Mark 2 - Panga ea Kya 1895

¹ Ka Mâ‐a vala pě o Kapěrnaum hwi jâkâ tombango, ka sango ya ’luanidě, na, a bě nd‘ o ndabo.

² Ka bato baitě e yolaně o njo pâkâ, ba diye pě na ngudi ba kokakě o ndabo, tombe n‘ ubiyâ; A ka pakwaka ndaga o bâ‐ba jadi.

³ Ka bâ‐ba viya o Mâ‐a jadi na moto a diyakidi na ebědi ya nyolo limbelimbe, a diyaki bapwěngo na bato banai.

⁴ O bâ‐ba diyakidi ba diye na ngudi e pakiyě o Mâ‐a jadi ’kabojana ebimba, ka bâ‐ba bumudě unyuwa o ndabo ’aju e diyakidi; o bâ‐ba diyaki mâ bumuděngo, ka bâ‐ba hubě ikondo ja ubědi mua nyolo limbelimbe i diyakidi.

⁵ O Jisus a yěněkidi ikamide jabu, ka Mâ‐a vâ na ubědi mua nyolo limbelimbe, na, Mwana o, mabe mâvě ma ’yidwěnd‘ âvě.

⁶ Ndi balěndi na bahuhu ba diyakind‘ omě diye diye, ba ka kalaka na melema meabu,

⁷ na, E lě nde ya momo těkaně e kilakě Anyambě kakana? Nja ka ’yidě mabe kabo Anyambě dipâ?

⁸ Elěngiaha o Jisus a yowakidi n‘ ilina jaju na ba pikilakiyandi bâ mětě na bâ mětě, ka Mâ‐a vâ na bâ, na, O pikilakiya li belombo těkabe o melema meanyu nande?

⁹ Nana e ndi bobâbu na vâ na ubědi mua nyolo limbelimbe, na, Mabe mâvě ma ’yakudw‘ âvě, na ba o vâ, na, Umwaka, na nâvě wa nângâ ikondo jâvě, na nâvě wa tamuwa?

¹⁰ Nd‘ ovaně nd‘ inyěni o ka yowěni, na, Mwana moto a na ngudi e ’yakidě mabe o he (ka Mâ‐â vâ na ubědi mua nyolo limbelimbe, na),

¹¹ Mbi vwi na nâvě, na, Umwaka, nângâkâ ikondo jâvě, na nâvě wa vala o ndabo ’âvě.

¹² Elěngiaha, tepě ka mâ‐a ’muwa, ka mâ‐a nângâ ikondo jaju, ka mâ‐a vala o boho boabu boa běhěpi; jâ ndi jabu ja běhěpi ja mama, ba ka bendakě Anyambě, na, Ho ha yěnete yâ kakana.

¹³ Ka Mâ‐a vala pě njo ’pâkwě baka na etima, ka ’bumbu yěhěpi ya kâbidě Mâ, a ka yokwakidě bâ.

¹⁴ O Mâ‐a diyakidi a tombaka, ka Mâ‐a yěně Livai mwana wa Alfius diyango o inângânido via pago, ka Mâ‐a vâ na ju, na, Vitakě ’Mba. Ka mâ‐a ’muwa na vitě Mâ.

¹⁵ E diyakindi o Jisus a diyakindi a jaka o ndabo ’aju kakana, bayoli pago na bato babe ba diyaki tepě, na Jisus na beyokwedi beaju ta; ’kabojana ba diyaki baitě, ka bâ‐ba vitaně Mâ.

¹⁶ O balěndi na Farisi ba yěni Mâ‐a jaka na bayoli pago na bato babe, ka bâ‐ba vâ na beyokwedi beaju, na, E lě nde eaju e mâtâkě na e jakě na bayoli pago na bato babe?

¹⁷ O Jisus a yoki yâ, ka Mâ‐a vâ na bâ, na, Ba di mepeha, ba vahaka nganga; ndi kabo ba běkě: Mbu vaka ka ndiya bato bayamu, ndi kabo babe na, ba luwake melema.

¹⁸ Beyokwedi bea Jân na bea Farisi ba ma diyakandi ba hindinaka njo jâkâ, ka bâ‐ba viya, ka bâ‐ba uwa Mâ, na, E lě nde ya beyokwedi bea Jân na bea Farisi be diyakě be hindinaka, ndi beâvě be hindine.

¹⁹ Ka Jisus a vâ na bâ, na, Mbweyi j’ ubayi i ka yâlěte o hindina o ubâmbi u di na jâ? Ulingo ’muabu u di n‘ ubâmbi i ’bě na ngudi o hindina.

²⁰ Ndi hwi i vakandi j‘ ubayi i ka nângânwě bâ, nandi běngě ba hindinake o hwi tědině.

²¹ O ’bě na moto a ka tumě epěhi y‘ unamba mua kya o ngâi ya vyo, vâkâna epěhi tě e hângâkwě ně e ka paděndi ya vyo, n‘ ibeku ja kena.

²² O ’bě tepě na moto a vamakě ivě ja kya o mbute ja vyo, vâkâna ivě ja kya i ka tumbidi mbute na ivě ja hoviya, na mbute ja jongoliya: ndi ivě ja kya i vamakwěndi o mbute ja kya.

²³ O buhwa boa Iyâjâ, A diyakindi a tamwaka o meanga mea poti kakana; ka beyokwedi beaju bea yalě ibuka ja poti o bâ‐ba diyaki ba kěkě.

²⁴ Ka Farisi ba vâ na Ju, na, Yěněkěte, e lě nde abu e hakě, o buhwa boa Iyâjâ, e ha ibě hohonganěngo?

²⁵ Ka Mâ‐a vâ na bâ, na, O ha langeteni ka Devid a hakidi o mâ‐a diyakidi na mala, na mâ‐a yoka nja, na ba diyaki na ju?

²⁶ O mâ‐a kěkidi o ndabo ’a Anyambě o ’gombe ya Abaiethar prist eněně, ka mâ‐a ja pěmbě y‘ ilevudwě, e ha diyakidi hohonganěngo na a jaka kabo prist dipâ, ka mâ‐a vě tepě ba diyaki na ju.

²⁷ Ka Mâ‐a vâ na bâ, na, Iyâjâ i velakudwi moto, ndi hanga na moto nda velakudwě Iyâjâ.

²⁸ Vâkâna Mwana moto a ndi Upangiyi tepě mua Iyâjâ.