Mark 8 - Panga ea Kya 1895

¹ O hwi tědině ebumbu e diyakindi eněně mětě, bu diyaka na ’lombo e jakě; ka Jisus a ndiya beyokwedi beaju,

² ka Mâ‐a vâ na bâ, na, Mbi yěnindi ebumbu ngěbě, ’kabojana ba bi n‘ Umba okava hwi ’lalo, ba diye na elombo e jakě:

³ oningě ’Mba validě bâ o ndabo jabu ba je, ba ka hoviyandi na nja o njeya, ’kabojana bâkâ ba vakiyendi yaviděngo.

⁴ Ka beyokwedi beaju bea yavwana Mâ, na, Moto a ka vulě lě ekaba na beja o nginga ono na ove?

⁵ Ka Mâ‐a uwa bâ, na, O li membunda meningě? Ka bâ‐ba vâ, na, Hěmbwědi.

⁶ Ka Mâ‐a vâ na ebimba e diyake o he, ka Mâ‐a nângâ membunda hěmbwědi, ka Mâ‐a vě akeva, ka Mâ‐a buka, ka Mâ‐a vě beyokwedi beaju na ba těkidě o boho boabu; ka bâ‐ba tědě beâ o boho boa ebimba.

⁷ Ba diyaki na lojajaka lohâlě; ka Mâ‐a vambiya ibâtâ, ka Mâ‐a vâ na lo těkudwě tepě o boho boabu.

⁸ Kakana ndi bâ‐ba jakidi, ka bâ‐ba vula, ka bâ‐ba tâlidě nguhu i dikanakidi belinga hěmbwědi.

⁹ Ba jakidi ba diyakindi ba tâjen inai; ka Mâ‐a validě bâ.

¹⁰ Elěngiaha tepě ka Mâ‐a vama o ’lende na beyokwedi beaju, ka Mâ‐a pâ o pělě ja Dalmanutha.

¹¹ Ka Farisi ja viya, ka bâ‐ba yalě o boma penda na Ju, ba vahaka na A hake bâ elembo ya viya oba, ba yějěkiyě Mâ.

¹² A vegumakindi n‘ iněně, o ilina jaju, ka Mâ‐a vâ, na, E lě nde ya igona těkadi e vahakě elembo? Mbi vâki n‘ inyěni pâkwěpâkwě, O ’bě na elembo e ka věwě igona těkadi.

¹³ Ka Mâ‐a dika bâ, ka Mâ vama pě o ’lende, ka Mâ‐a ’la o mwidi ’pâkwě.

¹⁴ Ndi beyokwedi ba behalakiděndi o nângâ beja, bu diyanaka o elende wa n‘ umbund‘ umbâkâ.

¹⁵ Ka Mâ‐a languwa bâ, na, Bandamakiděni, dikakani lěvěn ya Farisi na lěvěn ya Hěrod.

¹⁶ Ba ka totonganaka bâ mětě na bâ mětě, na, E ndi ’kabojana o hwě ho ha ’bě na beja.

¹⁷ O Jisus a yowakidě yâ, ka Mâ‐a vâ na bâ, na, E lě nde ’anyu e totonganakě, ’kabojana o ’běni na beja? O ha yoweteni, tombe wa bweyiděni? O ndini melema meanyu yâdiděngo?

¹⁸ Inyěni na mihâ, wa yěněkěni? Inyěni na matâ, wa yokakani? Wa yongakiděni?

¹⁹ O ’Mba‐mbi bukakidi membunda metano o tâjen itano, o tâlâkidě li belinga bea nguhu ti beningě? Ka bâ‐ba vâ na Mâ, na, Jomu na bebale.

²⁰ Tepě na hěmbwědi o tâjen inai, o tâlâkidě li belingě bea nguhu ti beningě? Ka bâ‐ba vâ na Mâ, na, Hěmbwědi.

²¹ Ka Mâ‐a vâ na bâ, na, E lě nd‘ eanyu e ha bweyakidě?

²² Ka Mâ‐a pâ o Běthseda, ka bâ‐ba vana Mâ momo ua pâgu, ka bâ‐ba hâhâlidě Mâ na A kupanake mâ.

²³ Ka Mâ‐a bweya pâgu o ’nâ, ka Mâ‐a pumana mâ o mboka, o Mâ‐a běkidi malě tuwango o mihâ maju, ka Mâ‐a kahidě benâ beaju o mâ‐a jadi, ka Mâ‐a uwa mâ na ipě a yěnindi elombo.

²⁴ Ka mâ‐a tamuwa oba, ka mâ‐a vâ, na, Mbi yěněkěndi bato ona bele ba tamwaka.

²⁵ Ka Mâ‐a timbiya pě o kahidě benâ beaju o mihâ maju, ka Mâ‐a panga mâ a tamwakiya oba, ka mâ‐a yongwě, ka mâ‐a yěně bato běhěpi bwebwe.

²⁶ Ka Mâ‐a timbě mâ o ndabo ’aju, na, O valake o mboka, o langwaka tepě yâ moto o mboka.

²⁷ Ka Jisus na beyokwedi beaju ba vala o mboka ja Sěsaria Filipai; o njeya, ka Mâ‐a uwa beyokwedi beaju, a vâki na bâ, na, Bato ba vâkâ lě, na, Umba lě a nja?

²⁸ Ka bâba yavwana Mâ, na, Jân Baptist, ndi bâkâ mâ, na, Ilaias, na bapâkwě mâ, na, Ua basâki umbâkâ.

²⁹ Ka Mâ‐a vâ na bâ, na, Nd‘ o vâkâ li na Mbi lě nja? Ka Pitě a yavwuwa, ka mâ‐a vâ na Mâ, na, Âvě ndi Kraist.

³⁰ Ka Mâ‐a kelevidě bâ na, ba langwake moto o pěl‘ ’aju.

³¹ Ka Mâ‐a yalě bâ ipakuwa na, Mwanamoto a ka yěněndi belombo beitě; batodu na prist iněně na balěndi ba ka kiyi Mâ, na bâ‐ba ka bweyidi Mâ; ndi na hwi ’lalo A ka pumbuwi pě.

³² Ekae nd‘ eaju e kalakidi bwebwe. Ka Pitě a a nângâ Mâ o pěpěkě na mâ‐a ka yalakě ikandidě jaju.

³³ O Mâ‐a běkidi iběi timběngo, ka Mâ‐a tamuwa beyokwedi beaju, A ka kandakidě Pitě, na, Věngěměkě ’Mba o mbuhwa Setan, ’kabojana wa pikilakiya belombo bea Anyambě, kabo bea bato.

³⁴ O Mâ‐a běkidi ebimba ndiyango na beyokwedi beaju, ka Mâ‐a vâ na bâ, na, A ka vitě ’Mba uěhěpi a binake nyolo ’aju, na Mâ‐a bapě krâs ’aju, na mâ‐a ka vilinganakě ’Mba.

³⁵ Ikabojana uěhěpi a ka tândě o yongě eměnâ ’aju a ka nyangi yâ, ndi uěhěpi a ka nyangi eměnâ ’aju o nyang‘ ’amě na sango eyamu, mâ tepě a ka yongě yâ.

³⁶ Ikabojana e ka kova lě moto nde, oningě a jeya he yěhěpi, na mâ‐a ’hpwa ilina jaju?

³⁷ E lě ba nja ’lombo ě ya moto e ka vangwaně ilina jaju?

³⁸ Ikabojana a ka yěně ’Mba ndaga jamě ihâni o igona tě j‘ ihonde na bobe ekadi, mâ tepě ua Mwana moto a ka yěně ihâni o Mâ‐a ka viyě n‘ ivenda ja Hangwě na enjěl iyamu.