Mark 16 - Panga ea Kya 1895

¹ O Iyâjâ i běkidi tombango, Meri Magdaline, na Meri nyangwě ya Jems, na Salome, ba diyakindi ba hamba belombo bea kango beyamu, ovaně nd‘ o bâ‐ba ka viyě ka hiya Mâ beâ.

² O buhwa boa wiki boa bohoboho, n‘ ubwa n‘ ubwa mětě, ba pâkind‘ o malonga, o ’gombe ya joba e pumakě.

³ Ka bâ‐ba vâ bâ mětě na bâ mětě, na, Nja ka vungulidě hwě ilale oviya ubiyâ mua malonga?

⁴ O bâ‐ba tamuwedi ka bâ‐ba yěně na ilale i diyaki vunguludwěngo (’kabojana i diyakindi ’něně).

⁵ Ka bâ‐ba ngiya o malonga, ka bâ‐ba yěně iwanja diyango o pělě eyomi pugango na ngâi ’tano eyaba; ka bâ‐ba nyânyâviyě.

⁶ Ka mâ‐a vâ na bâ, na, O nyânyâvâkiyeni: o butakandini Jisus ya Nazarěth, e weyakudwě o krâs: A pumbuwendi: A ’bě pě okava; yěněkěteni, iboko viabu vi nangakidě Mâ.

⁷ Ndi valakani, ka langwakiyeni beyokwedi beaju na Pitě, na, A valind‘ o boho n‘ inyěni o Galili, ovoně nd‘ o inyěni o ka yěni Mâ ni, ka Mâ‐a vâki n‘ inyěni.

⁸ Ka bâ‐ba puma bokweyaka oviya, malonga ’kabojana ba mamakindi, na bâ‐ba ka likimaka; na bâ‐bu kalaka na moto te moto elombo; ’kabojana ba bangakindi.

⁹ Ndi o Jisus a pumbwakidi n‘ ubwa mua buhwa boa wiki boa bohoboho, A pumakiyendi o Meri Magdaline uaju a diyakite a pumě děvil hěmbwědi.

¹⁰ Ka mâ‐a vala ka languwa ba diyakidi na ju, o bâ‐ba diyaki ba yěněkě ngěbě na bâ‐ba e yaka.

¹¹ O bâ‐ba yoki na A bi mihâ, na na a yěněki Mâ, bu kamakidě.

¹² Yeně tombango, ka Mâ‐a pumiya pě itingidi ipâkwě o babale ibabu, o bâ‐ba diyakidi ba tamwaka, ba kěkě o ’hiki.

¹³ Ka bâ‐ba ’la ka languwa yâ ba ma dikana; ndi bâ‐bu kamakidě tepě bâ.

¹⁴ Kwěyi, ka Mâ‐a pumiya o jom‘ n‘ umbâkâ o bâ‐ba diyaki ba jaka, A ka hěnjěkě bâ o nyang‘ ’abu e ha ’bě na ikamidě, na melema bokolo, ’kabojana bu kamakidě ba yěněki Mâ o Mâ‐a diyaki pumbuwango.

¹⁵ Ka Mâ‐a vâ na bâ, na, Kěkěni o he yěhěpi, o ka pakwakiyani ekeha yěhěpi sango tě ’yam‘ ekaně.

¹⁶ A kamakidě, na mâ‐a baptaiswě a ka yongwěndi; ndi a ha kamakidě a ka kwehwěndi.

¹⁷ Ndembo těkadi i ka vitaněndi ba kamakidě; ba ka pumakěndi děvil na dina jamě; ba ka kali beemi bea kya;

¹⁸ ba ka bweyi mbamba; oningě ba mâtâ elombo e weyanakě, ya kokidě bâ; ba ka nangidi mebědi makadu, na meâ mea diya upeha.

¹⁹ Nandi, o Upangiyi a běki na bâ nonaně kalango, ka Mâ‐a nângwě o Hěvěn, ka Mâ‐a diya o ’nâ y‘ Anyambě eyomi.

²⁰ Ba kěkě, ka bâ‐ba pakuwa o iboko viěhěpi, Upangiyi a haka na bâ, na Mâ‐a sulakě ndaga na ndembo i benganakě. Aměn.