Mark 6 - Panga ea Kya 1895

¹ Ka Mâ‐a věngěmě omě, ka Mâ‐a vala o wabu, ka beyokwedi beaju bea vitaně Mâ.

² O buhwa boa Iyâjâ bo pâdi, ka Mâ‐a yalě iyokudě o tyâtyi; bato ba yokolakidě Mâ baitě ba mamakindi, na, Momo těkaně a vaniye lě bolombo těkabe ove? I lě nj‘ iyowě i věkudwě Mâ ekadi, i jadi tombekete na belombo beněně be hamakate o benâ beaju.

³ A ’bě ukěkěngě ekaně, mwan‘ ’a Meri, mwana nyangwě na Jems, na Josěs, na Judas, na Saimân? Maluku maju ma ’bě na hwě okava? Ka bâ‐ba numba na Ju?

⁴ Ndi Jisus a vâ na bâ, na, Usâki a vâki pěněkě ihekidě kabo o wabu, na o ikaka jaju, na o diyâ jaju.

⁵ A yâlâkě tepě o ha ehavu eněně omě, kabo te ikahidě ja makadu o tango ehâlě ya mebědi, na Mâ na yongakě bâ.

⁶ Ka Mâ‐a mama o pělě ’a ipuhwana jabu j‘ ikamidě. Ka Mâ‐a vala, A kěkě, A yokwanakidě o mamboka mahâlě.

⁷ Ka Mâ‐a ndiya jomu na bebale, A ka yalakě o loma bâ babale babale, ka Mâ‐a vě bâ ipangiya ja malina mabe.

⁸ Ka Mâ pakuwa bâ na, ba nângâke elombo o ’kěndâ, kabo utumbe pa, hanga elandi ya kola, tombe beja, na ba dâlě o belandi beabu.

⁹ Bâtâkâni sandal o beko: nd‘ o bâtâkeni koto ibale.

¹⁰ Ka Mâ‐a vâ na bâ, na, Iboko vianyu vi ka pâyě o ndabo, diyakani omě, kabo inyěni o ka valěni oviya omě.

¹¹ A ka měndě a věhělidě ’nyěni, na o yokolidě tepě inyěni, o inyěni o ka valěni oviya omě, pupwakani ubulubulu oviya matambi manyu o ilanguwa jabu. Mbi vâki n‘ inyěni pâkwěpâkwě, e ka diyandi bobâbu na ba Sâdâm na Gomâra o buhwa boa yěkě, wa na mboka těně.

¹² Ka bâ‐ba vala, ba ka kalakiya na bato ba ’luwake melema.

¹³ Ka bâ‐ba pumě děvil iitě, na bâ‐ba ka hakiya mebědi meitě mavulě, na yongě bâ.

¹⁴ Ka upolo Hěrod a yoka o pěl‘ ’aju (’kabojana dina jaju i diyakindi ja hamana); ka mâ‐a vâ, na, Jân Baptist a pumbuwendi, ovaně nd‘ o behavu beněně be levakudwě o mâ‐a jadi.

¹⁵ Bâkâ mâ, na, A ndi Ilaias, Bapâkwě mâ, na, A ndi usâki, na ba moto a kwanakě usâki.

¹⁶ Ndi Hěrod, o mâ‐a yoki yâ, ka mâ‐a vâ, na, A ndi Jân uamě a lenakidi ibâlu; a pumbuwendi oviya iwedo.

¹⁷ Ikabojana Hěrod mâ mětě t‘ a lomakidi bato ka bweyidě Jân, ka mâ‐a tiniya mâ meboka o ndabo meboka na tina ya Hěrodias, mwad‘ ’a mwana nyangwě Filip; ikabojana a baki mâ.

¹⁸ Jambojana Jân a vâki na Hěrod, na, E ’bě hohonganěngo na o nângâkâ mwad‘ ’a mwana‐nyângwě.

¹⁹ Ovaně nd‘ o Hěrodias a yomanaki na ju na mâ‐a vahaka o weya mâ, nd’ a yâlâkě.

²⁰ Ikabojana Hěrod a bangakindi Jân, yowěngo, na, a ndi momo uyamu na hole, ka mâ‐a lala mâ; o mâ‐a yokolidě mâ a kalakiya, ka mâ‐a ha belombo beitě, a yěněkěndi mbya na yoka mâ.

²¹ O buhwa boa lukango bo pâdi, boa Hěrod bo jakudwě, ka mâ‐a hadě bapangiyi baju, na ngâwe iněně, na bato baněně ba Galili, isango.

²² O mwana ua Hěrodias ua mwajo a vakidi ka yemba, ka mâ‐a tândidě Hěrod na ba diyaki na ju, ka upolo mâ‐a vâ n‘ itângâ, na, Uwaka ’mba elombo ’âvě e vahakě, vâkâna mbi věnd‘ âvě yâ.

²³ Ka mâ‐a kaniya mâ, na, Eâvě e ka uwě ’mba yěhěpi, mbi ka věnd‘ âvě yâ, tombe e jadi epěhi y‘ ipangiya jamě.

²⁴ Ka mâ‐a puma, ka mâ‐a vâ, na nyangwě na, Mbi uwake ’lě nde? Ka mâ‐a vâ, na, Molo mua Jân Baptist.

²⁵ Elěngiaha, ka mâ‐a timba o upolo a jadi ngwambe, ka mâ‐a uwa mâ, na, Mbi vahakandi o věkě ’mba kwěi molo mua Jân Baptist o ’pělě bwalo.

²⁶ Ndi upolo a yěněkindi ngěbě eitě, ndi o opělě ya ikana na ba diyaki na ju ija, a vahaka o lěvě mâ.

²⁷ Elěngiaha tepě k‘ upolo a loma uweyi, ka mâ‐a vâ na molo muaju u vanakwě; ka mâ‐a vala ka lena mâ ibâlu o ndabo ya meboka.

²⁸ Ka mâ‐a vana molo muaju o ’pěle bwalo, ka mâ‐a vě muâ itângâ, ka itângâ ja vě muâ nyangwě.

²⁹ O beyokwedi beaju be yoki yâ, ka bâ‐ba viya ka nângâ ekengo ’aju, ka bâ‐ba nangidě yâ o malonga.

³⁰ Ka metodu ba yolaně ta o Jisus a jadi, ka bâ‐ba languwa Mâ belombo beěhěpi ibeabu be hakidi, n‘ ibeabu be yokwakidě.

³¹ Ka Mâ‐a vâ na bâ, na, Vakani, inyěni mětě, o iboko via nginga dipâ, wa ta yâjâni kwěi; ’kabojana ba vakidi na ba kěkidi, ba diyaki baitě, bu diyaka na epedi e jakě.

³² Ka bâ‐ba vala o iboko via nginga, na elende, ikutakuta.

³³ Ka bato ba yěně bâ‐ba kěkě, ka baitě ba yemba Mâ, ka bâ‐ba ’la membila na ja he omě, bopumaka oviya mboka jěhěpi, ka bâ‐ba tombě bâ, ka bâ‐ba yolaně o Mâ‐a jadi.

³⁴ O Jisus a jabwakidi ka Mâ‐a yěně bato baitě, ka Mâ‐a muwa na ngěbě o pěl‘ ’abu, ’kabojana ba diyakindi pani ka medâmbě me diye n‘ utati, ka Mâ‐a yalě bâ iyokudě ja belombo beitě.

³⁵ O buhwa bo diyakidi boa vala, ka beyokwedi beaju bea via o Mâ‐a jadi, na, Ekavi vi ndi iboko via nginga, egombe tepě e tombindi.

³⁶ Valakidě bâ, ovaně nd‘ o bâ‐ba ka ’lě boulwanakidě o ’hiki na o mamboka, na bâ‐ba ka hambaka pěmbě jabu, ’kabojana ba ’bě na elombo e jakě.

³⁷ Ka Mâ‐a yavwana bâ, na, Inyěni, věki bâ ni beja. Ka bâ‐ba vâ na Mâ, na, Ho kěke ka hamba pěmbě i weyakě kama ja fura ibale, na hwa vě bâ na ba jake?

³⁸ Ka Mâ‐a vâ na bâ, na, O li membunda meningě? ka t‘ o ’mbuwani. O bâ‐ba ’mbuwedi, ka bâ‐ba vâ, na, Metano, na bejaka bebale.

³⁹ Ka Mâ‐a sombiya bâ na ba pangake běhěpi na ba diyake njamba njamba o mbusanga ja betongo.

⁴⁰ Ka bâ‐ba diya megândâ, meâkâ kama, meâkâ mabo matano.

⁴¹ O Mâ‐a diyakidi membunda metano na bejaka bebale nângângo, ka Mâ‐a ’mbuwa oba, ka Mâ‐a vambiya ibâtâ, ka Mâ‐a buka membunda, ka Mâ‐a vě meâ beyokwedi beaju na ba těkidě o bâ‐ba jadi; a ka kabaka bejaka tě bebale na bâ běhěpi.

⁴² Ka bâ běhěpi ba janidě, ka bâ‐ba vula.

⁴³ Ka bâ‐ba tâlidě jomu ja belinga na belinga bebale ti bea nguhu, na bea bejaka tepě.

⁴⁴ Ba jakidi membunda mea pěmbě ba diyakindi ba tâjen ja bamo itano.

⁴⁵ Elěngiaha tepě ka Mâ‐a tundudě beyokwedi beaju na ba vamake o elende, na bâ‐ba vala o mwidi ’pâkwě, o Běthseda, o bohoboho, ulingo muaju u valakidě ebimba ya bato.

⁴⁶ O Mâ‐a timbakidě bâ, ka Mâ‐a vala o ukodi ka kaliya.

⁴⁷ O kolo e pâdi, elende e diyakindi o hanganě ya etima, a dikana o he dipâ.

⁴⁸ Ka Mâ‐a yěně bâ‐ba pěpěněkě n‘ iduka; ’kabojana upupě u diyakindi banjaniděngo na bâ; o ’gombe ya elahe ya benai ya bulu, ka Mâ‐a viya o bâ‐ba jadi a tamwaka o etima, ona a vahaka o bambuwa bâ.

⁴⁹ Nd‘ o bâ‐ba yěni Mâ‐a tamwaka o etima, ba yebakiyendi na, ipě u nd‘ ukuku, ba ka yamaka;

⁵⁰ ikabojana bâ běhěpi ba yěněki Mâ, ka bâ‐ba juka ipikiliya. Ka Mâ‐a hungana o kala na bâ, ka Mâ‐a vâ na bâ, na, Yâdâkâni; a te ’Mba; o bangakeni.

⁵¹ Ka Mâ‐a vama o bâ‐ba jadi o elende, ka upupě mu a wa; ka bâ‐ba mama nangudi eitě mětě, ba ka utuwaka.

⁵² Ndi bu yongakidě pě elembo ya pěmbě; ’kabojana melema meabu me diyaki bokolo.

⁵³ O bâ‐ba jabwakidi, ka bâ‐ba pâ o ehe ya Jěněsarěth, ka bâ‐ba bakama na he.

⁵⁴ O bâ‐ba pumakidi o elende, elěngiaha tepě ka bâ‐ba yowě Mâ,

⁵⁵ ka bâ‐ba vala membila uluaniděngo o etěbě těně yěhěpi, ka bâ‐ba yalě ibapě ja ba diyaki na bebědi o makondo, o iboko viabu vi yokaka na A iwě.

⁵⁶ Iboko viaju vi pâkidi viěhěpi o ba mabâkâ, na ba mboka, na ba ’hiki, vâkâna ba nangakidi mebědi o mehěngě, na bâ‐ba ka hâhâlâkidě Mâ, na ba kupanakě tombekete ihuku ja ngâi ’aju; tango e ma kupanakě Mâ yěhěpi te ma yongaka.