Mark 4 - Panga ea Kya 1895

¹ Ka Mâ‐a yalě pě iyokudě baka na etima; ka ebumbu eněně ya yolaně o Mâ‐a jadi, ka Mâ‐a vama o elende, ka Mâ‐a diya o etima: ebumbu yěhěpi e diyakindi piěle na etima o uhěkě.

² Ka Mâ‐a yokudě bâ belombo beitě na mekanakâdi, ka Mâ‐a vâ na bâ o iyokwanidi viaju,

³ na, Yokolakiděni, uliyi u kěki ka liya ibângâ:

⁴ E diyakindi, o mâ‐a mwanjakidi, jaka i kwakindi o pěpěkě ja njeya, ka lonâni la oba la viya ka sâsâ jâ.

⁵ Ka jâkâ ja kwa o beěngě, o ha diyaki na mahě maitě; elěngiaha tepě ka jâ‐ja puma, ’kabojana ju diyaka na ndiba ya mahě.

⁶ O joba i pumidi ka jâ‐ja bâmbâlâniya; o jâ i ha diyakidi na metamba, i vivilanakiyendi.

⁷ Ka jâkâ ja kwa o mekanda, o mekanda me tombuwedi ka meâ mea ha jâ kâlu, i yěkěme bebuma.

⁸ Ka jâkâ ja kwa o mahě mayamu, ka jâ‐ja yěkěmě bebuma, i ka tombwaka, i ka vuhaka, ka jâ‐ja yěkěmě bebuma beitě, jâkâ mabo malalo, jâkâ mabo utoba, jâkâ kama.

⁹ Ka Mâ‐a vâ na bâ, na, A di na matâ ma yokakě, a yokake.

¹⁰ O Mâ‐a diyaki dipâ, ba diyaki na Ju na jomu na bebale, ba uwaki Mâ ukanakâdi tě.

¹¹ Ka Mâ‐a vâ na bâ, na, Inyěni nd‘ o didini věwěngo iyowě ja mahâwě ma ipangiya ja Anyambě: ndi o ba ha ’bě vemengo belombo těkabe beěhěpi be hakwě na mekanakâdi:

¹² Boyěněkě ba ka yěněte, ndi ba yowe; boyokaka, ba ka yokate, ndi ba bweyidě; o banga ba ’luwa egombe t‘ egombe, na mabe mabu ma ’yidwě bâ.

¹³ Ka Mâ‐a vâ na bâ, na, Wa ’wěni ukanakâdi těkamu? nd‘ o ka yowě li mekanakâdi meěhěpi na e?

¹⁴ Uliyi a liyakandi ndaga.

¹⁵ Ekaba ndi ba pěpěkě ya njeya o ndaga i liyakwě, o bâ‐ba běkě yokango, na Setan a viya ka nângâ ndaga i liyakudwě o melema meabu.

¹⁶ Ekaba tepě ba liyakwě o beěngě, ba běkě ndaga yokango, na bâ‐ba hungana o pahiya yâ na mbya:

¹⁷ ndi bâ mětě ba diye na metamba, ovaně nd‘ o bâ‐ba diyakě o ’gombe; kwěi o betuniya na njuke be ka pâyě o nyanga ya ndaga, elěngiaha na bâ‐ba kâbâ.

¹⁸ Ekaba ndi ba liyakwě o mekanda; ba běkě ba yoka ndaga,

¹⁹ manaka ma eměnâ těkae, n‘ iyabana ja boněně, n‘ ivaha ja belombo bepâkwě, o beâ be ka ngiyě, vâkâna be weyakandi ndaga, na yâ‐ya bě ekomba.

²⁰ Ekaba ndi ba liyakwě o mahě mayamu: ba běkě ndaga yokango, na bâ‐ba pahiya yâ, na bâ‐ba ka yěkěměkě bebuma, bâkâ mabo malalo, bâkâ mab‘ utoba, bâkâ kama.

²¹ Ka Mâ‐a vâ na bâ, na, Vitwa vi vanakwěndi ka vamwě o ibongalo ja kwe, na b‘ ibongalo j‘ ikondo? ipě ka tědwě o uhângâ?

²² O ibě na ’lombo e di kutamango e ka měndě e yowaně, tombe na e jadi ilimbo vâkâna e ka pâdwěte o bwe.

²³ A di na matâ ma yokakě, a yokake.

²⁴ Ka Mâ‐a vâ na bâ, na, Bandamakidi nyang‘ ’anyu e yokakě: nyanga ’anyu e ka yějěně, yâ tepě e ka yějwěně inyěni; ba ka yokě inyěni o jadi, te ba ka věwě wa.

²⁵ A janidi mâ t‘ a ka věwě, a ha ’bě ně a ka nângânwěndi tombe na eaju e duwakě.

²⁶ Ka Mâ‐a vâ, na, Ipangiya ja Anyambě i ndi kakana, bwěsě ona moto a mwanjaka ibângâ o he;

²⁷ na mâ‐a ka yaka, a ’mwaka bulu ma mwehe, na ibângâ ja pumě na jâ‐ja tombuwa, a yowě ka yâ e jadi.

²⁸ Ikabojana he e pumakěte bebuma beaju mětě; o bohoboho nd‘ utondo, nandi běngě molo u pâke, kwě běngě mihâ mětě ma pumake o molo.

²⁹ Nd‘ o ebuma e běkě yâdângo, elěngiaha vâkâna a lomakandi ubenji, ’kabojana juma i pândi.

³⁰ Ka Mâ‐a vâ, na, Ipangiya ja Anyambě ho ka kwanidě lě jâ na nja ’lombo ě? na ka yějě lě jâ na nja ukanakâdi?

³¹ E t‘ ona utonga mua ’buma ya mustard, e jadi, o yâ e liyakwě o he, bohâlě wa na bebuma bepâkwě be jadi o he:

³² nd‘ o yâ e běkě liwěngo na yâ‐ya tombuwa, na yâ‐ya bě eněně wa na bele bepâkwě behâlě, na yâ e ka hambakidě melabe meněně, ovaně nd‘ o lonâni la oba lo diyakě o edingiha ya yâ.

³³ A kalaki na bâ ndaga na mekanakâdi těkame meitě, nyanga ’abu e diyaki na ngudi e yokakě.

³⁴ Nd‘ Au kalaka na bâ kabo na ukanakâdi; o Mâ‐a diyaki na beyokwedi beaju dipâ, ka Mâ‐a pěhě bâ belombo beěhěpi.

³⁵ Bâ buhwa tě, o yâ e diyaki kolo, ka Mâ‐a vâ na ba, na, Ho jabwakeni o mwidi ’pâkwě.

³⁶ O bâ‐ba běkidi ebumbu ’a bato timběngo, ka bâ‐ba nângâ Mâ ka Mâ‐a diyakidi o elende; belende bepâkwě be diyaki tepě na Mâ.

³⁷ Ka ekudikudi ya upupě ya vunga; mekeba me bweyaka elende; e ka ’mbaka o hinga.

³⁸ A diyakindi o mahina bya o epondoma; ka bâ‐ba ’mudě Mâ, ka bâ‐ba vâ na Ju, na, Uyokwidi, wa yěněk‘ isâlâ, na o banga hwa?

³⁹ Ka Mâ‐a ’muwa, ka Mâ‐a kandidě upupě, ka Mâ‐a vâ na etima, na, Běmbělě, hwěměkiyě. Ka upupě mu‐a wa, mu‐a bě uděmbě uněně.

⁴⁰ Ka Mâ‐a vâ na bâ, na, e lě nde ya Jângâ tě iněně ekadi? E lě nd‘ eanyu e ha ’bě n‘ ikamidě?

⁴¹ Ka bâ‐ba banga jângâ iněně, ba ka himaka bâ mětě na bâ mětě, na, Ekaně moto a lě nja jângâ ě, tombe upupě na etima bea yokiyate Mâ.