Mark 3 - Panga ea Kya 1895

¹ Ka Mâ‐a vala o tyâtyi ’abu epâkwě njo: moto a diyakind‘ omě a diyakidi enâ vivilaniyango.

² Ba ka běmběkě Mâ na ipě A ka yongi mâ o buhwa boa Iyâjâ, ovaně nd‘ o bâba ka hěnjě Mâ.

³ Ka Mâ‐a vâ na momo tě a diyakidi enâ vivilaniyango, na, Těměkě o hanganě.

⁴ Ka Mâ‐a vâ na bâ, na, E te hohonganěngo na o ha bwam‘ o hwi j‘ Iyâjâ, ipě o ha bobe? o yongě ’měnâ, ipě o weya?

⁵ Ka bâ‐ba diya dâ. Ka Mâ‐a tamuwa bâ na ngambi, A yěněkě ngěbě o melema meabu mekolo, ka Mâ‐a vâ na momo, na, Hambakidě enâ ’vě. Ka mâ‐a hambidě: ka enâ ’aju ya timba upeha pani ka epâkwě.

⁶ Ka Farisi ba puma, ka bâ‐ba paniya o vala o ’hoka na Herodian o pěl‘ ’aju, nyang‘ ’abu o ka weyaně Mâ.

⁷ Ka Jisus a věngěmě na beyokwedi beaju na ’la o ’tima: ebumbu eněně e vitanakidi Mâ oviya Galili na Judia,

⁸ na oviya Jěrusalěm na oviya Idumia, na o pělě ’pâkwě ya Jordan na ba Tair na Saidon, ebumbu ya bato eněně e vakind‘ o Mâ‐a jadi, o bâ‐ba yokakidi belombo beaju be hakidi beněně.

⁹ Ka Mâ‐a kala na beyokwedi beaju, na, elende ehâlě e vengakidě Mâ, o banga ebumbu ya dibidě Mâ.

¹⁰ Ikabojana a yongakiděndi bato baitě, ovaně nd‘ o bâ‐ba pinyilakidě o kupaně Mâ, tango e diyakidi na bebědi yehěpi.

¹¹ O malina mabe ma yěni Mâ, ma ka kwaka o boho boaju, ma ka yamaka, na, O Mwana ua Anyambě.

¹² Ka Mâ‐a languwa bâ, na, ba pangake Mâ‐a yowanakě.

¹³ Ka Mâ‐a beta o ukodi, ka Mâ‐a ndiya ibaju ba vahakidi; ka bâ‐ba pâ o Mâ‐a jadi.

¹⁴ Ka Mâ‐a kenjě jomu na babale, na ba diyaki na Ju, ovaně nd‘ o Mâ‐a ka lomě bâ ka pakwaniya,

¹⁵ na bâ‐ba pahiya ngudi o yonganakě mebědi, na e pumanakě děvil:

¹⁶ ’Saimân uaju a vangakidě na Pitě;

¹⁷ Jěms ja Zěbědi, na mwana nyangwě Jân na Jems, ibaju ba vangakidě, na, Boaněrjes, i weyaki, na Bana ba ngadi:

¹⁸ na Andru, na Filip, na Bartholomiu, na Mathiu, na Thomas, na Jems ja Alfeus, na Thadius,

¹⁹ na Saimân ya Kenan, na Judas Iskariot a kândâkiyi Mâ.

²⁰ Ka bâ‐ba ngiya o ndabo. Ka ebumbu ya lataniya pě epâkwě njo, ba diye na ngudi e jakě tombete na beja.

²¹ O mbweyi jaju i yoki yâ, ka bâ‐ba vala ka bweya Mâ; ’kabojana ba vâki, na, A potwakandi.

²² Ka balěndi ba vakiyedi o Jěrusalěm ba vâ, na, A na Biělzibub, A věngěkiděndi děvil na ngudi y‘ upolo mua děvil.

²³ Ka Mâ‐a ndiya bâ o Mâ‐a jadi, ka Mâ‐a vâ na bâ na mekanakâdi, na, Setani a lě a yâlâkě o věngidě Setani na‐e?

²⁴ Oningě ipangiya ja pěhě jâ mětě, ipangiya tědině ja yâlě o těmě.

²⁵ Oningě ndabo ya pěhě yâ mětě, ndabo těně ya yâlě o těmě.

²⁶ Ndi oningě Setan a yanaka na mâ mětě, a ndi pěhěngo, a yâlě o těmě, vâkâna a pândi ’huku.

²⁷ O ibě na moto a ka yâlě o ngiya o ndabo ya moto ukolo, na jongolidě jumba jaju, kabo a ta o kata moto ukolo katango, nandi běngě a jongolakidě ndabo ’aju.

²⁸ Pâkwěpâkwě Mbi vâki na inyěni, na, Mabe měhěpi ma te ma iyakudwě bana ba bato, n‘ ikila ja Anyambě nyang‘ ’abu e ka kilě yěhěpi;

²⁹ ndi a ka kilě Ilina Iyamu a ’yidwě, ndi a na mahihi ma yěkě ya ’gombe yěhěpi.

³⁰ Ikabojana ba vâki, na, A na ilina ibe.

³¹ Nandi bana ba nyangwě na nyangwě ba vakindi, těměngo o bwebwe, ka bâ‐ba banda Mâ, ba ndakiya Mâ.

³² Ebumbu e diyaki Mâ lungango, ka bâ‐ba vâ na Ju, na, Yěněkěteni, nyângwě na bana ba nyângwě ba vahakand‘ Âvě o bwebwe.

³³ Ka Mâ‐a vâ na bâ, na, Jaie lě nja, tombe na bana bina lě ba nja?

³⁴ Ka Mâ‐a hilě ba diyaki diye diye, ka Mâ‐a vâ, na, Yěněkěteni jaie na bana bina!

³⁵ Uěhěpi a ka hayě upango mua Anyambě, mâ nd‘ a di mwan‘ ina na jaie.