Mark 15 - Panga ea Kya 1895

¹ N‘ ubwa, elěngiaha, ka prist iněně ja ha ehoka na batodu na balěndi na njamba yěhěpi, ka bâ‐ba kata Jisus, ka bâ‐ba ’la ka vě Mâ o Pailat a jadi.

² Ka Pailat a uwa Mâ, na, Âvě nd‘ Upolo mua Jiu‐e? Ka mâ‐a yavwana ka Mâ‐a vâ, na, O vâki yâ.

³ Ka prist ěněně ba bakidě Mâ belombo beitě; ndi A timbwanaka elombo.

⁴ Ka Pailat a uwa pě Mâ, na, Wa yavwanaka ’lombo? yěněkěte, belombo beitě ibeabu be pakwakě opěl‘ âvě.

⁵ Ndi Jisus a timbwanaka pě elombo, ovaně nd‘ o Pailat a mamakidi.

⁶ Nandi o isango tědině a ma hulakidi bâ mbwedi pâkâ eabu e jombaka yěhěpi.

⁷ Nd‘ omě o diyakindi n‘ umbâkâ a ma tubakwě na Barabas, a diyakidi katwěngo na ba logwakidi na ju, ba diyakidi ba weyana n‘ ulogo.

⁸ Ka ebumbu ya yama nangudi, e ka yalakě o jomba mâ na a hake ka mâ‐a hakě bâ mběmbě.

⁹ Ka Pailat a yavwana na bâ, na, O vahakandi ’mba ni mbi hulakidi ’nyěni Upolo mua Jiu‐e?

¹⁰ Ikabojana a diyakite yowěngo na prist iněně ba věki Mâ n‘ ivina.

¹¹ Ndi ka prist iněně ja hâkâ ebimba na a tepě o huludě bâ Barabas.

¹² Pailat a timbwanaki pě, ka mâ‐a vâ na bâ; na, Nandi, o vahaka lě ni mbi haka uanyu a tubakě na Upolo mua Jiu na?

¹³ Ka bâba yama pě, na, Kâmâkidě Mâ o krâs.

¹⁴ Jâ ndi ja Pailat ja vâ na bâ, na, Na nja ’lombo ě, a ma ha lě nja bobě? Ka bâ‐ba yama pě nangudi, na, Kâmâkidě Mâ o krâs.

¹⁵ Ndi Pailat a vahaka o tândidě ebimba A hulwakidi bâ Barabas, o mâ‐a běki Jisus bomiděngo ka mâ‐a vě Mâ ka kâmudwě o krâs.

¹⁶ Ka sâjě ba valana Mâ o ikenga i tubakwě na Pritorium; ka bâ‐ba ndiya njamba ’abu yěhěpi ta.

¹⁷ Ka bâ‐ba bâtidě Mâ ibâtâ iveyu, ka bâ‐ba longa korowa ya mayâ, ka bâ‐ba bâtidě Mâ yâ,

¹⁸ ka bâ‐ba yalě Mâ ihoma, na, Mbolo, Upolo mua Jiu.

¹⁹ Ka bâ‐ba bweya Mâ o molo n‘ utumbe, ka bâ‐ba tuwa Mâ malě, ba kalakiya Mâ mabângâ humehume.

²⁰ O bâ‐ba běki Mâ věhěngo, ka bâ‐ba věngidě Mâ ibâtâ iveyu, ka bâ‐ba bâtidě Mâ ngâi jaju mětě, ka bâ‐ba valana Mâ ka kamudwě o krâs.

²¹ Ka bâ‐ba panga Saimân ua Sairini a tombakidi baka, a viya o ’hiki, hangwě ya Alěxander na Rufus, na a bapakě krâs ’aju.

²² Ka bâ‐ba valana Mâ o iboko via Golgotha vi jadi, na, oningě via ’ludwě, Iboko via Mbombo.

²³ Ka bâ‐ba vě Mâ ivě, hâbwěngo na myrrh: nd‘ au nângâkâ jâ.

²⁴ O bâ‐ba běki Mâ kâmiděngo o krâs, ka bâ‐ba kabaniya ngâi jaju, ba nângâkiyě jâ kwai, ya moto uěhěpi e ka nângě.

²⁵ E diyakindi egombe ya mawěla ibuwa, ka bâ‐ba kâmidě Mâ o krâs.

²⁶ Ilěndwě ja ebuke ’aju i diyakindi lěndwěngo oba, na, UPOLO MUA JIU.

²⁷ Ba kâmâkidi na Ju meibi mebale; ’mbâkâ o ’nâ ’aju eyomi, ’mbâkâ o ’nâ ya ’mengwě.

²⁸ Kâ Ilěndwě ja hohonganě i vâkě, na, A langakudwi na baweyi ba belekanako.

²⁹ Ba ma tombaka baka ba ma kilaki Mâ, ba vugumakidě meolo meabu, na, Ěhě! Âvě o bulwakidě těmpěl na nâvě wa longa yâ na hwi ’lalo,

³⁰ yongakě nyolo ’âvě, na nâvě wa huba oviya krâs.

³¹ Yâ nyanga tě te ya prist iněně e vâkidi na balěndi bâ mětě na bâ mětě bověhěkě, na, A ma yongaki bapâkwě; ndi A ’bě na ngudi e yongakě Mâ mětě.

³² Nandi, Kraist, Upolo mua Israěl, a hubake oviya krâs, ovaně ndi o hwě ho ka yěně na hwě hwa kamidě. Ba kâmâkudwě na Ju, ba timbakidi Mâ ndaga tě.

³³ O jâ i diyaki joba meolo ka ivititi ja diya o he yěhěpi kwanga nala mawěla malalo.

³⁴ O mawěla malalo ka Jisus a yama na joyi oba, na, Ěloi, Ěloi, l‘ ma sabakthenai? Yeně ndi, oningě ya ’ludwě, na, Anyambě ’amě, Anyambě ’amě, e lě nde ’âvě e senji ’Mba?

³⁵ Bâkâ ba diyaki těmetěme, o bâ‐ba yoki nonaně, ka bâ‐ba vâ, na, Umbwakiyate, A ndakiyandi Elaias.

³⁶ K‘ umbâkâ a val‘ umbila, ka mâ‐a londa nyândâ na vinigar, a ka kahakidě yâ o utumbe, ka mâ‐a mâtidě Mâ, na Dikaki Mâ ni mbwe; ho t‘ o yěně ipě Elaias a ka viyi ka hubě Mâ.

³⁷ O Jisus a diyaki yamango joyi oba, ka Mâ‐a diba.

³⁸ Ka unamba uněně mua těmpěl mua pěhěniyě bepěhi bebale oviya oba kwanga nala he.

³⁹ O Sěnturiân e diyaki těměngo hohonganěngo na Ju e yěněki Mâ‐a yamaka a dibaka, a vâki, na, Mbambayě, moto těkaně a diyakindi Mwana Anyambě.

⁴⁰ Bajo ba diyaki tepě ba hilakě na masěyi, ibabu bâkâ ndi Meri Magdaline, na Meri nyangwě ya Jems ehâlě na Josěs, na Salome;

⁴¹ (ba vitakidi Mâ o Mâ‐a diyakidi o Galili, na haya Mâ) na bajo bapâkwě baitě ba betaki na Ju o Jěrusalěm.

⁴² O kolo pâdi, ’kabojana bo diyakindi buhwa boa ikenjě, boně ndi, buhwa bo takě na Iyâjâ,

⁴³ Josěf ya Arimathia, umbâkâ ua ’hoka na moto ua kuma eyam‘, a ma vengakidě tepě ipangiya ja Anyambě, ka mâ‐a viya, ka mâ‐a ngiya na evemba o Pailat a jadi, ka mâ‐a jomba ekengo ya Jisus.

⁴⁴ Ka Pailat a mama n‘ ipě A wi pâni; ka mâ‐a ndiya ua sěnturiân ka mâ‐a uwa mâ, na, ipě A bi na wa n‘ ukili.

⁴⁵ O mâ‐a yowudě na ua sěnturiân, ka mâ‐a vě Josěf ekengo.

⁴⁶ Ka mâ‐a hamba mavěla mayamu, ka mâ‐a hubě Mâ, ka mâ‐a dinga Mâ na mavěla tě, ka mâ‐a nangidě Mâ o malonga ma pudwakudwě o malale, ka mâ‐a vungulidě ilale o ubiyâ mua malonga.

⁴⁷ Meri Magdaline, na Meri nyangwě ya Josěs, ba yěněkindi o Mâ‐a nangakudwě.