Mark 5 - Panga ea Kya 1895

¹ Ka bâ‐ba pâ o mwid‘ upâkwě mua etima o ehe ya ba Gadara.

² O Mâ‐a hubakidi o elende, elěngiaha tepě ka Mâ‐a lata na momo omě a diyaki n‘ ilina ibe a viya o malonga,

³ a ma diyaka o malonga, o diye na moto a ka hukě mâ, tombe n‘ uhinganakano;

⁴ ikabojana a ma bweyakwěndi njo iitě, a kâmâkudwě meboka na mehinganakano, na mâ‐a bukaka mehinganakano, meboka me waka. O diye na moto a ka lumbidě mâ.

⁵ A ma diyakandi egombe yěhěpi, bulu na mwehe, o mekodi na malonga, a yamaka, na mâ‐a lumaka nyolo ’aju na malale.

⁶ Nd‘ o mâ‐a yěněki Jisus na masěi maitě, ka mâ‐a vala umbila, ka mâ‐a hâhâlidě Mâ,

⁷ ka mâ‐a yama nangudi, na, Eahu na nâvě ’lě nde, Jisus, Mwana Anyambě e didi oba mětě. Mbi kanakiyand‘ âvě na Anyambě, na, o yěněkidě ’mba majili.

⁸ Ikabojana a vâki na ju, na, Věngěměkě o momo těně a jadi, âvě, ilina ibe.

⁹ Ka mâ‐a uwa mâ, na, Dina jâvě le nja? Ka mâ‐a timbwana, na, Dina jamě ndi Lijân, ikabojana ho ndi baitě.

¹⁰ Ka mâ‐a hâhâlidě Mâ nangudi, na, a dumake bâ o ehe těně.

¹¹ Piělě n’ ukodi omě o diyakindi na bokweya bwa ngweya boněně bo jaka.

¹² Ka děvil jěhěpi ja hâhâlidě Mâ, na, Valakidě hwě o ngweya, ovaně nd‘ o hwě‐ho ka ngiyě o jâ i jadi.

¹³ Ka Jisus a bâbâ, o njo pâkâ. Ka malina mabe ma puma, ka mâ‐ma ngiya o ngweya, ka bokweya boa huba umbila umbâkâ o mbelenge o etima (bo diyakindi pani ka tâjen ibale) ka boâ‐boa lâka o miba.

¹⁴ Ka ba ma jakidě ngweya ba kweya, ka bâ‐ba languwa yâ o mboka na o ’hiki. Ka bâ‐ba valanidě ka yěně e ma hama yeně.

¹⁵ Ka bâ‐ba pâ o Jisus a jadi, ka bâ‐ba yěně a diyaki na děvil, a diyaki na Lijân, bâtudwěngo, diya, a bě bwamu; ka bâ‐ba banga.

¹⁶ Ba yěněki yâ ba langwakiyi bâ nyanga e hamakidi na a diyaki na děvil, na o pělě ya ngweya tepě.

¹⁷ Ka bâ‐ba yalě Mâ iuwa ja na A věngěměke o betěbě beabu.

¹⁸ O Mâ‐a pâkidi o elende, a diyakidi na děvil ně a hâhâlâkidi Mâ, na, a diyake na Ju.

¹⁹ Ndi Jisus a bâbâkâ ju, nd‘ A vâki na ju, na, Kěkě o ’anyu o ’tâkâ ’âvě e jadi, o ka langwakiya bâ belombo beněně bea Anyambě be jad‘ âvě hango, na nyang‘ ’aju e yěnid‘ âvě ngěbě.

²⁰ Ka mâ‐a vala, a ka yalakě o hamanidě o Děkapolis, nyanga ya belombo beněně bea Jisus be hakiyi mâ; ka bato běhěpi ba mama.

²¹ O Jisus a jabwakidi na elende o mwidi ’pâkwě, bato baitě ba yolanakiděndi o Mâ‐a jadi; a diyakindi piělě na etima.

²² Ka enami yâkâ ya tyâtyi, dina na Jairus, ya viya omě; o mâ‐a yěněki Mâ, ka mâ‐a kwa o beko beaju,

²³ a ka hâhâlâkidě Mâ nangudi, na, Mwan‘ ’ame ua mwajo ua nděmbě a bowaka; pâkâ, ka nangidě makadu mâvě o mâ‐a jadi, ovane nd‘ o mâ‐a ka yongě; na mâ‐a diya.

²⁴ Ka Jisus a vala na ju: ka bato baitě ba vitaně Mâ, ba ka pinyilakidě Mâ.

²⁵ Mwajo n‘ uhuhu a diyakindi n‘ ulema mua makiya jomu ja mepuma na mepuma mebale,

²⁶ a yěněkě njuke eněně na nganga itě, ka mâ‐a pelidě belombo beaju beěhěpi, ndi a diye na ngudi e yongakě, kabo bololuaka pě wa,

²⁷ o mâ‐a yokakidi o pělě ya Jisus, ka mâ‐a viya o kopya ovaně o mbuhwa, ka mâ‐a kupaně ngâi ’aju.

²⁸ Ikabojana a vâkindi, na, Pagate ’mba kupaně ngâi jaju, vâkâna mbi yongindi.

²⁹ Elěngiaha tepě ka tongo ya makiya maju ya yaha: ka mâ‐a yowě o nyolo na, a yongudwěndi oviya ebědi tě.

³⁰ Elěngiaha ka Jisus mâ mětě a yowě na, ngudi y‘ iyonganě e pumindi o Mâ‐a jadi, ka Mâ‐a timbě iběyi o ba sâtaki Mâ ba jadi, na, Nja a kupanakě ngâi jamě?

³¹ Ka beyokwedi beaju bea vâ na Ju, na, O yěněkěte ebumbu e pinyilakid’ Âvě, nd‘ O ka vâkâ pě, na, Nja a kupanakě ’Mba?

³² Ka Mâ‐a tamuwa kěběngě kěběngě iyěně ja a ma ha ’lombo těeně.

³³ Ka mwajo a banga, a ka likimaka, ’kabojana a yowakiděte e hamakidi o mâ‐a jadi, ka mâ‐a viya ka kwa o beko beaju, ka mâ‐a languwa Mâ pâkwěpâkwě yěhěpi.

³⁴ Ka Mâ‐a vâ na ju, na, Mwa mwajo, ikamidě jâvě i yongiděndi âvě; kěkě na jonga, o ka diyaka upeha oviya eběd‘ âvě.

³⁵ O Mâ‐a diyakidi a kalaka, ka bato ba viya o ndabo ya enami ya tyâtyi, ba vâki, na, Mwan‘ ’âvě a wendi; e lě nde eâvě e hakě pě Uyokwidi njuke?

³⁶ O Jisus a yokakidi ndaga t‘ i kalakudwě dině, ka Mâ‐a vâ na enami ya tyâtyi, na, O bangake, kamakidě pa.

³⁷ A bâbâkâ moto a vitanakě Mâ kabo Pitě, na Jems, na Jân mwana nyangwě na Jems.

³⁸ Ka Mâ‐a pâ o ndabo ya enami ya tyâtyi, ka Mâ‐a yěně imbunga, na ba ’yakidi na ba yamanakidě nangudi.

³⁹ O Mâ‐a ngakiyedi ka Mâ‐a vâ na bâ, na, O haka lě ni imbunga na o ’yakani na nja ’lombo ě? itângâ i ha weyete, ndi a yakandi.

⁴⁰ Ba ka věhěkě Mâ. Nd‘ o Mâ‐a běki bâ běhěpi puměngo, ka Mâ‐a nângâ hangwě na nyangwě ya mwa mwajo na ba diyaki na Ju, ka bâ‐ba ngiya o iboko vya itângâ i diyaki bya.

⁴¹ Ka Mâ‐a bweya itângâ o ’nâ, ka Mâ‐a vâ na mâ, na, Talitha kumai; yeně ndi, na, Itângâ, Mbi vwi na nâvě, na, Umwaka.

⁴² Elěngiaha tepě ka itângâ vya ’muwa, a ka tamwaka; ’kabojana a diyakindi jomu ja mepuma na mepuma mebale o utodu. Ba mamakindi imam‘ iněně.

⁴³ Ka Mâ‐a languwa bâ omě, na, E yowanake na moto. Ka Mâ‐a sombiya na elombo e jakě e vekwě mâ.