haye elemba o dina jamě, a ka tândě o kala bobe o pěl‘ ’amě.

⁴⁰ Ikabojana a ha hingaka na hwě a nd‘ o pěl‘ ’ahu.

⁴¹ Uěhěpi a ka mâtidě inyěni imâgi ja miba o dina jamě, ’kabojana o ndini ba Kraist, mbambaye, Mbi vâki n‘ inyěni, a nyange mahomano maju.

⁴² Ndi uěhěpi a ka bevě yâkâ ya betumbě be kamakidě ’Mba, e ndi bwamu wa o pěl‘ ’aju n‘ ilale iněně i tingakwě o ibâlu jaju, na mâ‐a ’hwě o manga.

⁴³ Oningě ikadu jâvě ja bev‘ âvě, lenaka jâ; e ndi bwam‘ o pěl‘ ’âvě na nâvě o ngakiya o ’měnâ yěmě wa na o diya na makadu mabale na nâvě wa ’la o Hěl, o veya vi ka měndě vi dime.

⁴⁵ Tepě, oningě itambi jâvě ja bev‘ âvě, lenaka jâ: e ndi bwam‘ opěl‘ âvě na nâvě o ngakiya o ’měnâ o děhimaka wa na o diya na matambi mabale na nâvě wa ’hwě o Hěl, o veya vi ka měndě vi dime.

⁴⁷ Na, oningě dihâ jâvě ja bevidě âvě, tongwaka jâ: e ndi bwam‘ opěl‘ âvě na nâvě ngakiya o ipangiya ja Anyambě na dihâ jâkâ wa na o diya mihâ mabale, na nâvě o uhwě o Hěl ya veya:

⁴⁸ o ukuju muabu u ha waka, na veya vi hiniye.

⁴⁹ Ikabojana uěhěpi a ka mwahudwi na veya, na mwambo muěhěpi u ka mwahudwi na vianga.

⁵⁰ Vianga ndi bwam‘; nd‘ oningě vianga vi diya uju hambe, o ka timbě lě pi viâ ni uju na? Diyakani na vianga inyěni mětě, o ka diyakani jonga inyi mětě n‘ inyi mětě.