Mark 7 - Panga ea Kya 1895

¹ Jâ ndi ja Farisi na balěndi na bahuhu ba vakiyedi o Jěrusalěm, ba lataniya o Mâ‐a jadi.

² O bâ‐ba yěnidi beyokwedi beaju beâkâ be jaka beja na ndindo, yeně ndi na ba tuke benâ, ka bâ‐ba duwa ponda.

³ Ikabojana Farisi na Jiu běhěpi bu taka o ja beja njo itě kabo ba ta ’tuka benâ, itata ja epepa ya batodu.

⁴ Oningě ba viya o ihambanido ba jaka kabo ba ta o tuka benâ. Na belombo bepâkwě beitě be jadi ibeabu be di nângângo na ba tatakandi, pani ka ituka ja imâgi na mbeya, na melombo, na tagulu.

⁵ Jâ ndi ja Farisi na balěndi ba uwa Mâ, na, E lě nde ya beyokwedi beâvě be ha tamwaka na bepepa bea batodu, ndi ba jaka beja ba tuke benâ.

⁶ Ka Mâ‐a timbwana bâ, na, Isaia a huwakite o sâkâ ’nyěni menoki pani ka yâ di lěndwěngo, na, Bato těkaba ba hekakidi ’Mba na belěbu beabu, ndi melema meabu me yavaniděngo n‘ Umba.

⁷ Kakana ba kalakiyate ’Mba o naně, ba yokwakidě iyokwanidi via belekanako bea bato.

⁸ O bakakiděni belekanako bea Anyambě, ndi o tatakani bepepa bea bato, pani ka ituka ja mbeya na sěngě ja mamâgi, na bea jângâ tědině bepâkwě beitě ibeanyu be hakě.

⁹ Ka Mâ‐a vâ na bâ, na, O hakandi bwamu mětě! n‘ isenja ja elekanako ya Anyambě, na ovaně nd‘ inyěni o ka tatě bepepa beanyu.

¹⁰ Ikabojana Mosěs a vâki, na, Hekakidě hângwě na nyângwě; tepě, A ka hâkě hangwě na ba nyangwě, a wake bowaka.

¹¹ Ndi o vâkândini na, Oningě moto a vâ, na hangwě na ba nyangwě na, Eâvě e diyedi o kovaka n‘ umba e ndi Kârban (e di na, Bověkwě o Anyambě a jadi) vâkâna a bi pwenjavwenja.

¹² Vâkâna wa bâbâkâni na a hake pě hangwě na ba nyangwě elombo;

¹³ o hadivakiděni ndaga ja Anyambě na bepepa beanyu be hadi; na bea jângâ tědině beitě ibeanyu be hakě.

¹⁴ O Mâ‐a bekidi ebimba yěhěpi ndiyango, ka Mâ‐a yâ na bâ, na, Inyěni běhěpi yokalakidi ’Mbani, o ka bweyakiděni:

¹⁵ o ’bě na elombo o bwebwe ya moto e ngakiyě o mâ‐a jadi e ka yâlě o bevě mâ, ndi belombo be pumakě oviya o mâ‐a jadi, ekabe ndi be bevakě moto.

¹⁶ Oningě moto a di na matâ ma yokakě, a yokakě.

¹⁷ O Mâ‐a vakiyedi oviya ebimba, ka Mâ‐a ngiya o ndabo, ka beyokwedi beaju bea uwa Mâ o pělě ya ukanakâdi.

¹⁸ Ka Mâ‐a vâ na bâ, na, O ibě tepě ni n‘ ibweyidě? Wa ’wěni na elombo yěhěpi e jadi o bwebwe e ngakiyě o moto, e ’bě na ngudi e bevakě mâ;

¹⁹ ikabojana ya ngakiya o ’bumulema ’aju, ndi o ihuhu, na yâ ya pumwě o pěpěkě e vovolakandi na beja beěhěpi?

²⁰ Ka Mâ‐a vâ, na, E vakiyě o ulema, yâ ndi e bevakě moto.

²¹ Ikabojana ovoně, o melema mea bato, nd‘ o pumakiyě ipikiliya ibe, inanganiya, ihonde, iweyana, iyiba,

²² itângina, bebe, ijowa, uhâ, dihâ ibe, ikila ja Anyambě, maměmě, behayěhayě:

²³ belombo tě bebe ’kabe beěhěpi, be vakiyandi oviya utema, na beâ bea bevě moto.

²⁴ Oviya ’vaně ka Mâ‐a ’muwa nala o mapěpěkě ma Tair na Saidon, ka Mâ‐a ngiya o ndabo, A vahaka moto a yowakě, nd‘ A diyaka na ngudi e kutamakě.

²⁵ Mwajo a diyakidi na mwa mwajo ua nděmbě a diyaki na ilina ibe, o mâ‐a yokakidi sango ’aju, ka mâ‐a viya ka kwa o beko beaju:

²⁶ mwajo těně a diyakindi ua Grik, ua etomba ya Surofinisia, ka mâ‐a hâhâlidě Mâ, na, a pumake mwana ’aju ua mwajo děvil těně.

²⁷ Ka Jisus a vâ na ju, na, Bana ba take na vula vulango, ’kabojana e ’bě lukango na o nangâ beja bea bana na o ’hwa beâ mbwa.

²⁸ Ka mâ‐a yavwana Mâ, na, E, Upangiyi, ndi mbwa tě o ibongalo ja tagulu i jaka nguhu ja bana.

²⁹ Ka Mâ‐a vâ na ju, na, O nyanga ya ndaga těkadi, kěkě; děvil e věngěmindi mwan‘ ’âvě ua mwajo.

³⁰ O mâ‐a pâkidi o ndabo ’aju, ka mâ‐a kâbidě děvil ya věngěmě, mwan‘ ’aju ua mwajo a di nangudwěngo o ikondo.

³¹ Ka Mâ‐a věngěmě pě o tungu ya Tair na Saidon, ka Mâ‐a pâ o etima ya Galili, a pudunganakindi hanganě ya tungu ya Děkapolis.

³² Ka bâ‐ba vana o Mâ‐a jadi moto ua poke n‘ imbuke, ka bâ‐ba hâhâlidě Mâ na A kahakidě mâ ikadu jaju.

³³ Ka Mâ‐a nângâ mâ o pěpěkě ya ebumbu, ka Mâ‐a vamě mepenjo meaju o matâ maju, ka Mâ‐a tuwa malě, ka Mâ‐a kupaně emi ’aju;

³⁴ ka Mâ‐a tamuwa hěvěn oba, ka Mâ‐a veguma, ka Mâ‐a vâ na mâ, na, Efatha, yeně ndi, na, Bumwanakiya.

³⁵ Elěngiaha tepě ka matâ maju ma bumuwa, ka ukato mua emi ’aju mu a ’njuwaniya, a ka kalaka hohonganěngo.

³⁶ Ka Mâ‐a sombiyě bâ, na, ba langwake moto; nd‘ ulingo muaju u sombiyakě bâ nonaně yâ nyanga tě tepě eabu e hamanakidě yâ.

³⁷ Ba ka mamaka bomamaka, na, A handi belombo beěhěpi bwam‘; A pangakate poke i yokaka na mambuke ma kalaka.